डडेल्धुरा र बैतडीमा पुनः देखियो सलह, स्थानीय चिन्तित

A+ A A-

डडेल्धुरा र बैतडीका विभिन्न ठाउँमा पुनः सलह कीरा देखिएको छ । डडेल्धुराको अजयमेरु गाउँपालिका र परशुराम नगरपालिका तथा बैतडीको पाटनमा सलह देखिएको हो ।

ठूलो हुलमा रहेको सलह देखिएसँगै किसान चिन्तित बनेका छन् । गत वर्षसम्म जगंली बदेलले मकै, भट्मासका साथै धानबालीसमेत क्षति पुर्‍याउने समस्याले हैरान बनेका किसान यस वर्ष सलहले खेतबारी नष्ट गर्ने भन्दै चिन्तित बनेका हुन् ।

भागेश्वर गाउँपालिकामा कृषिबालीमा क्षति पुर्‍याइ अनिकाल निम्त्याउने सलह (डेजर्ट लोकस्ट) फट्याङग्राको झुण्ड देखापरेको छ । भागेश्वर गाउँपालिकाको–३ बोगटा, खालमा सलह देखिएको स्थानीयले बताएका छन् ।

किसानले ठूलै झुण्डमा सलह आएको बताएपछि गाउँपालिकाले आफूलाई त्यसबारे कुनै जानकारी नभएको बताएको छ । गाउँपालिकाको कृषि शाखाका प्राविधिक सहायक दान विष्टले गाउँपालिकाभित्र सलह प्रवेश गरेको जानकारी नभएको बताएका छन् ।

डडेल्धुरा भित्री मधेसमा सलह यसै वर्ष दोस्रोपटक देखिएको हो । अजयमेरु १ मुद्रडामा पहिलोपटक सलह देखिएको छ । खेतीबालीका लागि निकै हानिकारक र खतरनाक मानिएको सलह कीरा जिल्लाका विभिन्न क्षेत्रमा रहेका मकैबालीमा देखिन थालेपछि कृषक किराको रोकथाम तथा बाली बचाउने उपायका लागि स्थानीय तहलाई गुहार्न थालेका छन् ।

ठूलो संख्यामा सलह देखिएको परशुरामका सादनीका स्थानीय किसान कालुसिंह साउँदले जानकारी दिए । स्थानीयले होहल्ला गर्दा र बाजा बजाउँदासमेत सलह टसमस नहुने र सलह भगाउन सारै गाह्रो भइरहेको साउदको भनाइ छ । यसअघि परशुराम नगरपालिका–४ कटालमा सलह देखिएको थियो ।

सलह आएको खबर पाएको र ठूलो आवाज गरेर भगाउने सल्लाह दिएको परशुराम नगरपालिकाको कृषि शाखाका प्राविधिक सहायक कालुसिंह बोहराले बताए । भारतबाट आएको अनुमान गरिएका ती कीराले बालीमा खासै नोक्सान नगरेको भए पनि सलह भगाउने उपाय नगर्ने हो भने बाली जोगाउँन समेत मुस्किल पर्ने अजयमेरु–१ का किसान तेजबहादुर भण्डारीले बताए ।

आफूहरूले शनिबार बिहानदेखि नै सबै गाउँले मिली भगाउने प्रयास गरिरहेको उनले जानकारी दिए । अजयमेरु–१ मा देखिएको कीरा सलह नै भएको अमरगढी नगरपालिकामा कार्यरत कृषि प्राविधिक तथा मुद्राडका स्थानीय रमेश भण्डारीले जानकारी दिए । सलह शनिबार बिहानसम्म रूखमा बसिरहेका छन् ।

कीरा बिस्तारै बालीतिर पनि आउन सक्ने उनले जनाए । परशुराममा भने सलहको झुण्डले मकै बालीमा क्षति पुर्‍याएको जनाएका छन् । मुद्राडमा पनि सलहको झुण्ड मकैबालीतिर गइरहेकाले किसानलाई क्षति पुग्ने प्राविधिकको भनाइ छ । बैतडीको पाटनमा पनि ठूलो संख्यामा सलह कीरा देखिएको स्थानीय हेमन्त बोहोराले जानकारी दिए ।

प्रकाशित मिति: शनिबार, साउन ३, २०७७ १७:३८