सुदूरपश्चिममा बढ्दो लापरबाहीः भारतबाट आउने सिधै घरमा

A+ A A-

सुदूरपश्चिम प्रदेशमा कोरोना संक्रमित हुनेको संख्या ४ हजारको हाराहारी पुगेको छ ।

१४ चैत्रमा पहिलो पटक सुदूरपश्चिममा एक जनामा संक्रमण देखिएकोमा ४ महिनाको अवधिमा संक्रमितको संख्या ४ हजारको हाराहारीमा पुगेका छन् ।

प्रदेशका पछिल्लो समय परीक्षणको दायरा बढेसँगै संक्रमितको संख्या पनि बढेको हो ।

भारतबाट आउने क्रम जारी

कैलालीको त्रिनगर नाका हुँदै भारतबाट दैनिक ७ सयको हाराहारीमा नागरिकहरू आइरहेका छन् ।

केही दिन अघि १ डेढ सयको हाराहारीमा मात्रै नागरिक आइरहेकोमा यो क्रम क्रमशः बढ्दै गइरहेको जिल्ला प्रशासन कार्यालय कैलालीका सूचना अधिकारी शिवराज जोशीले बताए ।

त्रिनगर नाकाबाट मात्रै हैन प्रदेशका अन्य नाका गड्डाचौकी, धार्चुला र झुलाघाट नाकाबाट पनि दैनिक जसो नेपालीहरु स्वदेश फर्किरहेका छन् । भारतबाट लक डाउन अवधिमै करिब २ लाखको हाराहारीमा नागरिक सुदूरपश्चिम प्रदेश हुँदै नेपाल भित्रिएका थिए ।

रित्याइँदै क्वारेन्टाइन

एक महिनाअघि मात्रै ६६ हजार बढी नागरिक सुदूरपश्चिमका क्वारेन्टिाइनमा थिए । तर त्यो संख्या अहिले ह्वात्तै घटेको छ । क्वारेन्टाइनमा रहेकाहरूलाई कसैलाई १४ दिन पुग्ने बित्तिकै परीक्षणबिनै घर पठाइयो भने कसैलाई आरडीटी परीक्षणकै भरमा ७÷८ दिनमै घर पठाइयो ।

अहिले क्वारेन्टाइनमा ५ हजारको हाराहारीमा मात्रै नागरिक क्वारेन्टाइनमा रहेको प्रदेश स्वास्थ्य निर्देशक डा.गुणराज अवस्थीले बताए । क्वारेन्टाइन रित्तिने क्रम बढ्दै गइरहेको उनले बताए ।

अब क्वारेन्टाइनमा नबसाइने

भारतबाट आएर सात दिन धनगढी ३ बोराडाँडीको क्वारेन्टाइनमा बिताएका धनगढी चटकपुरका मुकेश शाहीलगायतका ५ जनालाई बिहीबार क्वारेन्टाइनको अवधि नपुग्दै ७ दिनमै परीक्षण बिनै घर पठाइयो ।

घर जाँदै गर्दा उनले भने, ‘हाम्रो आरडीटी परीक्षणमात्रै भयो, पीसीआर परीक्षण गर्न माग ग¥यौं भएन । हामीले बरु केही दिन अझ क्वारेन्टाइनमा बस्छौ । तर पीसीआर परीक्षण गरेर मात्रै पठाउन भन्यौं, तर एक सातामै घर जानु प¥यो ।’

स्वास्थ्य परीक्षण गरेर घर पठाएको भए निर्धक्कसँग घर जान सकिने अवस्था भएपनि त्यस्तो नहुँदा निकै डर लागिरहेको उनको भनाई छ ।

उनीसँगै घर फर्किरहेका धनगढी बोराडाँडीका नारद धामीले आफूहरूको स्वास्थ्य परीक्षण नहुँदा मनमा डर लागिरहेको गुनासो गरे ।

