'राजनीति गर्न र फोटो झुण्ड्याउन महासंघको नेतृत्वमा आएको होइन'

A+ A A-

नेपाल उद्योग वाणिज्य महासंघका वरिष्ठ उपाध्यक्ष शेखर गोल्छाले राजनीति गर्न र फोटो झुण्ड्याउन मात्र महासंघको नेतृत्वमा नआएको बताएका छन् ।

महासंघको चुनावका लागि किशोर प्रधान समूहको उम्मेदवारी घोषणा समारोहमा बोल्दै वरिष्ठ उपाध्यक्ष गोल्छाले आफू राजनीति गर्न र फोटो झुण्ड्याउन नभई काम गर्न महासंघको नेतृत्वमा आएको बताएका हुन् । गोल्छाले महासंघ आफ्नो पुर्खा, पूर्वअध्यक्षहरू र सबै पदाधिकारीहरूको रगत पसिनाबाट बनेकाले त्यसलाई अझ बलियो बनाउन आफूले काम गर्ने प्रस्ट पारे ।

‘मेरो नीति स्पस्ट छ । यसका लागि मलाई टिम चाहिन्छ । साथीहरूलाई विनम्र अनुरोध गर्छु– राजनीति गर्नका लागि, फोटो झुण्ड्याउनका लागि म यहाँ आएको होइन । म केही काम गर्नका लागि आएको छु । यो संगठन जसमा मेरो बाउबाजेको रगतपसिना छ, पूर्वअध्यक्षहरूको रगतपसिना छ, मेरा दाइहरूको रगतपसिना छ र सबै पदाधिकारीहरूको रगतपसिना छ,' उनले भने, 'यो संगठनलाई म अझ बलियो बनाउनका लागि आएको हुँ । फोटो झुण्ड्याउनका लागि आएको होइन है साथीहरू !’

अहिले पनि केही व्यक्तिहरूले ६ महिनामा अविश्वासको प्रस्ताव ल्याएर हटाउने चेनावनी दिइरहेकाले महासंघभित्र भइरहेको गतिविधिमा सचेत हुनुपर्ने अवस्था आएको गोल्छाले बताए । उनले राम्रो काम गर्नका लागि बलियो टिम आवश्यक रहेकाले सबै मिलेर मात्रै महासंघलाई बलियो बनाउनुपर्नेमा जोड दिए । उनले कोभिड– १९ ले असर पारेको अर्थतन्त्रलाई माथि उकास्न आफ्नो टिमलाई चुनौती रहेको समेत बताए ।

‘यस्तो समयमा म अध्यक्ष बन्दै छु । हाम्रो अर्थतन्त्रमा शायद योभन्दा ठूलो गम्भीर घडी पहिला कहिल्यै पनि थिएन । हाम्रो अर्थतन्त्र यति कमजोर कहिले पनि थिएन । म अब देशको वाणिज्य महासंघ जुन नेपालको निजीक्षेत्रको छाता संगठन हो र नेपालको निजीक्षेत्रको एक मात्र आस्थाको केन्द्र हो र मैले के गर्ने भनेर मेरो बाटो खुलस्त छ,' उनले भने, 'मैले उद्योग वाणिज्य महासंघमा सबैभन्दा पहिला यो अर्थतन्त्रमा कोभिड-१९ ले पारेको असर छ त्यो असरलाई निर्मूल गरेर अर्थतन्त्रलाई फेरि चलायमान गर्नुपर्ने मेरो बाटो प्रष्ट रूपमा मैले देखेको छु ।’

महासंघको नेतृत्वमा गएपछि के काम गर्ने भन्ने विषयमा आफूले गृहकार्य गरिरहेको र छिट्टै रोडम्याप बनाई सार्वजनिक गर्ने बताए । उनले नयाँ मार्गदर्शन तयार गरेर सबैलाई साथ लिएर अगाडि बढ्ने प्रतिवद्धतासमेत जनाए । महासंघभित्र काम गर्न गाह्रो भएको र आफू अध्यक्षको रूपमा निजीक्षेत्रको बाटो तय गर्नुपर्ने भएकाले बलियो टिमको आवश्यकता रहेको बताए ।

प्रकाशित मिति: बुधबार, असार ३१, २०७७ १३:३६