कोरोनाका कारण जीडीपीमा १ खर्ब ६८ अर्बको क्षति हुने अनुमान

A+ A A-

नेपाल राष्ट्र बैंकले कोभिड-१९ का कारण नेपालको कुल गार्हस्थ्य उत्पादननमा करिब १ खर्ब ६८ अर्बले क्षति भएको प्रारम्भिक अनुमान गरेको छ ।

संघीय संसद प्रतिनिधिसभाको अर्थसमितिको सोमबारको बैठकमा आगामी मौद्रिक नीतिको तयारीका सम्बन्धमा जानकारी दिन उपस्थित रहेका गभर्नर महाप्रसाद अधिकारीले देशको कुला गार्हस्थ्य उत्पादनमा १ खर्ब ६८ अर्ब रुपैयाँबराबरको क्षति भएको अनुमान गरिएको बताए । कोभिड-१९ का कारण होटल, रेस्टुरेन्ट, यातयात, निर्माण र व्यापार क्षेत्रमा सबैभन्दा बढी असर परेको गभर्नर अधिकारीले बताए ।

‘कोभिड १९ का कारण अर्थतन्त्र प्रभावित भएको छ । तर, यो आर्थिक वर्षमा प्रचलित मूल्यको कुल गार्हस्थ्य उत्पादन करिब १ सय ६८ अर्बले क्षति भएको प्रारम्भिक अनुमान छ । लकडाउन अझै लम्बिँदा यो अनुमान अझै बढी हुन सक्छ,' उनले भने, 'कोभिड-१९ बाट सिर्जित समस्याले खासगरी होटल, रेस्टुरेन्ट, यातायात, निर्माण र व्यापार क्षेत्रको कुल गार्हस्थ्य्य उत्पादनमा सबैभन्दा बढी क्षति भएको देखिन्छ ।’

कोभिड-१९ को कारण बैंकिङ क्षेत्रको निक्षेप संकलन तथा कर्जा प्रवाहमा परिवर्तन भएको समेत गभर्नर अधिकारीले बताए । उनले चैत २०७६ देखि जेठ २०७७ सम्म बैंकको निक्षेप बढेको तर कर्जा बढ्न नसकेको बताए । बैंक तथा वित्तीय संस्थामा निक्षेप १ खर्ब ७२ अर्बले र कर्जा १६ अर्बले मात्र बढेको गभर्नर अधिकारीले बताए ।

‘कोभिड– १९ कारण बैंकिङ क्षेत्रको निक्षेप संकलन तथा कर्जा प्रवाह तीव्र प्रभावित भएको छ । निक्षेपतिर संकलन बढेर गएको छ सामान्यभन्दा बेसी नै,' उनले भने, 'चैत २०७६ देखि जेठ २०७७ सम्म ३ महिनाको अवधिमा बैंक तथा वित्तीय संस्थामा निक्षेप १ सय ७२ अर्बले र कर्जा प्रवाह १६ अर्बले वृद्धि भएको देखिन्छ । कर्जा १ असारपछि अलिकति बढिराखेको छ । बीचमा कर्जा लगभग बन्दै भयो कर्जा गएन ।’

उनले नेपाल राष्ट्र बैंकले अनलाइन सर्वेक्षणमार्फत कोभिड-१९ बाट सिर्जित समस्याको विश्लेषण गरिएको बताए । गभर्नर अधिकारीले सर्वेक्षणबाट प्राप्त भएका नतिजाको विश्लेषण गर्दा कतिपय व्यवसाय सामान्य अवस्थामा फर्कन करिब १ वर्ष लाग्ने देखिएको बताए ।

आगामी वर्षको मौद्रिक नीति तर्जुमा गर्दा सर्वेक्षणको निष्कर्षलाई समेत प्राथमिकता दिइएको अधिकारीले बताए । उनले विद्युतीय भुक्तानीको बढ्दो प्रयोगले बन्दाबन्दीको अवस्थामा पनि वित्तीय कारोबार सहज बनेको बताए ।

गभर्नर अधिकारीले कोभिड-१९ संकटले सिर्जना गरेको अनिश्चितताका बीच यस वर्ष मौद्रिक नीति तर्जुमा भइरहेकाले संकटबाट प्रभावित क्षेत्रहरूलाई प्राथमिकताका आधारमा सहुलियत प्रदान गरी बचाई राख्ने र शीघ्र आर्थिक पुनरुत्थानका लागि वित्तीय साधनको उपलब्धता बढाउने दिशामा मौद्रिक नीति केन्द्रित रहेको बताए ।

प्रकाशित मिति: सोमबार, असार २९, २०७७ १९:०१