भारतको हस्तक्षेपका कारण नेपाल डुबानमा : गृहमन्त्री थापा

A+ A A-

गृहमन्त्री रामबहादुर थापाले भारतको हस्तक्षेपका कारण नेपाल डुबानमा पर्ने गरेको बताएका छन् ।

भारतको हस्तक्षेपका कारण वर्षौंदेखि नेपालले क्षति व्यहोर्दै आएको र त्यसलाई रोक्न नसक्दा नेपाल डुबानमा पर्ने गरेको उनले बताए । प्रतिनिधसिभाको राज्यव्यवस्था तथा सुशासन समितिमा गृहमन्त्री थापाले भारतले सीमा क्षेत्रमा बनाएको बाँधरूपी सडकले नेपालको तराई क्षेत्रमा डुबान पर्ने गरेको बताए ।

‘वर्षौदेखि क्षति हामीले व्यहोरेका छौँ । यो बाह्य हस्तक्षेपको कारणले गर्दा हो । बाह्य हस्तक्षेप रोक्न नसक्दा पनि हामीलाई डुबायो । भारतले समानान्तर रूपमा बाँध बनाउँदा, बाँधरूपी बाटो बनाउँदा पनि हरेक वर्ष तराईमा डुबान हुने गरेको छ,' उनले भने, 'यो एक ढंगले भारतीय पक्षले नेपालमा गरेको हस्तक्षेप नै हो । हामीले राजनीतिक रूपमा भन्दा त्यो हस्तक्षेप नै हो ।’

गृहमन्त्री थापाले भारत सरकारसँग पटक-पटक भएका सन्धि सम्झौता कार्यान्वयनमा नआउँदा समस्या आउने गरेको बताए । भारतीय प्रधानमन्त्री नरेन्द्र मोदीको नेपाल भ्रमणका बेला समेत सहमति बनेको र अध्ययन समिति समेत गठन भए पनि त्यो कार्यान्वयनको चरणमा जान नसकेको उनले बताए ।

नेपालहुँदै भारततर्फ जाने नदीलाई भारतले निकास नदिँदा समस्या भएको उल्लेख गर्दै गृहमन्त्री थापाले भारतले आफ्नो रक्षाका लागि बाँध बनाए पनि नेपालको राष्ट्रिय हितमा धक्का लागेको बताए । भारतले नेपालसँग गरेको सन्धि, सम्झौता कार्यान्वयन गरी यसको निकास दिनुपर्ने पनि मन्त्री थापाले बताए ।