एउटा दर्दनाक हत्याकाण्डको पटाक्षेप : १४ वर्षपछि यसरी समातिए हत्यारा

A+ A A-

प्रहरीको केन्द्रीय अनुसन्धान ब्यूरो (सीआईबी) ले १४ वर्षअघिको एउटा दर्दनाक हत्या घटना सुल्झाएको छ । २० पुस २०६३ सालमा काठमाडौंकाे सीतापाइलास्थित कान्तिपुर काष्ठ मिलका सञ्चालक नातिकाजी सुवेदी दम्पतीकाे दर्दनाक हत्याकाण्ड सुुल्झाएको हो । सुवेदी दम्पतीकाे स्थायी घर मोरङकाे डाँगीहाट हो ।

मिल सञ्चालक नातिकाजी सुवेदी र उनकी श्रीमती सानु सुवेदीको सोही मिलमा काम गर्ने २ जना मिस्त्रीबाट हत्या भएको थियो । हत्यालगत्तै फरार भएका अभियुक्तहरू १४ वर्षसम्म लुकेर बसेका थिए ।

फरार रहेका अभियुक्तहरूमध्ये एक जनालाई सीआईबीको टोलीले पक्राउ गरेको हो । पक्राउ पर्नेमा सर्लाहीका जयकिशोर साह छन् । उनलाई सीआईबीको टोलीले आइतबार नेपालगञ्जबाट पक्राउ गरेको हो ।

अर्काको भने अझै खोजी जारी रहेको सीआईबीका प्रमुख प्रहरी नायव महानिरीक्षक (डीआईजी) सहकुलबहादुर थापाले जानकारी दिए । पक्राउ परेका साहलाई सोमबार पत्रकार सम्मेलन गरेर सीआईबीले सार्वजनिक गरेको हो ।

यस्तो थियो त्यो दर्दनाक हत्याकाण्ड

२० पुुस २०६३ को बेलुका करिब ८ बजेको थियो । सुवेदी दम्पती सीतापाइलास्थित अमृत मैनालीको तीनतले घरको भुइँतलामा भाडामा बस्थे ।

आफू बसेकाे घरनजिकै उनले कान्तिपुर काष्ठ उद्योग नाम गरेकाे काष्ठ उद्याेग सञ्चालन गरेका थिए । उनीहरू दिनभर मिलमै हुन्थे । २० पुुस २०६३ को साँझ पनि सुवेदी दम्पती मिलमै काम गरेर आफ्नाे कोठा फर्किएका थिए ।

समय करिब साँझको ८ बजेको थियो । उनीहरू सधैँझैँ चाँडै खाना खाएर सुत्ने तयारीमा थिए । सुवेदी दम्पतीका विलभ सुवेदी र दुर्लव सुवेदी गरी दुई सन्तान थिए । विलभ त्यो बेला १५ वर्षका थिए भने उनका भाइ दुर्लव १२ वर्षका मात्रै थिए ।

उनीहरू चारै जना खाना खाएर सुत्ने तयारीमा थिए । एउटा कोठामा नातिकाजी सुवेदी र उनकी श्रीमती सानु सुवेदी सुत्थे । अर्को कोठामा विलभ सुवेदी र उनका भाइ सुत्थे । त्यही बेला मिलमा काम गर्ने जयकिशोर साह र प्रताप राना कोठामा पुगे । उनीहरू मिलमै बनाएको एक कोठामा बस्थे ।

साह र रानाले कोठा ढकढकाए र सुवेदी दम्पतीले ढोका राम्रोसँग खोल्न नपाउँदै उनीहरूले अन्धाधुन्द धारिलो हतियार प्रहार गरेर उनीहरूको हत्या गरे । आमाको चिच्याहट सुनेर १५ वर्षीय छोरा विलभ कोठा खोल्दै थिए ।

