यस कारण अब ओली चाहिन्न

A+ A A-

सरकार र पार्टी दुवै चलाउन नसकेको भन्दै निरन्तर राजीनामा माग गरिरहेका कार्यकारी अध्यक्ष पुष्पकमल दाहाल (प्रचण्ड) र वरिष्ठ नेता माधवकुमार नेपाल समूह प्रधानमन्त्री तथा पार्टी अध्यक्ष केपी शर्मा ओलीलाई जसरी पनि हटाउने अभियानमा जुटेका छन् ।

प्रधानमन्त्री ओलीमा अहङ्कार देखिएकादेखि सरकार र पार्टी सञ्चालनमा सहकार्य नगरी एकलौटी गरेको आरोप ओलीमाथि लाग्दै आएको छ ।

नक्सा पास गरेपछि भारतीयहरू आफूलाई हटाउन लागिपरेको अभिव्यक्ति दिएपछि प्रधानमन्त्री ओलीमाथि प्रचण्ड–नेपाल समूह निकै आक्रामक देखिएका छन् ।

प्रचण्ड–नेपाल समूहलाई पेलेरै जाने नीति ओलीले अख्तियार गरेको भन्दै आक्रोशित नेकपाका स्थायी कमिटी सदस्यहरू उनको कार्यशैलीप्रति निरन्तर असन्तुष्ट छन् । आफूहरूलाई निरन्तर अपमान गरेर अघि बढेको निष्कर्ष निकाल्दै ओलीमाथि प्रचण्ड–नेपाल समूहले १० भन्दा बढी आरोप लगाएका छन् ।

राष्ट्रियतामा एकल स्वामित्व लिन खोजेको

नेपालको नयाँ नक्सा सार्वजनिकदेखि निशान छाप संशाेधनको स्वामित्व एकलौटी रूपमा लिन खोजेको उनीहरूले ओलीमाथि आरोप लगाउँदै आएका छन् ।

जुन दिन निशान छाप संशाेधन भयो, त्यो दिन संसदको रोष्ट्रमबाट प्रचण्डले तीन/तीन पटक भने, ‘यो काम एकल प्रयासले भएको होइन, यो हाम्रो साझा प्रयत्नले भएको हो, मैले मात्रै गरेको भन्ने हुन्न, यसमा सबै राजनीतिक दलले गरेका हुन् ।’

संविधान निर्माणताका भारतीय नाकाबन्दीसँग ओली मात्रै जुधेको तर अरु नेताले त्यसका विरुद्ध नलडेको सन्देश दिने काम ओलीले गरेको बुझाइ प्रचण्ड–नेपालको छ । भारतीय नाकाबन्दीसँग जुधेर चीनसँग पारवहन सम्झौता गरेपछि आफ्नो सरकार ढालिएको भन्दै प्रधानमन्त्री ओलीले निशान छाप संशाेधनपछि पनि सरकार ढाल्ने खेल हुने भन्दै गत १४ असारमा अभिव्यक्ति दिएका छन् ।

आफनै ‘फेस’ले दुई तिहाइ मत पाएको

प्रचण्ड–नेपाल समूहका अनुसार संविधान जारी भएपछि तत्कालीन नेकपा एमाले र नेकपा माओवादी केन्द्रबीच चुनावी गठबन्धन भए पनि नेकपाले दुईतिहाइ मत भने ‘आफ्नो फेस’ का कारण आएको बुझाइमा ओली रहँदै आएका छन् ।

संविधान जारी गरेको, भारतीय नाकाबन्दीसँग लडेको तथा संविधान निर्माण प्रक्रियाप्रति असन्तुष्टि जनाउँदै आन्दोलनरत मधेस केन्द्रित दललाई मिलाएको जस्ता कारणले नेकपालाई मत आएको तर त्यसको जस ओली आफैँले लिन खोजेको प्रचण्ड–नेपाल समूहको बुझाइ छ ।

‘आफू मात्रै राष्ट्रवादी अरु नेता दलालझैँ हुन् भनेझैँ गरी देखाउन खोजिरहनुभएको छ,’ १० असारको स्थायी कमिटी बैठकमा नेता नेपालले प्रष्ट रुपमा अभिव्यक्ति नै दिए ।

एक अर्कामा भिडाउने र खेलाउने

ओलीले पार्टीभित्र पनि प्रचण्ड र नेपालबीच मात्रै होइन, वरिष्ठ नेता झलनाथ खनाल र उपाध्यक्ष वामदेव गौतमका बीचमा पटकपटक खेलेर एकअर्कामा भिडाउन र लडाउन खोजेको आरोप छ ।

