नारायणकाजी, गुरुङ र मातृकाबाहेक अधिकांशले प्रचण्डलाई भने, ‘ओलीसँग मिल्नुको विकल्प छैन’

नारायणकाजी, गुरुङ र मातृकाबाहेक अधिकांशले प्रचण्डलाई भने, ‘ओलीसँग मिल्नुको विकल्प छैन’

A+ A A-

नेपाल कम्युनिस्ट पार्टी (नेकपा) का कार्यकारी अध्यक्ष पुष्पकमल दाहाल (प्रचण्ड) ले बोलाएको पूर्वमाओवादीनिकट स्थायी कमिटी भेलाले मंसिरमा महाधिवेशन नहुने निष्कर्ष निकाल्दै अर्का अध्यक्ष केपी शर्मा ओलीसँग मिलेर जानुपर्ने धारणा राखेका छन् ।

रामबहादुर थापा (बादल), जनार्दन शर्मा र लेखराज भट्ट उपस्थित नभएको पूर्वमाओवादीको स्थायी कमिटी बैठकमा बोल्ने अधिकांश स्थायी समिति सदस्यहरूले ओलीसँग मिलेर जानुपर्ने भन्दै प्रचण्डलाई सुझाव दिएका छन् ।

‘नेकपा एमाले र माओवादी केन्द्रबीचको पार्टी एकता दुई अध्यक्ष मिलेर भएको हो, दुई अध्यक्ष मिल्दा मात्रै पार्टी र सरकारको काम कारबाही अघि बढेको छ, नमिल्दा अप्ठ्यारो भएको छ,’ एक स्थायी समिति सदस्यले भने, ‘सबैको राय दुई अध्यक्ष मिल्नुको विकल्प छैन भन्ने नै थियो ।’

प्रचण्डले अन्तिम समझदारी ओलीसँगै गर्नुपर्ने भएकाले आफ्नो प्रयत्न त्यसतर्फ जारी रहेको बताएपछि अधिकांश नेताले प्रचण्डको भनाइमा समर्थन जनाएका थिए ।

उनका अनुसार सो बैठकमा नारायणकाजी श्रेष्ठ, देव गुरुङ र मातृका यादवबाहेक सबै स्थायी समिति सदस्यले ओली–प्रचण्ड मिल्न सुझाव दिएका थिए ।

ओली–प्रचण्डबीच मंसिरमा ‘अर्ली महाधिवेशन’ मा जाने सहमति भएपछि मुख्यतः वरिष्ठ नेताद्वय झलनाथ खनाल र माधवकुमार नेपाललगायतले आपत्ति जनाउँदै प्रचण्डमाथि दबाब बढाएपछि उनले सोमबार बिहान पूर्वमाओवादीका नेताहरूलाई निवासमा बोलाएर राय लिएका हुन् ।

मंसिरमा हुने ‘अर्ली महाधिवेशन’ मा जाने निर्णय गरेमा एक्लै भए पनि ‘नोट अफ डिसेन्ट’ लेख्ने चेतावनी नेपालले दिएपछि २ साउनका लागि बोलाईएको स्थायी कमिटी समिति बैठक स्थगित गरिएको थियो । जुन बैठक ६ साउनमा बोलाइएको छ ।

प्रचण्ड–नेपाल समूहले प्रधानमन्त्री ओलीले दुबै पदबाट रानीनामा दिनुपर्ने अडान राख्दै १६ मंसिरदेखि दबाब बढाए पनि गत शनिबारको सचिवालय बैठकमा प्रचण्ड ‘यु–टर्न’ हुँदै ओलीको राजीनामा माग गर्ने पूर्ववत् अडानबाट पछि हटेर ‘अर्ली महाधिवेशन’ मा सहमत भएका थिए ।

सो विषयमा मुख्यतः खनाल–नेपालले आपत्ति जनाउँदै प्रचण्डलाई जबजलाई महाधिवेशनको एजेन्डा बनाएर जाने चेतावनी आइतबार बिहान दिएपछि सोमबार पूर्वमाओवादीका स्थायी कमिटी बैठक बोलाइएको हो ।

‘तपाईंहरू अर्ली महाधिवेशनमा जाने भए वैचारिक विषय खुल्ला राख्नुहोस, म जबजलाई लिएर महाधिवेशनमा जानेछु,’ नेपालको प्रचण्डमाथि चेतावनी थियो । उक्त चेतावनीपछि प्रचण्ड झस्किन पुगेको खुमलटार पुगेका एक स्थायी समिति सदस्यले शिलापत्रसँग भने ।

त्यसो त खुमलटारस्थित प्रचण्ड निवासमा बसेको पूर्वमाओवादीका स्थायी कमिटी सदस्यहरूको सामूहिक भेलाले मंसिरमा महाधिवेशन नहुने निष्कर्ष निकालेको स्थायी कमिटी सदस्य लीलामणि पोखरेलले जानकारी दिए ।

‘आजको भेलाले अर्ली महाधिवेशन, राष्ट्रपतिको भूमिकादेखि पार्टीको गतिरोधसम्मका बारेमा छलफल भयो,’ पोखरेलले शिलापत्रसँग भने, ‘मुख्यतः भेलाले मंसिरमा महाधिवेशन हुन नसक्ने निष्कर्ष निकालेको छ ।’

उनका अनुसार प्रावधिक, वैचारिक, सांगठनिक रूपमा ५ महिनाभित्र महाधिवेशन गर्न नसकिने भन्दै केन्द्रीय समितिले निर्णय गरेअनुसार नै चैत मसान्तभित्र महाधिवेशन गर्ने तयारी गर्न सुझाव दिएका छन् ।

प्रकाशित मिति: सोमबार, साउन ५, २०७७ १४:०५