घटनाका घाइते विलभ सुवेदी र उनका भाइ

उनलाई समेत धारिलो हतियार प्रहार गरेर मार्न खोजे । तर, विलभ बेहोस मात्र भए । उनीमाथि पटक–पटक खुकुरी प्रहार भयो । कान्छो छोरा भने डरले काेठाकाे चुकुल लगाए बसेका थिए । साह र राना विलभ पनि मरेको ठानी त्यत्तिकै भागेका थिए ।

विलभलाई पछि स्थानीयले तत्कालै वीर अस्पताल पुर्‍याएपछि निको भएका हुन् । उनी अहिले २९ वर्षका जवान भइसकेका छन् । तर साह र रानाले प्रहार गरेको उनको शरीरभरिको चाेट अझै बाँकी छ ।

किन गरे हत्या ?

प्रहरीका अनुसार साह र राना सुवेदीको काष्ठ मिलमा काम गर्न आएको करिब १ वर्ष पुगेकाे थियो । उनीहरू राम्रो काम नगर्ने र पैसा मात्र माग्ने भन्दै मिल सञ्चालक सुवेदी दम्पतीले सामान्य गाली मात्रै गरेका थिए ।

त्यही गाली सहन नसकेर उनीहरूले सुवेदीको परिवार नै सखाप पार्न खोजेको अनुसन्धानबाट खुलेकाे प्रहरीकाे भनाइ छ । सीआईबीका प्रमुख डीआईजी सहकुल थापाले भने, ‘मिल सञ्चालक सुवेदी दम्पतीले गरेको सामान्य गालीलाई पनि उनीहरूले 'इगो'को रूपमा लिएर हत्या गरेको देखिन्छ, बाँकी अनुसन्धानकै क्रममा छौँ ।’

भारतमा बसेर डान्सबार सञ्चालन

आफैँले काम गर्ने मिलका साहुको हत्यालगत्तै साह र बाँकेका प्रताप राना भागेर भारतको लखनउ पुगे । उनीहरू करिब २ वर्षसँगै बसेको प्रहरीको प्रारम्भिक अनुसन्धानले देखाएको छ । त्यसपछि राना र साह छुट्टिए । साहले जय शर्माको नामबाट भारतीय आधार कार्डलगायत अन्य आवश्यक कागजात बनाएर भारतीय नागरिक भए ।

त्यसलगत्तै उनले लखनउकै एक डान्सबारमा डान्सरकाे रूपमा काम गरे । पछि त्यही डान्सबारको पार्टरसमेत भए र काम गरेको प्रहरीले जनाएको छ । उनी भारत गएपछि पहिलो पटक नेपाल प्रवेश गर्न खोज्दा पक्राउ गरिएको सीआईबीले जनाएको छ । उनीसँगै भारत छिरेका अर्का अभियुत्त राना भने अझै फरार छन् ।

पक्राउ परेका साह र राना दुवैको मिलमा काम गर्दा उनीहरूको पहिचान खुल्ने कुनै पनि कागजात नहुँदा पहिचान गर्न गाह्रो भएको डीआईजी थापाको भनाइ छ ।

‘उनीहरूको नामबाहेक मिलमा काम गर्दा केही ठेगाना खुलेको थिएन । न त फोटो नै थियो । हाम्रो लामो अनुुसन्धान र घटनामा बाँचेका सुवेदीका छाेरा विलभकाे सहयाेगबाट साहलाई पक्राउ गर्न सफल भएका हाैँ,' डीआईजी थापाले भने ।

अभियुक्त साहकाे पक्राउपछि प्रहरीले गरेकाे सार्वजनिक कार्यक्रममा प्रहरीले घटनामा घाइते भएका विलभ सुवेदीलाई उपस्थित गराएका थिए । उनले १४ वर्षअघि हत्या गरिएको आफ्ना आमाबुबाको हत्यारा पक्राउ पर्दा न्याय पाएको प्रतिक्रिया दिए ।

प्रकाशित मिति: सोमबार, असार २९, २०७७ १५:४३