बेलबारीमा घुम्ती विद्यालय सञ्चालन

A+ A A-

कोरोना भाइरसका कारण जारी लकडाउनका कारण विद्यालय खुल्न नसकिरहेका बेला मोरङको बेलबारीमा घुम्ती शिक्षा अभियान थालिएको छ । सामुदायिक विद्यालयले विद्यार्थीलाई सानो संख्यामा टोल–टोलमा भेला गराएर पठनपाठन सञ्चालन थालेका हुन् ।

मठमन्दिर सामुदायिक भवन तथा निजी घरहरूमा विद्यार्थीलाई भेला गराएर पठनपाठन गराइरहेको बेलबारी-८ को जनता माध्यमिक विद्यालयका प्रधानाध्यापक जनक तिम्सिनाले जानकारी दिए । डेस्क बेन्चमा बसेर पढदै आएका विद्यार्थी सुकुल, गुन्द्री, चकटी, तथा म्याड ओछ्याएर पढिरहेका छन् ।

सामाजिक दूरी कायम गर्दै १० देखि १५ जनाको समूह बनाएर १८ वटा केन्द्र बनाइ पठनपाठन गराइरहेको लक्ष्मी माध्यमिक विद्यालय बेलबारी ११ का प्रध्यानाध्यापक गोविन्द भण्डारीले जानकारी दिए । विद्यालयले टोल–टोलमा गएर पढाउन थालेपछि अभिभावकसमेत खुसी भएका छन् ।

कतिपय निजी विद्यालयले अनलाइन कक्षा संचालन गरिरहेका बेला त्यसको प्रभाबकारिता सबै विद्यार्थीमा नहुने देखिएपछि बेलबारीका सामुदायिक बिद्यालयले टोलटोलमा कक्षा सञ्चालन सुरु गरेका हुन् । टोलमै ह्वाइट बोर्ड राखेर विद्यार्थीलाई पढाउने गरेको प्रअ भण्डारीले बताए ।

लकडाउन भएको लामो समयसम्म विद्यालय खुल्ने अवस्था नदेखिएपछि नगरपालिकाले विद्यार्थीको अवस्थाको सर्वेक्षण गरेको थियो । सर्वेक्षणमा धेरै विद्यार्थीमा इन्टरनेट, टीभी रेडियोको जस्ता सामाग्रीको पहुँचमा नरहेको देखिएपछि घुम्ती सिकाई अभियान थालेको नगरपालिकाको शिक्षा शाखा प्रमुख भुपेन्द्र कोइरालाले बताए ।

बेलबारी ३१ वटा सामुदायिक विद्यालयमा ८ हजार ६६ जना विद्यार्थी अध्ययनरत छन् । सिकाइ प्रभाबकारी बनाउन चोक–चोकमा इन्टरनेटको जडान गर्नसमेत थालिएको नगरपालिकाले जनाएइको छ । घुम्ती विद्यालयमा पढ्न आउदा विद्यार्थीलाई सेनिटाइजर, मास्क भने अनिवार्य गराएको छ ।

प्रकाशित मिति: शनिबार, असार २७, २०७७ १९:३३