ओपिडीमा प्रहरी, सडकमा एप्रोन

A+ A A-

समायोजनप्रति असहमति जनाउदै आन्दोलनरत चिकित्सकलाई ‘तह लगाउन’ सरकारले अस्पतालको टिकट काउण्टरमा सुरक्षाकर्मी लगाएर ओपिडी टिकट बेच्न लगाउन शुरु गरेको छ ।
सरकारले ओपिडीमा हस्तक्षेप गरेलगत्तै वीर अस्पतालका चिकित्सकले भने अस्पताल बाहिरै बिरामी जाँच्न थालेकाछन् ।

समायोजनमा विभेदकारी प्रावधान ल्याइएको भन्दै सरकारी चिकित्सकहरु सामूहिक राजिनामा बुझाएर आन्दोलनमा छन् । आन्दोलनस्वरुप इमर्जेन्सीबाहेकका सेवा ठप्प पारेपछि सरकारले बिरामीको सेवाका लागि प्रहरी परिचालन गरेको हो ।

सरकारले अत्यावश्यक सेवामा हड्ताल गर्न नपाइने भन्दै सुरक्षाकर्मी प्रयोग गरेपछि अस्पताल बाहिरै सेवा शुरु गरेको चिकित्सकहरु बताउछन् । चिकित्सकहरु गत शुक्रबारबाट ओपिडीसेवा बन्द गरेर आन्दोलनमा उत्रिएका थिए । आज अस्पताल पुगेको प्रहरी टोलीले चिकित्सक र वीरका कर्मचारीमाथि हस्तक्षेप गरी उपचारका लागि पुगेका विरामीलाई ओपिडी टिकट बेच्न लगाएपछि चिकित्सकले अस्पताल बाहिरै बिरामी जाँच्न थालेका हुन् ।

न्याम्सका उपकुलपति प्राडा. डिएन साहले अस्पताल खुलाउन पहल थालेपछि सरकारले प्रहरी पठाइदिएको हो । सरकारी टिकट बहिष्कार गरेर सरकारी चिकित्सक संघ (गोदान) को व्यानरमा आफुहरुले बिरामीको उपचार गर्ने तयारी थालेको गोदानका अध्यक्ष दीपेन्द्र पाण्डे बताउछन् ।

सरकार र सरकारी चिकित्सकबीचको मनमुटावका कारण वीर, टिचिङलगायतका सरकारी अस्पतालमा उपचार गराउन पुगको बिरामीको भने बिचल्ली भएको छ । चिकित्सकहरुले अस्पताल बाहिरै उपचार दिने भनेपनि अझै प्रभावकारी व्यवस्थापन नहुँदा बिरामी पीडा सहेर बस्न बाध्य भएको वीर अस्पतालमा उपचारका लागि पुगेका भैसेपाटीका श्याम बहादुर महर्जनले बताए ।