पार्टी एकीकरणताका वरिष्ठ नेता झलनाथ खनाल चीनमा थिए, त्यही बेला उनलाई घटुवा गरी नेपाललाई तेस्रो मर्यादाक्रममा राखेर वरिष्ठ नेता बनाउने काम भयो । त्यसमा खनालले निरन्तर आरोप लगाएपछि १ भदौमा बसेको सचिवालय बैठकले नेपाललाई चौथो स्थानमा झारेर खनाललाई तेस्रो स्थानमा राखियो ।

‘म खनालभन्दा तल छु भन्दा पनि एकीकरणमा बढी योगदान दिनुभएकाले ओलीजी आफैँले तेस्रोमा बस्नुहोस् भन्नुभयो, अहिले उहाँले मलाई फेरि चौथाेमा झार्ने प्रस्ताव ल्याउनुभयो,’ नेपालको गुनासो थियो, ‘कहिले कसलाई उचाल्ने, कहिले कसलाई उचाल्ने काम ओलीजीले गरेर निरन्तर मानमर्दन गरिरहनुभएको छ ।’

कालापानी मुद्दामा सरकारको विशेष दूत बनाएर नेपाललाई पठाउने भनिए पनि ओलीले कुनै काम गरिदिएनन्, बरु उल्टै कुप्रचार सार्वजनिक गरेर ‘पेन्डुलम’ बनाएको गुनासो नेपालको छ ।

त्यति मात्रै होइन, ४ मंसिर, २०७६ मा प्रचण्डलाई कार्यकारी अधिकार दिने निर्णय गरे पनि बैठक सञ्चालन गर्न नदिएको, बैठकको अध्यक्षता गर्न नदिएको जस्ता गुनासो प्रचण्डका छन् ।

वामदेव गौतमलाई कहिले प्रतिनिधिसभामा लैजाने, कहिले राष्ट्रियसभामा लैजानेदेखि प्रधानमन्त्रीसम्म बनाउने आश्वासन दिएकोमा समेत प्रचण्ड–नेपाल समूह ओलीप्रति असन्तुष्ट छ ।

मुख्यतः गौतमलाई विश्वासमा लिएर ओलीले धेरै पटक प्रचण्ड–नेपालविरुद्ध उकासेको पनि उनीहरूको गुनासो छ । गौतमले एउटा बैठकमा मुख नै फोरे, ‘कहिले प्रचण्डजीहरू जंगली हुन्, तिनकाे भर गर्नु हुन्न भन्नुहुन्छ, फेरि प्रचण्डसँग मिल्नुहुन्छ अनि मलाई र माधव कमरेडलाई पाखा लगाउनुहुन्छ, कहिले झलनाथ र माधव कमरेडलाई जुधाउनुहुन्छ, अब त अति भयो ।’

निरन्तर अपमानजनक शब्द प्रहार

ओलीले निरन्तर आफुहरूमाथि अपमानजनक शब्द प्रहार गरेका कारण पनि प्रचण्ड–नेपाल समूह ओलीप्रति चरम असन्तुष्ट छ । ओलीले प्रधानमन्त्री बनाउँछु भनेर एउटा सचिवालय बैठकमा धारणा राखेपछि गौतम विश्वस्त भए तर उनले एक दिन ओलीलाई सोधे, ‘खै त मलाई प्रधानमन्त्री बनाउनु भएको ?’

ओलीको जवाफ थियो, ‘तपाईंलाई अंग्रेजी त आउँदैन, अंग्रेजी आउने भए त बनाइसक्थेँ नि !’ गौतमले खुमलटारमा भएको एउटा बैठकमा यो भनाइ सुनाउँदै आफूलाई ओलीले निकै अपमान गरेको भन्दै ‘बदला’ लिने प्रतिवद्धता नै जनाएको एक जना नेता बताउँछन् ।

उता, सिंगापुरमा उपचार गर्न जानुअघि बसेको सचिवालय बैठकमा नेता नेपालले ‘शीघ्र स्वास्थ्यलाभको कामना’ गरे तर ओलीले रुखो स्वरमा जवाफ फर्काए, ‘मलाई तपाईंको कुनै पनि शुभकामना चाहिन्न ।’

वरिष्ठ नेतामा बढुवा गरे पनि आफ्नो पक्षमा नउभिएपछि ओलीले खनाललाई वास्ता नै गर्न छाडिदिएका छन् । वार्तामा समेत बोलाउँदैनन् । खनालको सधैँ एउटै गुनासो छ, ‘मलाई त उहाँ (ओलीले) देखिसहनु हुन्न ।’

