लेखा समितिमा स्वास्थ्य सामग्री खरिद प्रकरणमा बहस, कसले के भने ?

A+ A A-

प्रतिनिधि सभाको सार्वजनिक लेखा समितिको मंगलबारको बैठकमा सांसदले स्वास्थ्य सामग्री खरिद प्रकरणमा अनियमितता भएको भन्दै छानबिन समिति गठन गर्न माग गरेका छन् । सांसदले नियतबस नै ओम्नी समूहलाई खरिद गर्न दिइएको भन्दै छानबिन गर्न माग गरेका हुन् ।

नेपाल कम्युनिष्ट पार्टीकी सांसद धर्मशीला चापागाईंले वार्ता गर्न बनाइएको समितिले जुन टिमलाई स्वास्थ्य सामग्री खरिद गर्न जिम्मा दियो त्योभन्दा ४ दिन अगाडि उक्त कम्पनीलाई जानकारी गराइएको बताइन् । कस्तो स्थितिमा कसरी प्रक्रिया थालियो र को-को संलग्न छन् भन्ने सबैभन्दा बढी महत्वपूर्ण भएको बताइन् ।

उनले तत्कालीन स्वास्थ्य तथा जनसंख्या मन्त्रालयका सचिव यादव कोइरालाले कोभिड-१९ को व्यवस्थापन गर्न बनेको उच्चस्तरीय समितिले तुरुन्तातुरुन्तै निर्णय गर्न निर्देशन दिएको बताएकालो नोट गर्न आग्रह गरिन् । उनले ओम्नी समूहले ३ दिनमा नै सामान ल्याउँछ भन्ने कुराको ग्यारेन्टी के थियो भन्दै प्रश्न समेत गरिन् ।

नेपाली कांग्रेसका सांसद मिनेन्द्र रिजालले समितिको बैठकमा कुनैपनि व्यक्तिको जानकारी लिन बोलाइएको नभएकाले कुनै पनि किसिमको जिम्मेवारीबाट पन्छिन नपाउने बताए । उनले आफूलाई प्राप्त भएका अधिकारको विषयको मात्रै कुरा गर्न आग्रह गरे ।

नेपाली कांग्रेसका सांसद राजेन्द्रकुमार केसीले खरिद प्रक्ररणबारे उचित जवाफ आउन नसकेको बताए । २ अर्बको सामान ल्याउन जिम्मा पाएको कम्पनीलाई १८ करोडको सामान ल्याउँदा विरोध भएपछि हतारमा कालो सूचीमा राख्ने भन्ने तर मन्त्रिपरिषदबाट निर्णय गरेर भुक्तानी गर्ने प्रवृतिले आयात गर्न ओम्नीलाई नै छनोट गर्नुको नियत स्पस्ट भएको बताए ।

नेपाल कम्युनिष्ट पार्टीका सांसद अमनलाल मोदीले भ्रष्टाचारको आशंका भएको अवस्थामा चित्तबुझ्दो जवाफ नआएकाले सत्य तथ्य छानबिन गर्न समिति गठन गर्न माग गरे ।

नेपाल कम्युनिष्ट पार्टीका सांसद विरोध खतिवडाले ओम्नी समूहको दर्ता औषधि आयात गर्ने भन्ने उद्देश्य रहेको नरहेको सम्बन्धमा प्रश्न उठाए । उनले महानिर्देशक अध्यक्ष भएको समितिमा संयोजक अर्कोलाई तोकेर काम गरेको प्रति आशंका व्यक्त गर ।

प्रकाशित मिति: मंगलबार, असार ३०, २०७७ २०:२४