कर्जा अवधि थपिन्छ, धैर्य गर्नुस् : गभर्नर अधिकारी

A+ A A-

असार मसान्त लागेसँगै बैंकहरूले दिनहुँ कर्जा तिर्न व्यवसायीहरूलाई ताकेता गरेसँगै व्यवसायीहरू धमाधम सरकारलाई चाबी बुझाउन थालेका छन् । लकडाउनले व्यापार व्यवसाय चौपट गरेको भन्दै विगत केही दिनदेखि निरन्तर राहत प्याकेज माग गरिरहेका व्यवसायीहरू मसान्त लाग्दासमेत कुनै व्यवस्था नभएको भन्दै कर्जा तिर्नबाट हात उठाउन थालेका हुन् ।

यसरी एकपछि अर्को गर्दै व्यवसायीहरूले चाबी कहिले बैंकलाई त कहिले सरकारलाई बुझाउन थालेका छन् । शुक्रबार मात्रै न्युरोड र सुन्धाराका व्यवसायीहरूले चाबी बुझाएर कर्जा तिर्न नसक्ने घोषणा गरेका हुन् ।

सरकार ब्याज छुटभन्दा कर्जा तिर्ने अवधि लम्ब्याउनुपर्ने माग राखिरहेका व्यवसायीलाई नेपाल राष्ट्र बैंकले भने धैर्य गर्न आग्रह गर्दै आएको छ । गभर्नर अधिकारीले संकटकालीन अवस्थामा व्यवसायीको मर्का बुझेको भन्दै कर्जा भुक्तानीको अवधि थप गर्ने आश्वासन दिएका हुन् ।

आगामी मौद्रिक नीतिले लकडाउनले समस्याग्रस्त बनेका पेसा व्यवसायका लागि कर्जा अवधि थप गर्नुका साथै थप राहत प्याकेजको व्यवस्था गरिने हुँदा केही समय धैर्य गर्न आग्रह गर्दै आएका छन् ।

सरकारले लकडाउनले बन्द रहेका उद्योगी व्यवसायीलाई कर्जा तिर्नका लागि दिएको ३ महिनाको अवधि असार मसान्तमा सकिँदै छ । यतिबेला राष्ट्र बैंकले पुनः अवधि थप्ने नथप्नेबारे बैंकहरूलाई कुनै जानकारी नदिएको भन्दै बैकहरूले धमाधम किस्ता तिर्नका लागि दबाब दिन थालेका छन् ।

बैंकहरूले तिर्नै पर्ने दबाब दिन थालेपछि चाबी बुझाउँदै हात उठाएका व्यापारी तथा व्यवसायीलाई गभर्नर अधिकारीको आश्वासनले थोरै भए पनि आशा जागेको छ । गभर्नर अधिकारीले कोभिड–१९ बाट संकटग्रस्त अवस्थामा पुगेका व्यवसायलाई उचित राहत प्याकेज ल्याएर व्यवसायको वातावरण बनाई राख्नेमा विश्वस्त हुने आग्रह गरेका छन् ।

त्यति मात्र नभएर बैंक तथा वित्तीय संस्थाहरूलाई पनि कर्जा तिर्न आउन दबाब नदिनका लागि गभर्नरले आग्रह गरेका छन् । उनले समस्यामा नपरेका र तिर्न सक्ने ऋणीहरूले भने आफ्नो दायित्व यसै बेला पूरा गर्दै स्वतःस्फुर्त रूपमा कर्जा तिरेर बैंक तथा सरकार दुवैलाई सहयोग गर्न आग्रह गरेका छन् ।

गभर्नरको यो आश्वासनले गर्दा व्यवसायी थप आतंकित हुनबाट जोगिएका छन् ।