नेपाली फिल्म बढ्दा आयोजक उत्साहित

A+ A A-

यो वर्ष २०१९ का लागि नेपाल मानव अधिकार इन्टरनेसनल फिल्म फेस्टिवलको सातौं संस्करण आइतबार सम्पन्न भयो । काठमाडौंको रसियन सांस्कृतिक केन्द्रमा आयोजित चार दिन लामोे फेस्टिवलमा ३३ देशका ८२ फिल्म प्रदर्शन भए । मानव अधिकार कर्मी, चलचित्रकर्मी र फिल्म मेकरले अनुभव साटासाट गरे ।

निर्देशक पाण्डव खत्रीले फेस्टिवलबाट राम्रो प्रतिक्रिया पाएको बताए । नयाँ संस्करणको तयारीमा जुट्ने भएकाले कुनै पनि वर्ष मानव अधिकार फिल्म फेस्टिवल समापन भएको महसुस नै नहुने उनले बताए । हरेक वर्ष दर्शक बढ्ने उत्साहजनक सहभागिताले आफूहरूलाई थप ऊर्जा मिल्ने गरेको उनले सुनाए ।

‘उत्साहपूर्ण सहभागिता हुन्छ भन्ने सोचेकै थिएनौं । खराब मौसमले दर्शकलाई हलसम्म पुग्न कठिनाइ भए पनि दिउँसो दर्शकको चाप निकै थियो,’ उनले भने ।
उनले फेस्टिवलमा आन्तरिक राजनीतिक विवाद, हिंसात्मक विद्रोह, जातीय दंगा र आतंकवादी क्रियाकलापका कारण विस्थापित भएकाको कथामा निर्मित फिल्महरूको प्रदर्शन गरेकोे बताए ।

यस वर्षदेखि उत्कृष्ट महिला निर्देशकलाई पुरस्कृत पनि गरिएको छ । यसले फिल्म मेकिङमा महिलाको सहभागिता बढाउने आयोजकको दाबी छ । ‘महिलाको विषय र मुद्दा उठाउन उभिप्रेरित गर्ने उद्देश्यले उत्कृष्ट महिला निर्देशक अवार्ड थपिएको हो,’ उनले भने ।

छैटौं संस्करणबाट फेस्टिवल बुलेटिन प्रकाशन गरिएको छ । दर्शकलाई फेस्टिवल र बहसबारे अवगत गराउन ‘बुलेटिन’ प्रकाशन गरिएको हो । ४ अप्रिलबाट सुरु भएको महोत्सवमा मर्यादित आप्रवासन, यौनिक तथा लैंगिक अल्पसंख्यकहरूप्रति समाजको स्वीकार्यता र सार्वजनिक लगानीबारे बहस भयो ।

फेस्टिवलमा दुई दर्जन बढी फिल्म प्रदर्शन हुनुलाई आयोजकले उपलब्धि मानेको छ । गुणात्मक फिल्महरूको पनि आवेदन परेकोे आयोजक सरोज सापकोटाले बताए ।
‘१२ सयबाट ८२ वटा उत्कृष्ट फिल्म छनोट गरिएको हो,’ उनले भने । ‘नेपाली फिल्म मेकरको संख्या बढेको छ । अन्य वर्षमा राम्रो फिल्म छनोट गर्न गाह्रो हुन्थ्यो, यस वर्ष फिल्म छनोट गर्न हम्मेहम्मे पर्यो,’ सापकोटाले बताए । सातौं संस्करण सबै उत्कृष्ट फिल्महरू प्रदर्शन गरेको सापकोटाले सुनाए ।

गुणात्मक फिल्म र मानव अधिकारको विषयलाई गम्भीर रूपमा उठान गर्ने फेस्टिवलको उद्देश्य रहेको आयोजक सचिन घिमिरे बताउँछन् ।

‘संख्यामा मात्र नभएर क्वालिटीमा ध्यान दिएका छांै । हरेक वर्ष थिममेटिक इस्यु चुज गरेर फेस्टिवल आयोजना गर्छाै । त्यसैले मानव अधिकार फिल्म फेस्टिवल नेपालको कन्टेक्समा अलि फरक छ । दर्शक र फिल्ममेकरहरूबाट पनि राम्रो प्रतिक्रिया आएको छ,’ उनले भने ।

फेस्टिवल मानव अधिकार र फिल्म सौदर्य शास्त्रको बहस गर्ने थलोका रूपमा विकास भइरहेको छ ।

फिचर फिल्म रूचाउने दर्शकका लागि मानव अधिकार महोत्सवले लघु चलचित्र र वृत्तचित्रतर्फ ध्यानाकर्षण गराउन अभ्यास गरेको आयोजक तारा चाम्लिङ बताउँछिन् । उनी राष्ट्रिय तथा अन्तर्राष्ट्रिय स्तरका उत्कृष्ट सर्ट फिल्म र डकुमेन्ट्री प्रदर्शन गर्न पाएकामा गर्व महसुस गर्छिन् ।

‘फिल्ममेकर, मानव अधिकारकर्मी र फिल्मलाई माया गर्नेको उल्लेखिय उपस्थिति थियो । यो वर्ष अन्तर्राष्ट्रिय फिल्ममेकरहरूको राम्रै उपस्थिति थियो । यसले नेपाल र विदेशका फिल्ममेरहरूबीच आइडिया साट्ने थलो रुपमा विकास भएको छ ,’ उनले थपिन् ।

यसैगरी, यही संस्करणदेखि ‘डकुमेन्ट्री पिचिङ’ पनि सञ्चालन गरिएको छ । छानिएका कथालाई पोस्ट प्रडक्सनको काम र आवश्यक सल्लाह दिइनेछ । त्यस्तै, एक लाख नगद पुरस्कार पनि प्रदान गरिनेछ ।

विगतमा महाभूकम्प र नाकाबन्दीले महोत्सव आयोजना गर्न नसकिएको आयोजकले बताए । तर, त्यसपछि फेस्टिवलले निरन्तरता पाएको र आठौं संस्कारणका लागि केही दिनमा मिति घोषणा गर्ने आयोजकले बताए ।

फेस्टिवलमा ५ हजार दर्शकको उपस्थिति रहेको आयोजकको दाबी छ ।

प्रकाशित मिति: बुधबार, चैत २७, २०७५ ०२:१३