डीपीआरमै सीमित हाइटेक नर्सरी, ६ करोड बजेट फ्रिज

A+ A A-

बागमती प्रदेश सरकारले निर्माण गर्ने भनेको अत्याधुनिक हाइटेक नर्सरी निर्माणको प्रक्रिया डीपीआरमै सीमित बनेको छ ।

काठमाडौंको चाल्नाखेल र मकवानपुरको राप्ती खोला किनारमा निर्माण गर्ने भनिएको हाइटेक नर्सरी निर्माणका लागि छुट्याइएको ६ करोड बजेट फ्रिज भएको छ ।

चालू आर्थिक वर्षमा नर्सरी निर्माण गरिसक्ने लक्ष्य राखेको मन्त्रालयले डीपीआर तयार गर्ने भन्दा बढी काम गर्न सकेन । नर्सरी निर्माणमा लकडाउन बाधक बनेको मन्त्रालयको दाबी छ ।

समयमै हाइटेक नर्सरी स्थापना नुहँदा प्रदेशका कृषकले आवश्यक बिरुवा पाउनबाट वञ्चित हुनुपरेको छ । नर्सरीमा प्लास्टिकको घरभित्र आवश्यक तापक्रममा बेर्ना उत्पादन गरिने भएकाले जुनसुकै मौसममा पनि फलफूल तथा तरकारीका बेर्ना कृषकले पाउने थिए ।

प्रदेश सरकारले हाइटेक नर्सरीमा उत्पादन भएका बेर्ना किसानलाई सहुलियतमा उपलब्ध गराउने जनाएको छ ।

कोरोना महामारीको रोकथाम र नियन्त्रण गर्न सरकारले ११ चैतदेखि गरेको लकडाउनको कारण नर्सरी निर्माणको काम हुन नसकेको प्रदेशको उद्योग पर्यटन वन तथा वातावरण मन्त्रालयले जनाएको छ ।

मन्त्रालयले चैत अगाडि नै हाइटेक नर्सरी निर्माणका लागि टेण्डर आह्वान गरेको थियो । लकडाउन खुकुलो हुने पर्खाइमा टेण्डरको म्याद पटक–पटकको थप गरेको मन्त्रालयले अन्ततः टेण्डर स्थगित नै गरेको छ ।

‘चालू आर्थिक वर्षभित्र हाइटेक नर्सरी निर्माण गरिसक्ने मन्त्रालयको लक्ष्य पूरा हुन सकेन । यसै वर्ष उच्चतम प्रविधिको हाइटेक नर्सरी स्थापना गर्ने योजना मन्त्रालयको थियो । तर, लकडाउनका कारण निर्माण पूरा हुन सकेन,’ मन्त्रालयका प्रवक्ता निरञ्जन श्रेष्ठले भने, ‘आगामी आर्थिक वर्षभित्र नर्सरी निर्माण भइसक्छ ।’

चालू आवमा निर्माण गर्न नसके पनि मन्त्रालयले हाइटेक नर्सरी निर्माणलाई निरन्तरता दिएको छ ।

आगामी आर्थिक वर्षभित्र सम्पन्न गर्ने गरी कुल ६ करोड बजेट विनियोजन गरिएको मन्त्रालयका प्रवक्ता श्रेष्ठले जानकारी दिए । मन्त्रालयले हाइटेक नर्सरीको डीपीआर तयार गरिसकेको प्रवक्ता श्रेष्ठले बताए ।

मकवानपुर र काठमाडौंमा निर्माण हुने भनिएको हाइटेक नर्सरीको लागि मन्त्रालयले ३–३ करोड बजेट छुट्याएको थियो ।

मन्त्रालयले आगामी आर्थिक वर्षको पहिलो चौमासिकअगावै हाइटेन नर्सरी निर्माणको टेण्डर आह्वान गर्ने प्रवक्ता श्रेष्ठले जानकारी दिए । ‘डीपीआर तयार भइसक्यो । अब टेण्डर आह्वान गरेर छिटो निर्माण गर्छौं,’ श्रेष्ठ भन्छन् ।

हाइटेक नर्सरीमा फलफूल र जडीबुटीका बिरुवा उत्पादन गरिने मन्त्रालयका प्रवक्ता श्रेष्ठले जानकारी दिए । नर्सरीमा ग्रीन हाउस, वार्टर सप्लाईलगायतका थुप्रै संरचना निर्माण गरिने उनले बताए ।

श्रेष्ठले प्रदेशका सबै जिल्लाका कृषकका लागि आवश्यक बिरुवा हाइटेक नर्सरीबाट उत्पादन गर्ने र आवश्यकताअनुसार प्रदेशका जिल्लाहरूमा वितरण गरिने बताए ।

प्रकाशित मिति: बुधबार, असार ३१, २०७७ १७:२१