पैसा नतिरी बाइक किन्ने ? यी डकुमेन्ट तयार पार्नुस्

A+ A A-

लकडाउनपश्चात् खुलेको अटो बजारमा व्यवसायी आक्रमक रूपमा प्रतिस्पर्धामा उत्रिँदा सस्तो मूल्यमा बाइक, स्कुटर तथा गाडी पाइन थालेकाे छ । व्यवसायीकाे बिक्री प्रतिस्पर्धाले गर्दा ग्राहकहरूले सस्ताे मूल्यमै बाइक, स्कुटर तथा गाडी खरिद गर्न पाउने भएका छन् ।

याे सबै काेभिड– १९ का कारण सरकारले लागू गरेकाे लकडाउनकाे प्रतिफल हाे । नत्र यसअघि ग्राहकहरूले यस्ता खाले अफर पाउन सधैँ चाडपर्व तथा नयाँ वर्ष नै पर्खिनुपर्थ्याे ।

तर अहिले धमाधम ऐतिहासिक रेकर्ड तोड्दै व्यवसायीहरूले पैसा नतिरी (शून्य डाउन पेमेन्ट)देखि शून्य ब्याजदरका अफर ल्याएर लकडाउनका कारण स्टक रहेका बाइक तथा स्कुटर बिक्री गरिरहेका छन् ।

प्रचलित ब्राण्डहरूले सहजै स्कुटर तथा बाइकहरू बेच्न थालेपछि ८० प्रतिशतले यो तीन हप्तामा बाइक तथा स्कुटर किनेका छन् । यदि तपाईंलाई पनि मन छ, तर डकुमेन्टेसन अनि कोरोनाको संक्रमणको जोखिमले गर्दा अलमलमा परेर मौकाको फाइदा उठाउन सक्नुभएको छैन भने थाहा पाउनुस्, कस्ताकस्ता डकुमेन्ट तपाईंले तयार पार्नुपर्ने हुन्छ ।

सर्वप्रथम तपाईंले स्किमका स्कुटर तथा बाइक किन्न चाहनुहुन्छ भने नेपाली भएको प्रमाणपत्र अर्थात् नागरिकताको प्रतिलिपि, सवारी चालक अनुमतिपत्र (लाइसेन्स),आफू बसेको घरको बिजुलीको बिल, जमानी बस्नेको नागरिकता र सो व्यक्तिको २ प्रति पासफोर्ट साइजको फोटोसहितको भौतिक उपस्थिति र आयस्रोत खुल्ने गरी तपाईं कार्यरत संस्थाको सिफारिसपत्र आवश्यक पर्नेछ ।

यदि तपाईंसँग सवारीचालक अनुमतिपत्र लाइसेन्स छैन भने तपाईंले सवारी खरिद गर्न पाउनु हुने छैन । तपाईंको लाइसेन्सको प्रतिलिपि राखेर मात्रै तपाईंले सवारी खरिद गर्न पाउनुहुनेछ । यदि जमानी बस्ने मानिस पाउनु भएन भने आफ्नै घरबेटीलाई पनि जमानीमा राख्न सक्नुहुनेछ । यसरी बसेका घरबेटी जमानी मात्रै बस्नेछन्, उनीहरूको तर्फबाट कुनै धितो राख्नुपर्ने छैन ।

यदि तपाईंले माथि दिएका सबै कागजपत्र भेला पारिसक्नुभएको छ भने तपाईंले अनुरोध गरेको शाेरुममा आधा घण्टादेखि १ घण्टाको अवधिमा तपाईंले आफूलाई मन परेकाे बाइक वा स्कुटर खरिद गर्न सक्नुहुनेछ । अर्थात् छोटो समयमा नै सबै प्रक्रिया पूरा गरेर तपाईंले सोही दिन नै शून्य डाउन पेमेन्टमा आफूले चाहेका जुनसुकै ब्राण्डको स्कुटर तथा बाइक खरिद गरेर लान सक्नुहुनेछ ।

प्रकाशित मिति: शुक्रबार, असार २६, २०७७ १८:०५