कति संक्रमित भएपछि विकसित हुन्छ ‘इम्युनिटी पावर’ ?

A+ A A-

कोरोना भाइरसको बढ्दो संक्रमण विश्वका लागि चिन्ताको विषय बनिरहेको छ । हरेक दिन कोरोनाबाट मृत्यु हुनेको तथ्यांक पनि बढिरहेको छ ।

हालै गरिएको एक अध्ययनमा कोरोना संक्रमणको दर बढिरहे पनि यसको शक्ति कमजोर हुँदै गएको र खोप आविष्कारका लागि उपयुक्त समय भएको देखिएको छ ।

कोरोना संक्रमण रोक्नका लागि विश्वमा विभिन्न उपायहरू अवलम्बन गरिएको छ । गत मार्चबाट कोरोना नियन्त्रणका लागि ‘हर्ड इम्युनिटी’ पावरबारे चर्चा भइरहेको छ ।

तर, इम्युनिटीबाट कोरोना नियन्त्रणमा लिनका लागि ६० देखि ७० प्रतिशतसम्म संक्रमित हुन आवश्यक रहेको बताइएको थियो । तर, पछिल्लो अध्ययनमा १० देखि १५ प्रतिशतमा संक्रमित हुनु भाइरस नियन्त्रणका लागि धेरै हदसम्म प्रभावकारी हुने बताइएको छ ।

अहिलेसम्म ६० देखि ७० प्रतिशत मानिस कोरोनाको चपेटामा आएमा हर्ड इम्युनिटी अर्थात् सामूहिक प्रतिरक्षा विकसित हुन सक्ने विश्वास गरिएको छ ।

तर अक्सफोर्ड विश्वविद्यालय र भर्जिनिया टेक विश्वविद्यालयका वैज्ञानिकको अनुसन्धानमा १० देखि १५ प्रतिशत जनसंख्या संक्रमित भएमा कोरोना भाइरस शक्तिहीन बन्दै जाने उल्लेख गरिएको छ ।

यो शोधमा शोधकर्ताले स्वीडेनको उदाहरण दिएका छन् । कोरोना संक्रमणमाथि नियन्त्रण कायम गर्नका लागि संसारभरमा लकडाउन लगाएर विभिन्न उपाय लगाइरहेका बेला स्वीडेनले त्यसो गरेन ।

त्यहाँ पसल, रेस्टुरेन्ट, बार र बजार सबै खुला रहे । परिणमस्वरुप स्वीडेनमा तीव्र रूपमा संक्रमण फैलियो । सुरुमा ठूलो संख्यामा मानिसको मृत्यु भए पनि पछि त्यो दरमा कमी आयो ।

शोधकर्ताका अनुसार हालैका दिनमा करिब १ जना संक्रमित दैनिकजसो देखिने गरेका छन् र ५ भन्दा कम मानिसका मृत्यु भइरहेको छ । शोधकर्ताका अनुसार त्यहाँका मानिसमा प्रतिरक्षा प्रणाली विकसित भएका कारण तथ्यांक घट्दो क्रममा देखिएको छ ।

उनीहरूका अनुसार यस्तो अवस्थामा भाइरस कमजोर हुन्छ । शोधकर्ताका अनुसार ७.३ प्रतिशतमा संक्रमण फैलिँदा ५ हजार २८० जनाको मृत्यु भइसकेको थियो । तर, १४ प्रतिशतमा संक्रमण फैलिँदा मृत्यु हुने दरमा धेरै कमी आयो ।

यसै आधारमा शोधकर्ताले १० देखि १५ प्रतिशत संक्रमित हुँदा कोरोना भाइरसले शक्ति गुमाउँदै जान्छ र त्यति खतरनाक हुँदैन । स्वीडेनमा देखिएको हर्ड इम्युनिटी अर्थात सामूहिक सुरक्षाको नियम स्पेनमा लागू भएन ।

स्पेन कोरोना भाइरसबाट धेरै प्रभावित बन्यो । स्पेनमा ५ प्रतिशतमा इम्युनिटी विकसित भयो भने ९५ प्रतिशत मानिस भाइरसप्रति असंवेदनशील भएको पाइयो ।

यो परिणामअनुसार हर्ड इम्युनिटीको बलमा कोरोना भाइरस संक्रमण नियन्त्रण सम्भव नभएको देखिएको छ ।

प्रकाशित मिति: बुधबार, असार ३१, २०७७ १२:०२