सुदूरपश्चिममा त्रास : कतै बम, कतै आगजनी

A+ A A-

नेत्रविक्रम चन्द ‘विप्लव’ नेतृत्वको नेकपाले मंगलबार सुदूरपश्चिमसहित देशभर बन्दको आह्वान गरेको छ ।

धेरै ठाउँमा बन्दको खासै प्रभाव नपरेको समयमा सुदूरपश्चिम प्रदेशका विभिन्न ठाउँमा भने बम र आगजनीका घटना भएका छन् ।

४ स्थानमा राखिएका बम सेनाद्वारा निष्क्रिय

कैलालीका विभिन्न ४ स्थानमा शंंकास्पद वस्तु फेला परेका छन् । भौतिक पूर्वाधार विकास मन्त्रालय, सामाजिक विकास मन्त्रालय जाने बाटो, धनगढी बजारको एलएन चोक र लम्कीचुहा नगरपालिका कार्यालय अगाडि मंगलबार बिहान प्रसेसर कुकर बमजस्तै देखिने शंकास्पद वस्तु फेला परेको प्रहरीले जनाएको छ ।

कैलालीका प्रहरी नायव उपरीक्षक प्रतीक विष्टले विभिन्न ४ स्थानमा बमजस्तै देखिने शंकास्पद वस्तु फेला परेको बताए । उनले धनगढीमा फेला परेका शंकास्पद वस्तुलाई नेपाली सेनाको टोलीले डिस्पोज गरेको बताए ।

जिल्लाका विभिन्न स्थानमा भेटिएका शङ्कास्पद वस्तुमा विषयमा अनुसन्धान भइरहेको डीएसपी विष्टले बताए ।

प्रदेश राजधानीमै कसले राख्यो बम ?

सुदूरपश्चिम प्रदेशको भौतिक पूर्वाधार विकास मन्त्रालय, सामाजिक विकास मन्त्रालय जाने बाटो, धनगढी बजारको एलएन चोक र लम्की चुहा नगरपालिका कार्यालय अगाडि राखिएको बम कसले राखेको हो भन्ने विषयमा प्रहरीले अझैसम्म पुष्टि गर्न सकेको छैन । प्रदेश राजधानीमै बम भेटिएपछि यस क्षेत्रका स्थानीयमा त्रास बढेको छ ।

विप्लव नेतृत्वको नेकपा माओवादीले बन्द आह्वान गरेको हुँदा धेरैले सो पार्टीका कार्यकर्ताले नै बम राखेको आशङ्का गरेका छन् । अहिलेसम्म घटनामा संग्लनको पुष्टि नभए पनि प्रहरीले विप्लव समूहमाथि नै आशंका गरेको छ ।

‘बन्दको आह्वानसँगै विप्लव समूहले नै बम राखेको हुन सक्छ,’ डीएसपी विष्टले भने,’ ‘तर, अहिलेसम्म पुष्टि हुन सकेको छैन । अनुसन्धान जारी छ ।’

नगरपालिकाको गाडीमा आगजनी

कैलालीको घोडाघोडी नगरपालिकाको गाडीमा आगजनी गरिएको छ । नगरपालिकाको स्कारपियो गाडीमा रातिको समयमा अज्ञात समूहद्वारा आगजनी गरिएको हो ।

घरको कम्पाउण्डभित्र पार्किङ गरी राखिएको से १ झ २४१ नं को गाडीमा अज्ञात समूहद्वारा आगजनी गरिएको इलाका प्रहरी कार्यालय सुखडले जनाएको छ ।

उक्त गाडी उपप्रमुख प्रेम कुमारी थापाले प्रयोग गर्दै आइरहेकी थिइन् । आगलागीबाट गाडीको पछाडिपट्टिको भाग जलेको छ ।

के भन्छन् विप्लवका नेता ?

विप्लव नेतृत्वको नेकपाले भने अहिलेसम्म घटनाको जिम्मा लिएको छेन । आफ्ना नेता तथा कार्यकर्तालाई कृतिम मुद्दा बनाएर पक्राउ गरेको भन्दै नेकपाले सङ्घर्षका कार्यक्रम घोषणा गरेको छ ।

साउन ५ देखि ८ गतेसम्म विभिन्न सङ्घर्षका कार्यक्रम सार्वजनिक गरेको सो समूहले आज सुदूरपश्चिम बन्दको घोषणा गरेको थियो ।

विप्लव सेती-महाकाली ब्युरो सदस्य परीर्वतनले ५ गते रातिदेखि ८ गते मध्यरातसम्मका लागि सुदूरपश्चिममा सार्वजनिक यातायात बन्दको आह्वान गरिएको बताए । बजार क्षेत्र भने ६ गते साँझसम्म मात्रै बन्द रहने उनले बताए ।

कैलालीका विभिन्न स्थानमा बम फेला परेको विषयमा भने उनले अहिले आधिकारिक धारणा दिन नमिल्ने बताए ।

प्रकाशित मिति: मंगलबार, साउन ६, २०७७ १२:१५