सरकारविरुद्ध आन्दोलन गर्ने व्यवसायीको चेतावनी

A+ A A-

कोरोना भाइरस (कोभिड-१९) बाट प्रभावित उद्योगी व्यवसायीका लागि सरकारले राहत प्याकेज नल्याएको भन्दै नेपाल राष्ट्रिय व्यवसायी महासंघले चरणवद्ध आन्दोलन गर्ने चेतावनी दिएको छ ।

महासंघले बुधबार काठमाडौंमा पत्रकार सम्मेलन गरी कोरोना भाइरस (कोभिड– १९) का कारण लकडाउन भएपछि समस्यामा परेका उद्योगी व्यवसायीलाई सम्बोधन गर्न राहत प्याकेज नल्याए आन्दोलनमा जाने बताएको हो ।

महासंघका अध्यक्ष नरेश कटुवालले उद्योग कलकारखाना र व्यापार व्यवसाय ठप्प भएकाले समस्या बढेको भन्दै सरकारले उचित सम्बोधन नगरे शुक्रबारदेखि चरणवद्ध आन्दोलनमा जाने बताए । उनले लकडाउनको समयलाई शून्य समय मानेर ब्याजदर, कर, घरभाडा लगायतमा छुट पाउनुपर्ने बताए ।

महासंघले लकडाउन अवधिभरको बैंकको ब्याजदर शतप्रतिशत छुट गर्नुपर्ने, किस्ता र ब्याज तिर्ने समय एक वर्षपछाडि सार्नुपर्ने, पुनर्कर्जा कोषमा साना उद्योगी व्यवसायीहरूको पहुँच सुनिश्चित गर्नुपर्ने, कर्जाको ब्याजदर बढीमा ८ प्रतिशत कायम हुनुपर्ने, स्प्रेड रेट ३.५ प्रतिशत हुनुपर्ने, लकडाउन अवधिको व्यावसायिक घरभाडा छुट दिनुपर्नेलगायतका मागहरू राखिएको अध्यक्ष कटुवालले बताए । उनले लकडाउनका कारण उद्योग व्यवसायमा परेको असर अध्ययन गर्न निजीक्षेत्र सम्मिलित समन्वय समिति गठन गर्नसमेत माग गरे ।

व्यवसायीहरूले राखेका मागहरू पूरा गर्न दबाब दिन पहिलो चरणमा शुक्रबार काठमाडौंको माइतीघर मण्डलामा शान्तिपूर्ण विरोध प्रदर्शन गर्न लागिएको अध्यक्ष कटुवालले बताए । त्यसपछि पनि सरकार गम्भीर नबने चरणवद्ध आन्दोलनका कार्यक्रमहरू घोषणा गरेर अगाडि बढ्ने उनले बताए । उनले कोरोना महामारीका कारण प्रभावित भएका उद्योग, कलकारखाना र व्यवसायलाई बचाउनुपर्ने अवस्थामा सरकारको ध्यान अन्तै मोडिएकाले पनि आफूहरू आन्दोलित हुनुपरेको स्पस्ट पारे ।