सुस्मिता हत्याकाण्डः ससुरा र नन्दलाई आजीवन कैद माग

A+ A A-

हेटौंडाकी सुस्मिता केसी (थापा) को हत्या आरोपमा पक्राउ परेका ससुरा र कान्छी नन्दलाई आजीवन कैदको माग गर्दै जिल्ला अदालत मकवानपुरमा मुद्दा दायर गरिएको छ ।

जिल्ला सरकारी वकिल कार्यालय मकवानपुरले ससुरा ५८ वर्षीय प्रकाश थापा र नन्द २३ वर्षीया सीता थापालाई आजीवन कैद सजायको माग दाबी गर्दै आइतबार जिल्ला अदालतमा अभियोग पत्र दर्ता गरेको हो ।

२२ वर्षीया सुस्मिताको हत्या आरोपमा ससुरा प्रकाश, सासू तुलसा कुमारी थापा, नन्द सीता, जेठी नन्द दुर्गा थापा (कार्की) र उनको श्रीमान् अरुण कार्कीविरुद्ध अभियोग पत्र दर्ता गरिएको हो ।

सुस्मिताको १ असार राति करिब १० बजे घरको भान्सा कोठामा ससुरा प्रकाश र नन्द सीताले काठको लौरो र मसला पिस्ने लोहोरेले हानेर विभत्स हत्या गरेका थिए ।

खाना खाइरहेको अवस्थामा सुस्मिताको टाउकोमा ससुराले काठको लौरो प्रहार गरेका थिए । त्यस लगत्तै सीताले लोहोरोले टाउकोमा हानेर सुस्मिताको हत्या गरेको प्रहरी अनुसन्धानले पत्ता लगाएको थियो ।

जिल्ला प्रहरी कार्यालय मकवानपुरले जेठी नन्द दुर्गा थापा र उनका श्रीमान् अरुण कार्कीलाई हत्यामा षड्यन्त्र गरेको दाबी गरेको छ । सरकारी वकिलको कार्यालयले अभियोग पत्रमा कार्की दम्पतीलाई २५ वर्ष कैद माग गरेको छ ।

घटना भएपछि कार्की फरार छन् । प्रहरीले उनको खोजी गरिरहेको मकवानपुरका प्रहरी नायव उपरीक्षक इन्द्रबहादुर रानाले जानकारी दिए ।

सासु तुलसाकुमारी थापालाई घटनाको मतियार भएको आरोप लगाउँदै साढे १२ वर्ष जेल सजायको माग दाबी गरिएको जिल्ला न्यायाधिवक्ता फणीन्द्र कटुवालले जानकारी दिए ।

सुस्मिताको हत्या गरिँदा सासु तुलसा घरकै सयन कक्षमा थिइन् । सुस्मिताले बचाउ भन्दै आवाज निकालेपछि भान्सा कोठामा आएकी तुलसाले हत्यामा प्रयोग गरिएको लौरो, भान्सा कोठामा फुटेका सीसालगयातका वस्तु संकलन गरेर प्लाष्टिकमा राखेकी थिइन् ।

कपिलवस्तु माइती भएकी मृतक सुस्मिताले हेटौंडाका रुपेन्द्र थापासँग विवाह गरेकी थिइन् । २०७६ वैशाखमा बिहे भएपनि रुपेन्द्रको सडक दुर्घटनामा २३ असोज २०७६ मा मृत्यु भएको थियो ।

रुपेन्द्र ससुरालीबाट हेटौंडा फर्किदै गर्दा नवलपारीको दाउन्नेमा उनी सवार मोटरसाइकल दुर्घटनामा परेको थियो । घर पक्षले सुस्मिताकै कारण आफ्नो छोरोले ज्यान गुमाएको भन्दै मानसिक तनाव दिँदै आएका थिए ।

सुस्मिता हत्याको मुख्य कारण आर्थिक र सामाजिक भएको पाइएको छ । प्रहरीले बुहारी सुस्मितालाई घरको बाथरुममा जर्बजस्ती करणी प्रयास गरेको आरोप लगाएको छ ।

जर्बजस्ती करणी प्रयासको बारेमा सुस्मिताले बाहिर कुरा खोलेपछि आफ्नो सामाजिक प्रतिष्ठा गुम्ने डरले सुस्मिताको हत्या योजना ससुरा प्रकाशले बनाएको प्रहरी निष्कर्ष छ ।

रुपेन्द्रको मृत्यु पश्चात आउने जीवन बीमा, उनी काम गर्ने कम्पनीलगायतको रकममा सुस्मिता र घर पक्षको विवाद भएको प्रहरी अनुसन्धानले देखाएको थियो ।

प्रकाशित मिति: सोमबार, असार २९, २०७७ १२:५५