अध्यक्ष र उपाध्यक्षको झगडाले गाउँपालिकावासीलाई सास्ती

A+ A A-

पर्साको पकाहामैनपुर गाउँपालिकाका अध्यक्ष र उपाध्यक्षबीचको विवादले सेवा प्रवाह प्रभावित भएको छ । भनाभनदेखि कार्यालय तालाबन्दीसम्मको लफडाको घाटा गाउँपालिकावासी बेहोर्नुपरेको छ ।

गाउँपालिका उपाध्यक्ष कुश्मी देवीको नेतृत्वमा स्थानीयले आइतबार गाउँपालिका कार्यालयमा तालाबन्दी गरेका छन् । गाउँपरिषद् गराउन अध्यक्ष विजय चौरसियाले मोबाइल बाँडेको आरोप उनले लगाएकी छन् ।

चौरसियाले गाउँपालिकाको बजेट हिनामिना गरेको आरोप लगाउँदै उपाध्यक्षको नेतृत्वमा गाउँपालिका कार्यालयमा तालाबन्दी गरिएको हो ।

जुलुससहित गाउँपालिका कार्यालयमा पुगेका उनीहरूले तालाबन्दी गर्न खोज्दा प्रहरीले हस्तक्षेप गरेको थियो ।

गाउँपालिकाको आयव्यय विवरणसमेत सार्वजनिक नगरी गाउँपालिका अध्यक्ष चौरसियाले गाउँपरिषद् गरेकाले ३१ असारमा भएको गाउँपरिषद् आफूले बहिष्कार उपाध्यक्ष कुश्मी देवीले बताइन् ।

गत आर्थिक वर्ष २०७६/०७७ मा इन्धनमा खर्च गरिएको ३० लाख, गाउँपालिकाको एम्बुलेन्स, जेसीबी र ठेक्कामा लागेको २ वटा पोखरीको आम्दानी पनि अध्यक्ष चौरसियाले सार्वजनिक नगरी हिनामिना गरेको उपाध्यक्ष कुश्मी र स्थानीयको आरोप छ ।

कोभिड– १९ रोकथाम तथा नियन्त्रणका लागि विनियोजन गरिएको ९० लाखमध्ये ४० लाख मात्र खर्च भएको बाँकी ५० लाख अध्यक्ष चौरसियाले हिनामिना गरेको उनीहरूको आरोप छ ।

कार्यपालिका बोर्ड बैठकमा जाँदा उपाध्यक्ष कुश्माको कुर्सीसमेत अध्यक्ष चौरसीयाले हटाइदिने गरेको बताइएको छ । ‘गाउँपालिकाको आम्दानी सार्वजनिक गर्न पटकपटक आग्रह गरेँ, तर उनले मेरो कुरा सुन्दै सुनेनन्’, कुश्मी देवीले भनिन् ‘बोर्ड बैठकमा जाँदा मेरो कुर्सी नै फ्याँकिदिए, बोर्ड सदस्यलाई मोबाइल बाँडेर गाउँपरिषद् गराए ।’

गाउँपालिकाको आयव्यय विवरण जनताका बीचमा सार्वजनिक नगरिएसम्म तालाबन्दी जारी नै रहने उनले बताइन् । गाउँपालिका अध्यक्ष चौरसियाले पैसाको बलमा गाउँपालिका चलाएको पकाहामैनपुर गाउँपालिका–१, धोरेका युवा शिवजी सोनीले बताए ।

उनले भने, ’गाउँपालिकामा अध्यक्ष चौरसियाको ब्रम्हलुट छ , जति पनि सडक, नालाको काम भएको छ, त्यो सबैको ठेक्का उनका भाइ, भतिजा र भान्जाले लिने गरेका छन्’, जनताले सूचना माग्दा धम्क्याएर पठाइन्छ ।’

सूचनाको हक प्रयोग गरेर बजेट खर्चको हिसाब माग्दा पनि नपाएपछि बाध्य भएर गाउँपालिकामा तालाबन्दी गरिएको सोनीले बताए ।

पकाहा मैनपुर–४ का रामबाबु चौरसियाले भने, ‘जिल्लामै सबैभन्दा बढी भ्रष्टाचार हाम्रै गाउँपालिकामा भएको छ, यहाँका जनप्रतिनिधि जनताका लागि होइन, आफ्नो सम्पत्ति जोड्नमा लागेका छन्, यिनीहरू गाउँमा सिंह बनेका छन् ।’

यता, अध्यक्ष चौरसियाले भने आफ्नो चरित्रहत्या गर्न गाउँपालिका उपाध्यक्षले जनतालाई उचालेको बताए । २९ सदस्यीय कार्यपालिकामा उपाध्यक्ष १ जनाबाहेक अरु २८ जना सबैको सहभागितामा गाउँपरिषद सम्पन्न भएको उनको भनाइ छ ।

प्रकाशित मिति: सोमबार, साउन ५, २०७७ १०:४८