स्थानीय तहका प्रमुखलाई फोन गरी मन्त्रालयबाट ३२ वटा पक्की पुल उद्घाटन

A+ A A-

बागमती प्रदेश सरकारले निर्माण गरेका ३२ वटा पक्की पुलको एकै पटक उद्घाटन गरिएको छ ।

प्रदेशको भौतिक पूर्वाधार विकास मन्त्रालयमा बुधबार आयोजित एक कार्यक्रमबीच आर्थिक वर्ष २०७५/७६ र २०७६/७७ गरी दुई वर्षमा निर्माण भएका ३२ वटा पक्की पुलको एकै पटक उद्घाटन गरिएको हो ।

मुख्यमन्त्री डोरमणि पौडेलले मकवानपुरको कैलाश गाउँपालिकामा निर्मित दुवोखोलाको पुल उद्घाटन गरी कार्यक्रमको सुरुवात गरेका थिए ।

प्रदेश सरकारले संघीय ससर्त अनुदान र आफ्नै बजेटबाट दुई वर्षमा प्रदेशका १२ वटा जिल्लामा ३२ वटा पक्की पुल निर्माण गरेको जानकारी दिएको छ ।

काठमाडौंमा १, ललितपुरमा ५, भक्तपुरमा १, काभ्रेमा ५, सिन्धुपाल्चोकमा ५, दोलखामा ३ वटा पुल निर्माण भएको यातायात पूर्वाधार निर्देशनालय हेटौंडाले जानकारी दिएको छ ।

यसैगरी चितवनमा ३, मकवानपुरमा २, नुवाकोटमा ३, धादिङमा १, सिन्धुलीमा १ र रामेछापमा १ वटा पक्की पुल निर्माण गरिएको निर्देशनालयका निमित्त निर्देशक डा.सहदेवबहादुर भण्डारीले जानकारी दिए ।

३२ वटा निर्माण सम्पन्न पुलको कुल लम्बाइ ९९२.९० मिटर छ । ७३ करोड ६७ लाख ४३ हजार लागतमा सबै पुलको निर्माण गरिएको भण्डारीले जानकारी दिए ।

मुख्यमन्त्री पौडेलले पानसमा दीपप्रज्वलन गरी मन्त्रालयबाटै पुल उद्घाटन गरेको घोषणा गरेका थिए । कैलाश गाउँपालिकाले पुल उद्घाटनका लागि तयारी गरेर बसेको थियो । पौडेलले मन्त्रालयबाट पुल उद्घाटन गरेको जानकारी गराएपछि कैलाशका अध्यक्ष टंक मोक्तानलगायतका स्थानीयले पुल निर्माण भएको स्थलमा उद्घाटन गरेका हुन् ।

भौतिक पूर्वाधार विकासमन्त्री रामेश्वर फुयाँलले दुई वर्षदेखि निर्माण भएका ३२ वटा पक्की पुलको विधिवत् रूपमा उद्घाटन भएको जानकारी गराए । उनले सम्बन्धित स्थानीय तहका प्रमुखलाई फोन सम्पर्क गरी मन्त्रालयबाट पुल उद्घाटन भएको जानकारी गराएका हुन् ।

प्रदेश सरकारको पूर्वाधार विकास कार्यालय ललितपुरले ६ वटा, पूर्वाधार विकास कार्यालय काभ्रेले ६ वटा, नुवाकोट कार्यालयले ४ वटा, चितवन कार्यालयले ५ वटा, सिन्धुपाल्चोक कार्यालयले ९ वटा र रामेछाप कार्यालयले २ वटा पुलको निर्माण गरेको हो ।

स्टिल ट्रसका २, सस्पेन्सन २, स्टिल प्लेट गर्डर ४, आरसीसी बिम १७ र आरसीसी बक्स किसिमका ७ वटा पुल निर्माण भएको हो ।

प्रदेश सरकारले चालू आर्थिक वर्ष २०७७/०७८ मा १ सय २० वटा पक्की पुल निर्माण सम्पन्न गर्ने लक्ष्य राखेको निर्देशनालयले जानकारी दिएको छ । प्रदेश भरी १३ वटा झोलुङ्गे पुल निर्माण गरिने भएको छ । पक्की पुल र झोलुङ्गे गरी १ अर्ब रुपैयाँ बजेट छुट्याइएको निर्देशक भण्डारीले जानकारी दिए ।

प्रदेश सरकारले लकडाउनको अवधिमा मात्रै १९ वटा पुलको निर्माण सम्पन्न गरेको निर्देशनालयले जानकारी दिएको छ ।

‘लकडाउनका कारण चैत महिना काम हुन सकेन । वैशाखबाट कामले पुनः गति लिएको हो । अन्यथा गत आवमै आधाभन्दा बढी पुलको निर्माण सकिन्थ्यो,' निर्देशक भण्डारीले भने ।

चालू आवमा बन्ने १ सय २० वटा पक्की पुलमध्ये संघीय सरकारबाट ५७ वटा र प्रदेश सरकारले ६३ वटा पक्की पुलका लागि बजेट विनियोजन गरेको छ ।

प्रकाशित मिति: बुधबार, साउन ७, २०७७ १८:४८