विपद् व्यवस्थापनमा नयाँ रणनीति अपनाउन गृहमन्त्री थापाको निर्देशन

A+ A A-

गृहमन्त्री रामबहादुर थापाले मनसुनका कारण उत्पन्न हुने विपदको व्यवस्थापनमा नयाँ रणनीति अपनाई काम गर्न निर्देशन दिएका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठकमा बोल्दै गृहमन्त्री थापाले अहिलेसम्म अपनाइएको सतर्कताले नपुग्ने भन्दै नयाँ रणनीतिका साथ अगाडि बढ्न निर्देशन दिएका हुन् ।

‘अब यसलाई कसरी समाधान गर्ने यो संकटलाई अहिले आएको र अब आउने भावि संकटलाई भनेर दुईवटा कुरा गर्न जरुरी छ । अब हामीले हाम्रो सतर्कता हाम्रो केन्द्रको कार्यसमिति यससित सम्बद्ध सबै विभागहरू सबै सरोकारवाला संघ संस्थाहरू यससित आवद्ध छन् । हामीले हाम्रो सतर्कतालाई उच्च अवस्थामा पुर्‍याउन जरुरी छ' उनले भने 'जसलाई हाइ एलर्ट हामी भन्छौं । हामी हाइ अलर्टको अवस्थामा रहन जरुरी छ, चौबिसै घण्टा । मलाई लाग्छ पक्कै पनि हाम्रा सबै सम्बद्ध संस्थाहरू विभागहरू सतर्क नै हुनुहुन्छ तर यति सतर्कताले पुग्दैन । यसलाई अझ बढाउन जरुरी छ भन्ने लाग्छ ।'

उनले संकटलाई समाधान गर्न केन्द्र सरकारको कार्यसमितिलगायत सरोकारवाला संघ संस्थाहरूलाई उच्च सतर्कतामा राख्नसमेत निर्देशन दिए । उनले घटना घटनासाथ उच्च सतर्कता अपनाई तुरुन्तै परिचालित हुने गरी काम गर्नसमेत निर्देशन दिए ।

'हामीले घटना घटनासाथ तुरुन्तै परिचालित हुन जरुरी छ । उच्च सतर्कता र तुरुन्तै परिचालित हुने तल हाम्रो स्थानीय तहहरूमा हामीले संरचना बनाएका छौँ जुध्नको निम्ति हाम्रो प्रदेश स्तरमा पनि छ केन्द्रस्तरमा पनि छ' उनले भने, 'केन्द्रस्तरमा विभिन्न अन्य संरचनाहरू पनि विभागिय भनौं अथवा विषयगत संरचनाहरू पनि हामीले बनाएका छौं । हामी सबै घटना घटनासाथ तुरुन्तै परिचालित हुन जरुरी छ ।’

गृहमन्त्री थापाले जेठदेखि नै मनसुन सुरु भएको र भदौसम्म रहने भएकाले यसबाट उत्पन्न हुने संकटको सामना गर्ने सन्दर्भमा नयाँ नीति र योजनाहरू अपनाउनुपर्नेमा जोड दिए । ‘घटनाको निरन्तर समीक्षा गर्दै हामीले यसलाई समाना गर्ने यससित जुध्ने र समस्याको समाधान गर्ने सन्दर्भमा फेरी हामीलाई नयाँनयाँ नीति, योजनाहरू पनि सँगसँगै अपडेट गर्दै जानुपर्ने हुन्छ’ उनले भने ।