अस्ट्रेलियाको विद्यार्थी भिसामा परिवर्तन

A+ A A-

अस्ट्रेलियाको सरकारले विद्यार्थी भिसामा सहजतासहित परिवर्तन गर्ने तयारी गरेको छ ।

कोरोना महामारीबाट माथि उठ्न लागेको अस्ट्रेलियाले अन्तर्राष्ट्रिय विद्यार्थी भिसामा परिवर्तन गर्ने तयारी गरेको हो ।

अस्ट्रेलियाका कार्यवाहक आप्रवास सम्बन्धिमन्त्री एलेन टड्ज र शिक्षा मन्त्री डेन ट्यनले संयुक्तरूपमा सोमबार अन्तर्राष्ट्रिय विद्यार्थीका लागि प्रमुख गन्तव्य कायम राखेर राख्न विद्यार्थी भिसामा विभिन्न ५ वटा परिवर्तन गर्ने घोषणा गरेका छन् ।

उनीहरूका अनुसार अस्ट्रेलिया सरकारले देश बाहिरका सबै स्थानबाट विद्यार्थीलाई भिसा दिने कार्य पुन: सुरु गर्ने भएको छ ।

अन्तर्राष्ट्रिय सीमा खुल्ने वित्तिकै विद्यार्थी अस्ट्रेलिया आउन पाउने भएका मन्त्री टड्जले बताएका छन् ।

अन्तर्राष्ट्रिय विद्यार्थीले कोभिड-१९ को कारण वर्तमान भिसा अवधि भित्र पढाइ पूरा गर्न नसकेको खण्डमा भिसा थप्न निःशुल्क भिसा आवेदन दिन पनि पाउने छन् ।

भिसा लिएर पनि कोभिड-१९ का कारण अस्ट्रेलिया बाहिरबाटै अनलाईनमार्फत् आफ्नो पढाई गरिरहेका विद्यार्थीले सो पढाईको अवधिलाई पढाईपछिको कामको भिसाका लागि उपयोग गर्न पाउने मन्त्री टड्जले जानकारी दिएका छन् ।

ग्राजुएट गरिससकेका तर अस्ट्रेलियाको विद्यार्थी भिसा लिएर पनि कोभिड-१९ कारण अस्ट्रेलिया आउन नपाएकाहरूले पढाईपछिको कामका लागि भिसाको आवेदन दिन सक्ने पनि उनले उल्लेख गरेका छन् ।

कोभिड-१९ कारण अंग्रेजी भाषा परिक्षाको परिणाम प्रभावित भएकाहरूको लागि अतिरिक्त समय दिने निर्णयसमेत गरिएको छ ।

अध्यागमन, नागरिकता, बसाईसराई सेवा तथा बहुसांस्कृतिक मामिला हेर्ने कार्यवाहक मन्त्री एलान टड्जले यी परिवर्तनहरूले कोभिड-१९ कारण अस्ट्रेलियामा रहेका तथा बाहिर रहेका अन्तर्राष्ट्रिय विद्यार्थीलाई विश्वस्त पार्ने धारणा व्यक्त गरेका छन् ।

कोरोना महामारीका कारण नेपालबाट १२ सय बढी विद्यार्थी अस्ट्रेलिया जाने प्रतिक्षामा छन् ।

प्रकाशित मिति: मंगलबार, साउन ६, २०७७ ०८:५६