सुदूरपश्चिमका ८७ स्थानीय तहमा बैंकिङ पहुँच विस्तार

A+ A A-

९ जिल्ला रहेको सुदूरपश्चिममा ७ पहाडी र २ तराईका जिल्ला छन् । पहाडको तुलनामा तराइका जिल्लामा विकास भएको छ ।

मूलकमै विकासका दृष्टिकोणले सुदूरपश्चिम प्रदेश सबैभन्दा पछाडि मानिन्छ । तर, प्रदेशमा क्रमशः विकासको दर बढ्दै गइरहेको छ ।

प्रदेशमा आर्थिक गतिविधि पनि बढ्न थालेका छन् । यहाँका स्थानीय तहहरूमा पनि बैङ्किङ पहुँच विस्तार बढ्दै गएको छ ।

थलारा पहुँच बाहिर, सेवाग्राहीलाई सास्ती

प्रदेशको विकट जिल्ला बझाङको थलारा गाउँपालिका अहिले पनि बैङ्किङ पहुँच बाहिर छ । बझाङका अन्य स्थानीय तहमा भने बैङ्कहरू स्थापना भइसकेका छन् ।

थलारा गाउँपालिका-५ मा बैङ्किङ विस्तारका लागि तयारी पूरा भए पनि कोरोना भाइरसका कारण रोकिएको थलारा गाउँपालिकाका अध्यक्ष भुवनेश्वर उपाध्यायले बताए ।

गाउँपालिका जनता लगायत जनप्रतिनिधिहरूलाई बैंङक नहुँदा निकै सास्ती भइरहेको उनले बताए । अहिले बैङ्किङ सेवाका लागि त्यहाँका सर्वसाधारण र जनप्रतिनिधि सदरमुकाम चैनपुर पुगिरहेका छन् ।

गाउँपालिका अध्यक्ष उपाध्याय भने, ‘हामीलाई निकै समस्या भइरहेको छ । गाँउपालिकाकै धेरै कामहरू बैङ्क टाढा हुँदा रोकिएका छन्, बैंकमा पुग्न ३ देखि ४ घण्टासम्म लाग्छ निकै हैरान भइरहेका छाैँ ।’

उनले थपे, ‘कम्तीमा ३/४ दिनमा बैङ्किङ कामको लागि जानैपर्छ आउन जानै समय लाग्छ । यसले गर्दा अरू काम पनि रोकिने गरेका छन् । कुमारी बैकले शाखा ल्याउने कुरा थियो तर अहिले सम्म शाखा आउन सकेको छैन ।’

गाउँपालिकामा बैंङको शाखा स्थापना गर्न सरोकारवालासँग छलफल भए पनि अहिलेसम्म शाखा स्थापना हुन नसकेको उनले बताए ।

८७ स्थानीय तहमा बैङ्किङ पहुँच विस्तार

सुदूरपश्चिम प्रदेशमा बैङ्किङ पहुँच बिस्तार हुन थालेको छ । ८८ स्थानीय तह रहेको प्रदेशका हाल सम्म ८७ वटा स्थानीय तहमा बैङ्कका शाखाहरू खुलेका छन् । बझाङको गाँउपालीकामा मात्रै बैङ्किङ पहुँच पुग्न सकेको छैन ।

नेपाल राष्ट्र बैङ्कले १४ चैत २०७४ मा एउटा स्थानीय तहमा कम्तीमा पनि एउटा वाणिज्य बैङ्कको शाखा अनिवार्य विस्तार हुनु पर्ने भन्दै वाणिज्य बैङ्कहरूलाई निर्देशन दिएको थियो ।

बैङ्कको निर्देशन पूर्व यो सुदूरपश्चिम प्रदेशमा ३५ वटा स्थानीय तहमा बैङ्क सुविधा थियो । निर्देशनपछि प्रदेशका ५२ स्थानीय तहमा बैङ्कको शाखा विस्तार भएका छन् ।

प्रदेशका ८८ वटै स्थानीय तह मध्ये ८७ वटा स्थानीय तहमा बैंङकको शाखा स्थापना भइसकेको नेपाल राष्ट्र बैंक धनगढीले जनाएको छ ।

चालू आर्थिक वर्ष भित्र सबै स्थानीय तहमा बैंकिङ पहुँच पुर्‍याउने लक्ष्य रहे पनि कोरोना भाइरसका कारण प्रभावित बनेको नेपाल राष्ट्र बैंक धनगढी कार्यालय निर्देशक निश्चल अधिकारीले जानकारी दिए । कोरोना भाइरसको सङ्क्रमण घट्दै गए शाखा बिस्तारमा सहजता आउने उनले बताए ।

अर्थमन्त्री भन्छन् : ‘पहिलो चौमासिकमै बैंक पुग्छन्’

चालू आर्थिक वर्ष भित्रै प्रदेशका ८८ वटै स्थानीय तहमा बैंकिङ पहुँच पुर्‍याउने प्रदेशका आर्थिक मामिला तथा योजनामन्त्री झपटबहादुर बोहराले प्रतिबद्धता जनाएका थिए । आर्थिक वर्ष सकिँनै लाग्दा प्रदेशका ८७ स्थानीय तहमा बैंकिङ पहुँच पुगेको छ ।

बझाङको थलारा गाँउपालिका मात्रै पहुँच बाहिर छ । कोरोना भाइरसको महामारीका कारण सबै काम प्रभावित बन्दा थलारामा पहुँच पुर्‍याउन नसकिएको अर्थमन्त्री बोहराले बताए । उनले भने, ‘यसै आर्थिक वर्षभित्र सबैमा पुर्‍याउने योजना थियो । ८७ स्थानीय तहमा पुर्‍याउन सफल भयौँ । तर, कोरोनाका कारण सबै तयारी पुगेर पनि थलारामा बैकिङ पहुँच पुर्‍याउन सकेनौँ,’ उनले थपे, ‘आगामी आर्थिक वर्षको पहिलो चौमासिक भित्रै हामी त्यहाँ पनि शाखा विस्तार गर्छौँ ।’

मन्त्री बोहराले बैकिङ पहुँचबिना आर्थिक विकास सम्भव नहुने भएकाले तत्काल शाखा विस्तारका लागि पहल भइरहेको दाबी गरे ।

प्रदेशका सबै स्थानीय तहमा बैक शाखा स्थापना गर्न सकिए प्रदेशको आर्थिक वृद्धिदर अझ बढ्ने अपेक्षा रहेको उनको भनाई छ ।

८८ वटै स्थानीय तहमा बैंक पहुँच पुर्‍याउन सके प्रदेशका जनता र आर्थिक विकासमा ठूलो टेवा पुग्ने मन्त्री बोहराले बताए ।

प्रकाशित मिति: मंगलबार, असार ३०, २०७७ १२:२८