१ सातामा १ हजारभन्दा धेरै कामदारले लिए पुनः श्रम स्वीकृति

A+ A A-

वैदेशिक रोजगारीबाट घर बिदामा आई कोरोना भाइरसका कारण रोकिएका कामदारले पुनः श्रम स्वीकृति लिने क्रम दैनिक रूपमा बढ्दो छ ।

सरकारले सर्त तोकेर वैदेशिक रोजगारी खुला गरेसँगै ६ दिनको अवधिमा १ हजार ८६ जनाले पुनः श्रम स्वीकृति लिएको वैदेशिक रोजगार विभागअन्तर्गत श्रम कार्यालय ताहाचलले जानकारी दिएको छ ।

मंगलबारसम्म १ हजार ८६ जनाले पुन: श्रम स्वीकृति लिएका वैदेशिक रोजगार कार्यालय ताहाचलका प्रमुख उमेश बस्नेतले बताए ।

बिहीबारदेखि ताहाचल कार्यालयले यूएईका लागि ५ सय ३ जना, जापानका लागि १ सय ९०, मलेसियाका लागि ८०, कतारका लागि ४५, माल्टाका लागि १७ जनाले पुनः श्रम स्वीकृति लिएका छन् ।

श्रम स्वीकृति लिएका अन्य देशहरूमा अमेरिका, इजरायल, ओमान, दक्षिण कोरिया, पोल्याण्ड, बहराइन, कुवेतलगायत छन् ।

कार्यालयका अनुसार बिहीबार ५ जना र शुक्रबार २ जनाले पुनः श्रम स्वीकृति पाएका थिए । बिहीबार र शुक्रबार सर्भरमा प्राविधिक समस्या भएर श्रम स्वीकृति दिन नपाएपछि शनिबार पनि विभागको ताहाचलस्थित कार्यालय खोलिएको थियो ।

शनिबार ४७ जनाले पुनः श्रम स्वीकृति लिएका थिए । त्यस्तै, आइतबार ३ सय ४७ जना, सोमबार ४ सय १०, मंगलबार ३ सय १५ जनाले पुनः श्रम स्वीकृति लिएका छन् ।

अनलाइनमार्फत रीतपूर्वक फारम भरी पाइने टोकन अनुसारको मितिमा कार्यालयमा सेवा लिन सकिने कार्यालयले जानकारी दिएको छ ।

वैदेशिक रोजगारीमा नयाँ श्रम स्वीकृति लिएर जाने कामखारलाई कामदारलाई भने विदेश जान श्रम स्वीकृति दिइएको छैन ।

१५ असारमा बसेको मन्त्रिपरिषद्को बैठकले बिदामा नेपाल आएका तथा करार अवधि बाँकी रहेकाको हकमा कोभिड– १९ परीक्षण र स्वास्थ्यसम्बन्धी प्रोटोकलको पालना गर्ने गरी वैदेशिक रोजगारीमा जान दिने निर्णय गरेको थियो ।

कोरोना संकट व्यवस्थापन केन्द्र (सीसीएमसी) को ७ असारमा बसेको बैठकले श्रम, रोजगार तथा सामाजिक सुरक्षा मन्त्रालयलाई वैदेशिक रोजगारीमा जाने कामदारहरूका लागि श्रम स्वकिृति दिन सक्ने अधिकार दिएको थियो ।

प्रकाशित मिति: बुधबार, असार २४, २०७७ १४:२१