रामको जन्मभूमि विवाद : सीता गुफा नजिकको सीमा स्तम्भ उखेलेर फालियो

A+ A A-

पर्साको ठोरीस्थित सोमेश्वर पहाडमा रहेको ४३६ नम्बरको सीमा स्तम्भ उखेलेर फालिएको अवस्थामा फेला परेको छ ।

प्रसिद्ध धार्मिकस्थल सीता गुफादेखि दक्षिणतर्फ सोमेश्वर पहाडमा रहेको सो सीमा स्तम्भ उखेलेर फालिएको अवस्थामा फेला परेको सशस्त्र प्रहरी बोर्डर आउट पोष्ट ठोरीका प्रहरी निरीक्षक दीपक दाहालले जानकारी दिए ।

ठोरीवासीले शनिबार बिहान सीता गुफा क्षेत्रमा पूजापाठ गरेका थिए । अमृतधाराबाट जल भरेर स्थानीयले कलश यात्रासमेत गरेका थिए । प्रधानमन्त्री केपी शर्मा ओलीले भगवान् रामको जन्म ठोरीमा भएको अभिव्यक्ति दिएसँगै सो क्षेत्रमा मानिसहरूको चहलपहल बढ्दै गएको छ ।

शनिबार गाउँपालिकाले कलश यात्रा अयोजना गर्दै भव्य पूजाअर्चना गरेको थियो । शनिबार मध्यान्ह १२ बजेसम्म सीमा स्तम्भ सुरक्षित नै थियो । भारतीय सीमा सुरक्षाबल (एसएसबी)का इन्सपेक्टरसमेत सो क्षेत्रमा खटिएका थिए ।

पूजापाठ सकिएपछि सबैजना आआफ्नो घर गइसकेपछि मात्रै दुवै तर्फका सुरक्षाकर्मी क्याम्पमा फर्किएका थिए । तर, शनिबार अपरान्ह एकाएक सीमा स्तम्भ उखेलेर फालेको अवस्थामा पाएको स्थानीयले बताएका छन् ।

बिहान पूजापाठ हुँदासम्म सीमा स्तम्भ देखिएको तर अपरान्ह एकाएक नदेखेको ठोरी गाउँपालिकाका अध्यक्ष पदमलाल श्रेष्ठले बताए ।

उनले भने, ‘हामी बिहानैदेखि पूजापाठमा व्यस्त थियौँ । सो समयमा सीमा स्तम्भ सुरक्षितरूपमा नै देखेका थियौँ । पूजापाठ सकेर सबै जना फर्किएपछि सीमा स्तम्भ नरहेको खबर पाएँ ।’
अध्यक्ष श्रेष्ठले अयोध्या भूमिको रुपमा एकाएक चुलिएको चर्चालाई मत्थर पार्न सीमा स्तम्भ उखेल्ने काम भएको हुन सक्ने बताए ।

‘सीमा स्तम्भ पनि गहिरो गरी गाडिएको रहेन छ । गाडिएको स्थानभन्दा केही मिटर टाढा सीमा स्तम्भ फेला पारेका छौँ’, प्रहरी निरीक्षक दाहालले भने, ‘सीमा स्तम्भ उखेलिएकोबारे माथिल्लो निकायमा जानकारी गराइसकेका छौँ । भारततर्फका एसएसबी बल र हाम्रो टोलीले उखेलेर फालिएको अवस्थामा फेला परेको सीमा स्तम्भको सुरक्षा गरिरहेका छौँ ।’