१ सय २० दिनपछि सुनियाे ‘बानेश्वर–रत्नपार्क’

A+ A A-

झण्डै १ सय २० दिनपछि उपत्यकाका सडकमा एक छुट्टै किसिमको आवाज सुनियाे, 'यता आउनुस्, यता हाे बानेश्वर–रत्नपार्क ।

यो आवाज पुरानै आवाज भए पनि यस पटकको शैली छुट्टै छ । अन्य समयको जस्तो सहचालकको आवाज सुनेर तँछाड मछाड गर्ने न त ग्राहक नै देखिन्छन्, न त बसभित्र कोचाकोच यात्रु नै । बरु सडकको छेउमा बसेर गाडी गुडेको हेर्नेको चहलपहल भने निकै बाक्लै देखिन्छ ।

लाग्छ, पहिलो पटक नयाँ गाडी सडकमा गुड्दै छ । गुडिरहेका गाडिलाई सडकछेवैमा बसेका यात्रु अचम्मित र भयवित भएर नियाली रहेका हुन्छन् । कोही राहतको सास फेर्दै भन्दै छन्, ‘बल्ला गाडी चल्यो ।’ कोही शंकालु आँखाले चालक र सहचालकलाई हेर्दै मास्क चिउँडोमा राखेकाहरूलाई कराइरहेका हुन्छन् ।

सहचालक पनि आफ्नै पारामा चिउँडोमा मास्क राखेर ढुक्कसँग यात्रु बोलाउनमै ब्यस्त देखिन्छन् । नजिकैका ट्राफिक पनि जाम हटाउनमै ब्यस्त ।

कोटेश्वरको जाम छेल्दै छेउमा रोकेका गाडीमा चढ्नै लागेका एक यात्रीलाई खलासी परैबाट रोक्दै स्यानिटाइजर थमाइदिन्छन् । चिउँडाेमा मास्क राखेर विद्वान्झैँ स्यानिटाइजर दिएर गाडीमा यात्रु चढाउँछन् । चिउँडोेमा मास्क भिरेका खलासी मात्र नभएर डाइभरसमेतले मास्क चिउँडोमै सजाएका छन् ।

बसको ढोकैमा टाँसिएको थियो मास्क अनिवार्य लगाउनुहोला । त्यही छेउमा अडेस लाग्दै यात्रु बोलाइरहेका कन्डक्टर भने मास्कविहीन थिए ।

यो दृश्य हो मंगलबार बिहान १० बजे कोटेश्वर क्षेत्रकोे । असारदेखि फाट्टफुट्ट रूपमा देखिएका गाडी मंगबलारदेखि भने बाक्लै रूपमा देखिए । लामो समयदेखि कसरी सार्वजनिक सवारीसाधन संचालन गर्ने भन्नेमा अलमलमै रहेका व्यवसायीले सार्वजनिक सवारी चलाउन मानेसँगै सडकमा बाक्लै मात्रामा सार्वजनिक सवारीसाधन देखिएका हुन् ।

यातायात व्यवसायीले सार्वजनिक सवारी सञ्चालन बिहीबारदेखि ल्याउने तयारी भएसँगै चालक र सहचालकलाई पीपीई दिने, स्यानिटाइजर र मास्क वितरण गर्ने सम्झौता भएको छ । तर, संचालन गर्ने मितिभन्दा अगाडि नै सडकमा देखिएका सार्वजनिक सावरीसाधनमा न त ड्राइभरमा सुरक्षाको चेत देखिन्छ, न सहचालकमा नै ।

रत्नपार्कमा भेटिएका बालाजुका शिवराम श्रेष्ठले गाडी कुदाएकै १४ वर्ष भएछ । उनले यो अवधिसम्मै यतिका लामो बन्द कहिल्यै अनुभव नगरेको बताए । उनी पनि चिउँडोमै मास्क राखेर गाडीमा बसेका थिए । सहचालक र चालकको उस्तै अवस्था देखेपछि सोध्दा उनले उकुसमुकुस भएर एकछिन् मात्रै मास्क खोलेको बताए ।

उनले भने, ‘अब कोरोनाको डर नै लाग्न छाड्यो । कति दिन यसरी मुख थुन्ने ? म त फेरि सासै फेर्न सक्दिनँ यो मास्क लगाएपछि । नलाउँदा फेरि ट्राफिकले पक्रिने डर, नलाउँदा त्यसैले बेलाबेलामा लाउने खोल्ने गरिरहन्छु ।’

सवारी चलाउँदा महासंघले मास्क पञ्जा र स्यानिटाइजर अनिवार्य राख्न लगाएकाले राखे पनि त्यसको प्रयोग खासै यात्रुले पनि नगर्ने उनले बताए ।

यातायात व्यवसायी महासंघका सचिव सरोज सिटौलाले भने ८ गतेदेखि सबै सार्वजनिक सवारीसाधन सञ्चालन हुँदा आवश्यक सबै सुरक्षाका व्यवस्था अपनाएर मात्रै चलाइने बताए ।

उनले भने, ‘बिहीबारदेखि सुरक्षा अपनाएर नै चलाउने तयारीमा छौँ,’ सरकारले चालक र सहचालकको बीमा, कोरोना लागेर मृत्यु भएको खण्डमा क्षतिपूर्ति दिनका लागि छुट्टै कोष स्थापना गर्ने तथा पीपीई, पञ्जा, मास्क पनि चालक सहचालक दुवैलाई वितरण गरे सवारी निर्वाध रूपमा सञ्चालन गर्न सकिने बताए ।

सवारी संचालनका लागि समयसमयमा सरकारी पक्ष र संघको पक्षबाट पनि नियम पालना भए नभएको हेर्नका लागि अनुगमनसमेत गरिने सचिव सिटौलाको भनाइ छ ।

सार्वजनिक सावरीमा पालाना गर्नुपर्ने नियम
अनिवार्य रूपमा यात्रुलाई चढाउँदा स्यानिटाजर हातमा दिने ।
मास्कविहीन यात्रुलाई सवारीसाधनमा नचढाउने ।
२ वटा सिटमा एक जना मात्रै बस्न सक्ने गरी यात्रुको सिट रोकिने ।
चालक र सहचालकले पीपीई, मास्क, पञ्जा लगाएर मात्रै सावारी चलाउने ।

प्रकाशित मिति: मंगलबार, साउन ६, २०७७ १६:४६