प्रतिपक्षलाई पेलेरै सुदूरपश्चिममा बजेट पारित

A+ A A-

प्रतिपक्षको अवरोधकै बीच सुदूरपश्चिम प्रदेश सरकारको आगामी आर्थिक वर्ष २०७७/०७८ को बजेट बहुमतले पारित भएको छ ।

प्रतिपक्षी दलहरूले गरेको नाराबाजी र बेल घेराउबीच सुदूरपश्चिम प्रदेशसभाले आगामी आर्थिक वर्ष २०७७/०७८ को वार्षिक बजेट पारित गरेको हो ।

आज २ बजेको प्रदेशसभा बैठकमा सभामुख अर्जुनबहादुर थापाले नाराबाजीका बीच पनि संसदको कारबाही अघि बढाए ।

बैठकका सत्तारुढ दलका सांसद महेशदत्त जोशीले धारणा राखेपछि अर्थमन्त्रीले आएका प्रश्नमा जवाफ दिएका थिए । त्यसलगत्तै बजेट बहुमतले पास भएको थियो ।

यसअघि आज बिहान ८ बजेको बैठकमा आर्थिक मामिला तथा योजनामन्त्री झपट बोहराले अर्थसम्बन्धी प्रस्तावलाई कार्यान्वयन गर्न बनेको विधेयक तथा आगामी आर्थिक वर्षको सेवा र कार्यका लागि प्रदेश सञ्चित कोषबाट केही रकम खर्च गर्न र विनियोजन गर्ने सम्बन्धमा व्यवस्था गर्न बनेको विधेयकमाथिको छलफलको प्रस्ताव पेस गरेका थिए ।
त्यसपछि १ घण्टासम्मका लागि बैठक स्थगित भएको थियो ।

९ बजे आह्वान गरिएको अर्को बैठकमा सत्तारुढ दलका सांसद दुर्गा विकले धारणा राख्दै अर्थसम्बन्धी प्रस्तावलाई कार्यान्वयन गर्न बनेको विधेयक तथा सेवा र कार्यका लागि प्रदेश सञ्चित कोषबाट केही रकम खर्च गर्न र विनियोजन गर्ने सम्बन्धमा व्यवस्था गर्न बनेको विधेयक पारित गर्नुपर्ने बताइन् । उनको धारणपछि फेरि बैठक स्थगित भएको थियो ।

आज २ बजे तेस्रो पटक बैठक बसेको र बैठकमा सत्तापक्षले पेलेरै बहुमतका साथ बजेट पारित गरेको हो ।

प्रदेशसभामा प्रतिपक्षी दलहरू नेपाली कांग्रेस र जनता समाजवादी पार्टी (जसपा)ले कोरोना रोकथाम र नियन्त्रणमा सरकार पूर्ण उदासीन देखिएको भन्दै १० असारदेखि सदनमा अवरोध जारी राखेपछि संसद बैठक बारम्बार स्थगित हुँदै आएको थियो ।

प्रतिपक्षी दलहरूले कोरोना महामारीको प्रभावकारी नियन्त्रण र रोकथामका लागि प्रदेशमा पीसीआर जाँचको दायरा बढाउनुपर्ने, क्वारेन्टाइन तथा आइसोलेसनलाई व्यवस्थित गर्नुपर्ने, संक्रमितलाई आइसोलेसनमा राखेर उपचार गर्नुपर्ने तथा जनतालाई सुरक्षाको प्रत्याभूति दिनुपर्ने माग राखेका छन् ।

यस्तै, कोरोना महामारीका कारण आर्थिक तथा सामाजिक क्षेत्रमा परेको व्यापक दुष्प्रभावलाई दृष्टिगत गर्दै तदनुरूपका कार्यक्रम ल्याउनुपर्ने र कोरोना महामारीबाट आक्रान्त सुदूरपश्चिमबासीलाई राहत पुग्ने खालका कार्यक्रम ल्याउनुपर्नेलगायतका माग अघि सार्दै प्रतिपक्षीले संसदमा अवरोध गर्दै आएका छन् ।

आज बजेट पारित भएसँगै प्रदेशसभा बैठक अर्को सूचना प्रकाशित नभएसम्मका लागि स्थगित गरिएको छ ।

प्रकाशित मिति: बुधबार, असार २४, २०७७ १६:०९