यी हुन् भोट हाल्न नपाउने ‘अभागी सेलिब्रेटी’

A+ A A-

भारतमा अप्रिल ११ तारिखदेखि लोकसभा निर्वाचन सुरु भएको छ । भारतीय जनताले सात चरणमा लोकसभाका ५ सय ४३ सिटका लागि मतदान गर्दै छन् ।
तर, दुःखको कुरा सिनेमाका पर्दामा धमाका मच्चाउने केही सेलिब्रेटी भने लोकसभामा मतदान गर्नबाट वञ्चित भएका छन् ।

मतदान गर्न नपाउनेको सूचीमा छन्, अभिनेता अक्षय कुमार । उनीलगायत केही कलाकारले किन मतदान गर्न पाएनन् भन्ने विषय चर्चामा रहेको छ । अमर उजालाको अनलाइन संस्करण लेख्छ– ‘मतदान गर्न नपाउने लिस्टमा कैटरिना कैफ पनि छिन् ।’

कैफको नाम मतदाता सूचीमा नरहेको उसले लेखेको छ ।

ज्याकलिन फर्नान्डिजले पनि मत हाल्न पाउँदिनन् । उनीसँग श्रीलंकाको नागरिकता छ । उनका बुबा श्रीलंकन र आमा मलेसियन नागरिक रहेको भारतीय सञ्चारमाध्यमले लेखेका छन् ।

बलिउड ‘रक स्टार’ नरगिस फाखरी पनि भारतमा बस्छिन्, काम गर्छिन् । तर, उनीसँग पनि मताधिकार छैन । न्युयोर्कमा जन्मिएका फाखरीसँग अमेरिकी नागरिकता छ । अमेरिकी नागरिक भएका कारण फाखरीले मत हाल्न नपाउनु त स्वाभाविक हो ।

तर, अचम्मको कुरा चर्चित नायिक आलिया भट्टले पनि मतदान गर्न नपाउने भएकी छन् ।

उनकी आमा सोनी राजदान बेलायती नागरिक हुन् त्यसैले आलियासँग पनि भारतीय नागरिकता छैन । उनीसँग बेलायती नागरिकता मात्रै भएको भारतीय सञ्चारमाध्यमले लेखेका छन् ।

चर्चित अभिनेता आमिर खानका भान्जा इमरान खानले पनि मतदान गर्न पाएनन् किनकि उनको साथमा भारतीय नागरिकता छैन ।

अमेरिकामा जन्मिएका इमरानका बाबुआमाले डिभोर्स गरेपछि इमरान क्यालिफोर्नियामै हुर्किएको र उनीसँग अमेरिकाकै नागरिकता रहेको जनाइएको छ ।

बलिउडमा एकछत्रजसो राज गरिरहेका अक्षय कुमार क्यानडाली नागरिक हुन् । क्यानडामा जन्मिएर उनले त्यहाँको नागरिकता पाएका भने होइनन् ।

क्यानडाको विन्सर विश्वविद्यालयले उनलाई मानार्थ नागरिकता दिएको हो । भारतीय मूलकै भएर पनि उनी मतदानबाट किन वञ्चित भए भन्ने विषयमा भारतीय सञ्चारमाध्यम लेख्छन्, ‘भोटर लिस्टमा उनको नाम गायब छ ।’

प्रकाशित मिति: शुक्रबार, चैत २९, २०७५ ००:३५