जनकपुरधाम उपमहानगरको मूलद्वारमा फोहोर फालेर विरोध

A+ A A-

जनकपुरधाम उपमहानगरपालिकाको मुख्य बजार नै फोहोरको ढंगुर बनेपछि स्थानीय युवाले नगरको फोहोर उठाएर उपमहानगरको मूल ढोकामा थुपारेका छन् । उनीहरूले नगर क्षेत्रको फोहोरहरू ट्याक्टरमा संकलन गरेर कार्यालय परिसर अगाडि थुपारेर विरोध प्रदर्शन गरेका हुन् । नगरको सफाईमा उपमहानगरले ध्यान पुर्‍याउन नसकेको उनीहरूको आरोप रहेको छ ।

उपमहानगरपालिका कार्यालयले व्यवस्थापनतर्फ चासो नदिएको भन्दै कार्यालयको प्रवेशद्वारमा फोहोर फ्यालेर युवाले विरोध जनाएका हुन् । केही समय यता नगर क्षेत्रको फोहर नउठेपछि जनकपुरधाम नगर दुर्गन्धित बनेको छ ।

उपमहानगरपालिकाले व्यवस्थापन गर्न नसक्दा करिब २ सातादेखि जनकपुरमा फोहोर उठ्न सकेको छैन् । मुख्य सडकसहित भित्री बस्तीहरूमा फोहोर व्यवस्थापन नहुँदा सहर दुर्गन्धित बनेको छ । विगत १ महिनादेखि फोहोर नउठेका कारण नगर नै दुर्गन्धित हुन थालेपछि युवाले नगरभित्रको फोहोरको डंगुर उठाएर उपमहानगरको मूल ढोकामा थुपारेका हुन् ।

उपमहानगरपालिकाले व्यवस्थापनतर्फ चासो नदिँदा विरोधस्वरूप आफूहरुले मन्दिर वरिपरी रहेका फोहोर कार्यालयअगाडी फ्यालेको युवा नेता सुशील कर्णले बताए । फोहोरले सहर नै दुर्गन्धित भइसकेको अवस्थामा पनि उपमहानगरपालिका कार्यालयले व्यवस्थापनतर्फ चासो नदेखाएको उनको भनाइ थियो ।

१ दर्जनभन्दा बढी युवाले स्वयं ट्याक्टर व्यवस्था गरी फोहोर उठाएको चन्दन रायले बताए । शहरभर फोहोर थुप्रिए पनि उपमहानगरलाई मतलब नरहेको उनले बताए । उपमहानगरले फोहोर व्यवस्थापनतर्फ चासो नदिएपछि यसअघि केही वडाध्यक्षहरूले आफ्नै पहलमा सरसफाइ गर्न लगाएका थिए ।

फोहोरको डंगुरसहित पुगेका युवा नेता सरोज मिश्रले उपमहानगरले फोहोर व्यवस्थापनको नाउँमा प्रत्येक वर्ष करोडौँको रकम खर्चने गरेको तर नगर कहिल्यै पनि सफा हुन नसक्नु दुःखद रहेको बताए । उनले फोहोर सफा गर्ने नाउँमा खर्च गरिएको बजेट कहाँ जान्छ प्रश्न गरे ।

‘नगरको जनप्रतिनिधिहरू नेतृत्वमा पुगेको ४ वर्ष पुगी सकेको छ तर अहिलेसम्म ल्याण्डफिल्ड साइटको निक्र्यौल लगाउन नसक्नु उपमहानगरको असक्षमता देखाई रहेको छ’ उनले भने ।

नेता कर्णले आफैँ फोहोर सफाईमा ध्यान नदिन सक्ने उपप्रमुखले जनकपुरधामको स्थानीयलाई बदनाम बनाउने प्रकारको अभिव्यक्ति दिनु निन्दनीय रहेको बताए । उनले उपप्रमुख रीता मिश्रलाई आफ्नो अभिव्यक्ति फिर्ता लिन माग गरे । फोहोर हुनमा स्थानीय जनता दोषी रहेको उपमेयरले आरोप लगाएकी थिइन् ।

फोहोर फ्याल्ने ठाउँ नहुँदा व्यवस्थापनमा समस्या देखिएको उपमहानगरपालिकाको भनाइ छ । यसअघि फोहोर फ्यालिने गरिएको उपमहानगरपालिकाको बसविट्टीका स्थानीयवासीले अवरोध गरेपछि व्यवस्थापनमा समस्या भएको उपमहानगरले जनाएको छ ।

प्रकाशित मिति: मंगलबार, साउन ६, २०७७ १९:४९