वडा नम्बर ३ मा रहेको त्रिनगर विद्यालयको क्वारेन्टाइनमा १ सय ३७ जना रहेकोमा बुधवार बाँकी रहेका ५ जनालाई घर पठाइएको छ । अन्यलाई यस अघि नै घर पठाइसकिएको थियो ।

योसँगै अब क्वारेन्टाइन खाली भएको छ । अब आउने नागरिकलाई होम क्वारेन्टिाइनमा राखिने वडा नम्बर ३ का वडा अध्यक्ष बल बहादुर ऐरले बताए ।

संक्रमित फेला पर्ने क्रम पनि घट्दै गइरहेको छ । तर स्थिति केही सहज बनिरहेको अवस्थामा यहाँका स्थानिय तह भने अब आउने नागरिकलाई क्वारेनटाइनमा राख्न नसकिने भन्दै फेरि असहज स्थिति सिर्जना गर्न खोजिरहेका छन् ।

कैलालीको गौरीगंगा नगरपालिकाका मेयर भीमबहादुर देउवाले भने, ‘अहिले क्वारेन्टाइनमा रहेकालाई प्रक्रिया पु¥याएर घर पठाउने काम भइरहेको छ, हुन त भारतबाट नागरिकहरू त आइनैरहेका छन् । तर अब आउनेहरूलाई क्वारेन्टाइनमा राख्न सक्ने अवस्था छैन ।’

उनले थपे, ‘अब विद्यालय पनि खोल्ने तयारीमा छौं, त्यसैले विद्यालयमा रहेका क्वारेन्टाइनहरु खाली गराइरहेका हौ, अब भारतबाट आउनेहरूलाई होम क्वारेन्टाइनमा बस्न भनेका छौं ।’

समुदायमा संक्रमण फैलिने खतरा

सुदूरपश्चिममाका क्वारेनटाइनमा रहेका नागरिकहरूलाई धमाधम घर पठाउन थालिएको छ । १४ दिन क्वारेन्टाइनको अवधि तोकिएको भए पनि स्वास्थ्य परीक्षण बिनै ७÷८ दिनको अवधिमै नागरिकहरूलाई घर पठाइँदै छ ।

क्वारेन्टाइन खाली बनाएर अब आउने नागरिकहरूलाई सिधै घर पठाउने तयारीमा स्थानीय तहहरु छन् । जसले गर्दा कोरोनाको संक्रमण भयावह बन्ने खतरा बढेको छ ।

धनगढी उपमहानगरपालिकाले मात्रै हैन प्रदेशका सबैजसो स्थानीय तहहरुले क्वारेन्टिाइन खाली गर्न थालेका छन् । प्रदेश स्वास्थ्य निर्देशक डा.गुणराज अवस्थीले क्वारेन्टाइन खाली गर्ने विषयमा आफूहरूसँगै कुनै सल्लाह नभएको बताए ।

अब भारत वा अन्य देशबाट आउने स्थानीयहरूलाई सम्बन्धित स्थानीय तहकै क्वारेन्टाइनमा राख्न उनले आग्रह गरे । संक्रमण दर घट्दै गइरहेको अवस्थामा स्थानीयहतहरुमा भइरहेको यो लापरबाहीले ठूलो जोखिम निम्ताउन सक्ने खतरा बढाएको छ ।

उनले भने, ‘भारतबाट नागरिक आउने क्रम क्रमशः बढ्दै गइरहेको अवस्थामा चाल्न लागेको स्थानीय तहको यो कदम उचित छैन, यसले निम्त्याउने जोखिमको भागेदार को हुन् ?’

उनले थपे, ‘अब क्वारेन्टाइनमा नबसाउनु भनेको जोखिम फैलाइनु हो । यस्तो काम कसैबाट हुनुहुँदैन । प्रदेशका ८८ वटै स्थानीय तहहरुले सम्बन्धित क्वारेन्टाइनमा नागरिकहरूलाई मापदण्ड अनुसार राख्नु पर्दछ ।’

प्रकाशित मिति: बिहीबार, साउन १, २०७७ १४:०५