प्रदेश १ मा ७० प्रतिशत रोपाइँ सम्पन्न

A+ A A-

प्रदेश १ मा करिब ७० प्रतिशत रोपाइँ सम्पन्न भएको छ । साउन लाग्नुअगाडि नै ७० प्रतिशत रोपाइँ सम्पन्न हुनु सकारात्मक भएको कृषि प्राविधिकहरूले बताएका छन् ।

नियमित वर्षाका कारण धानको बिउ राख्ने बेलादेखि रोपाइँसम्म सहज रूपमा अघि बढेकाले अघिल्लो वर्षको तुलनामा समान अवधिमा राम्रो रोपाइँ भएको हो ।

प्रदेश १ को भूमि व्यवस्था कृषि तथा सहकारी मन्त्रालयले दिएको जानकारीअनुसार ६९.८३ प्रतिशत रोपाइँ सम्पन्न भएको छ ।

मन्त्रालयका प्रवक्ता राजेन्द्र उप्रेतीका अनुसार प्रदेश १ मा धान रोपाइँ हुने ३ लाख ४० हजार ८ सय २९ हेक्टर क्षेत्रफलमध्ये २ लाख ३८ हजार ७ सय दशमलव ४१ हेक्टर क्षेत्रफलमा रोपाइँ भइसकेको छ । यो कुल क्षेत्रफलको ६९.८३ प्रतिशत हो ।

अन्न भण्डारणको रूपमा चिनिएका तराईका झापा, मोरङ र सुनसरीमा सबैभन्दा बढी ७३.१६ प्रतिशत रोपाइँ भएको छ । जसमध्ये हालसम्म झापामा ७५, मोरङमा ७० र सुनसरीमा ७५ प्रतिशत रोपाइँ भएको छ ।

तराईको झापा, मोरङ र सुनसरीमा २ लाख २५ हजार ८ सय हेक्टर क्षेत्रफलमा धानखेती हुने गरेको छ । त्यसमध्ये १ लाख ६५ हजार १८५ हेक्टर क्षेत्रफलमा रोपाइँ भइसकेको छ ।

त्यसैगरी, मध्य पहाडको इलाम, पाँचथर, भोजपुर, तेह्रथुम, धनकुटा, ओखलढुंगा, उदयपुर र खोटाङमा ७६ प्रतिशत र उच्च पहाडको ताप्लेजुङ, संखुवासभा र सोलुखुम्बुमा हालसम्म ५८.४ प्रतिशत रोपाइँ भएको मन्त्रालयको तथ्यांक छ ।

मध्य पहाडी क्षेत्रमा ९० हजार ९ सय १६ हेक्टर क्षेत्रफलमा रोपाइँ हुनेमध्ये हालसम्म ५८ हजार ८ सय २७ हेक्टर क्षेत्रफलमा रोपाइँ सकिएको छ ।

गतवर्ष असार ३२ सम्म प्रदेशमा ३६.२८ प्रतिशत मात्र रोपाइँ भएको मन्त्रालयले जनाएको छ ।

गतवर्षको तुलनामा यस वर्ष चाँडै मनसुन सक्रिय भएका कारण रोपाइँ चाँडो भएको भूमि, व्यवस्था, कृषि तथा सहकारी मन्त्रालय प्रदेश १ का प्रवक्ता राजेन्द्र उप्रेतीले जानकारी दिए ।

प्रकाशित मिति: मंगलबार, असार ३०, २०७७ १७:०७