वीरमा बिरामीको बिचल्ली, तीन दिनदेखि उपचारको प्रतीक्षामा

A+ A A-

मंगलबार दिनको १ बजे वीर अस्पताल पुग्दा बिरामीको लर्को थियो । बिरामी चिकित्सकको प्रतीक्षामा थिए । तर चिकित्सकभने काममा थिएनन ।

बिरामीको हुलमुलमा देखिन्थिन्, विनिताकुमारी ठाकुर । सिराहा घर भएकी विनीताकुमारी ठाकुरलाई झट्ट हेर्दा जो कोहीले उनी गर्भवती रहेको अनुमान गर्छन् । तर, उनको विवाहसमेत भएको छैन । उनी १६ वर्षकी भइन् ।

‘जँचाउन आएको तीन दिन भइसक्यो तर पनि उपचार पाएको छैन । पेट धान्न पनि गाह्रो भइरहेको छ,’ विनिता भन्छिन् । विनितासँगै आएका उनका दाइ विजयकुमार ठाकुर भन्छन्, ‘पेटमा पानी भरिएको छ । जँचाउन नपाउँदा बहिनीलाई दिनदिनै गाह्रो हुँदै गएको छ । दिनदिनै अस्पताल आउने र फर्कने काम मात्रै भएको छ ।’

कर्मचारी समायोजनका विषयलाई लिएर सरकारी चिकित्सकले शुक्रबारदेखि गरेको आन्दोलनले बिरामीहरू मर्कामा परेका हुन् । समायोजनमा आफूहरूलाई संघअन्तर्गत राखिनुपर्ने माग राख्दै आन्दोलनमा उत्रिएका उनीहरूले शुक्रबारबाटै देशभरका सरकारी अस्पतालमा आकस्मिकबाहेकका सेवा बहिष्कार गरेका छन् ।

विजयकुमार ठाकुर भन्छन्, ‘चार वर्ष भइसक्यो पेटमा समस्या देखिन थालेको तर उपचारले पनि निको भएको छैन ।’ विजयका अनुसार सुरुमा पेटमा मासु पलाएपछि औषधि सेवनबाट विनितालाई केही समय ठीक भएको थियो । तर, फेरि एक वर्ष भयो पेटमा पानी जम्न थालेको छ ।

भारतमा लगेर उपचार गर्दा पनि निको नभएको भन्दै नरमाइलो मान्दै विजय भन्छन्, ‘त्रिभुवन विश्वविद्यालय शिक्षण अस्पतालमा पनि जाँच गराइयो तर कतैको उपचार पनि लागेन । हाम्रो समस्याको समाधान गर्ने डाक्टर कतै भेटिएन ।

शिक्षण अस्पतालले पनि ठीक हुन्छ मात्रै भन्छ तर बिरामीलाई गाह्रो भइसकेको छ । वीर अस्पतालमा उपचार हुन्छ कि भन्ने आशा बोकेर आयौं तर झन् यहाँ त डाक्टरको मुख पनि देख्न पाएको छैन ।’

चिकित्सकहरू आफ्नो माग पूरा भएन भन्दै आन्दोलनमा उत्रिएका छन् भने विनिता जस्ता कैयौं बिरामी उपचार पाउने आसमा छटपटाइरहेका छन् ।

प्रकाशित मिति: बुधबार, चैत २७, २०७५ ०५:१४