हलमा नआउने भो नरेन्द्र मोदीको सिनेमा

A+ A A-

भारतीय निर्वाचन आयोगले प्रधानमन्त्री नरेन्द्र मोदीको जीवनीमाथि बनेको सिनेमा प्रदर्शनमा रोक लगाएको छ । मंगलबार मात्र भारतको सर्वोच्च अदालतले मोदीको जीवनीमाथि बनेको सिनेमा प्रदर्शनमा रोक लगाउन दायर भएको याचिका खारेज गरेको थियो ।

‘पीएम नरेन्द्र मोदी’ नामक सिनेमा प्रदर्शनले चुनाव प्रभावित हुन सक्ने भन्दै सिनेमा प्रदर्शन रोक्न माग गर्दै अदालतमा याचिका दायर भएको थियो । भारतको सर्वोच्च अदालतले चुनावको बेला सिनेमा प्रदर्शन गर्न दिने कि नदिने निर्णय गर्ने निकाय निर्वाचन आयोग भएको भन्दै याचिका खारेर गरिदिएको थियो ।

सर्वाेच्च अदालतबाट याचिका खारेज भएपछि सिनेमा निर्माताले आफूलाई न्याय भएको भन्दै खुसी जाहेर गरेका थिए । तर, मंगलबार सर्वोच्च अदालतबाट याचिका खारेज भएको दुई दिनपछि भारतीय निर्वाचन आयोगले ‘पीएम नरेन्द्र मोदी’ सिनेमा प्रदर्शनमा रोक लगाएको हो । मतदान नसकिँदासम्म ‘पीएम नरेन्द्र मोदी’ प्रदर्शनमा रोक लागेको छ ।

‘पीएम नरेन्द्र मोदी’ मा भारतीय प्रधानमन्त्री नरेन्द्र मोदीको भूमिका अभिनेता विवेक ओवरोयले गरेका छन् । विपक्षी दलहरूले मोदीको जीवनीमाथि बनेको चलचित्रको प्रदर्शनमा निर्वाचन आयोगले रोक लगाउने सम्भावनाप्रति आशंका व्यक्त गरेका थिए ।

भारतमा ११ अप्रिलमा सुरु हुने मतदान विभिन्न चरणपछि १९ मेमा समाप्त हुनेछ । अब १९ मेपछि मात्र ‘पीएम नरेन्द्र मोदी’ प्रदर्शनमा आउन सक्नेछ । विपक्षीले ‘पीएम नरेन्द्र मोदी’ मतदानलाई प्रभाव पार्न बनाइएको प्रोपोगान्डा भएको आरोप लगाउँदै आएका थिए ।