सरकार सञ्चालनमा सल्लाह नै गर्दैनन्

प्रचण्ड–नेपाल समूह ओलीलाई दुवै पदबाट हटाउने निष्कर्षमा पुग्नुका पछि सरकार सञ्चालनमा सहयोग नमाग्नु र बेवास्ता गर्नु हो ।

‘सरकार सञ्चालन गर्ने सवालमा ओली कुनै राय र सल्लाह लिन्नन्, बरु नगर्नू भनेको काम गर्छन्,’ प्रचण्डनिकट एक स्थायी कमिटी सदस्य भन्छन्, ‘जस्तो कि पछिल्लो समय संसद स्थगन गर्दा पनि प्रचण्डसँग सल्लाह त गरे तर दिएको राय ओलीले स्वीकार गरेनन् ।’

सरकारका राजनीतिक नियुक्तिदेखि पार्टीका नियुक्तिमा पनि ओलीले सल्लाह नगरेको प्रचण्ड–नेपाल समूहको भनाइ छ । प्रदेश प्रमुख चयन गर्दा पनि आफूसँग राय नलिएपछि नेपालले पटकपटक ‘नोट अफ डिसेन्ट’ लेख्दै आएका छन् तर सुनुवाइ भने अहिलेसम्म भएको छैन ।

प्रचण्ड–नेपाल विरोधीलाई प्राथमिकताका साथ नियुक्ति

प्रचण्ड र ओलीका विरोधीलाई मात्रै ओलीले राजनीतिक नियुक्तिदेखि पार्टीमा जिम्मेवारी दिएकोमा समेत प्रचण्ड–नेपाल समूह ओलीप्रति असन्तुष्ट छन् ।

१० असारको स्थायी कमिटी बैठकमा नेपालले रिसाउँदै मुखै खोले, ‘जो जो प्रचण्ड र मेरा विरोधी छन्, उनीहरूलाई छानीछानी राजनीतिक नियुक्ति दिनुहुन्छ, हेप्नुको पनि हद हुन्छ ।’ पछिल्ला नियुक्ति र मनोनयनहरूको शृङ्खला देखाउँदै नेपालले आपत्ति जनाउँदै आएका छन् ।

आफू बलियो नहुने देखे अड्काउने

ओलीले आफू बलियो हुने नदेखे सरकार र राजनीतिक दुवै कामहरू विभिन्न कारण देखाउँदै अड्काउने तर काम अघि नबढाउने गर्दै आएका छन् । संवैधानिक परिषदका नियुक्ति होस् वा अन्य राजनीतिक नियुक्ति, सोही कारण अड्किएको प्रचण्ड–नेपालको आरोप छ ।

अरुले चलाएका मन्त्रालयका नियुक्तिहरूमा पनि ‘इन्ट्रेस्ट’ राख्दै नियुक्ति गर्न आनाकानी गर्न आफूनिकट मान्छे नै त्यहाँ राख्नुपर्ने, नराखेसम्म मन्त्रिपरिषदबाट निर्णय गराउन नदिने काम ओलीले गर्दै आएको प्रति पनि सो समूहको असन्तुष्टि छ ।

फसाउने दुर्नियत राख्ने

ओलीले प्रचण्ड र नेपाललाई विभिन्न आरोपमा फसाउने दुर्नियत राखेको पनि गम्भीर गुनासो गर्दै आएका छन् । नेता नेपालका अनुसार बालुवाटारस्थित ललिता निवास प्रकरणमा आफूलाई र लडाकू शिविर घोटाला तथा युद्ध अपराधमा प्रचण्डलाई फसाएर जेल हाल्न खोजिरहेको बताउँदै आएका छन् ।

आफ्नो मोबाइलमा भएको बालुवाटारको जग्गासम्बन्धी प्रतिवेदन र अख्तियारकाे पत्र देखाउँदै उनले सयौँ नेता कार्यकर्ता र सञ्चारकर्मीलाई देखाउँदै आएका छन् ।

राष्ट्रपतिको आडमा तर्साउने

राष्ट्रपति विद्यादेवी भण्डारीलाई ‘प्रयोग गरेर’ प्रचण्ड–नेपाल समूहलाई ओलीले तर्साउने काम गरेको आरोप पनि लाग्दै आएको छ ।

पार्टी फुटाएर नयाँ पार्टी गठन गर्न केन्द्रीय समिति र संसदीय दलमा दुवैतर्फ ४० प्रतिशत हुनुपर्ने पुरानो कानुन बदलेर जता भए पनि ४० प्रतिशत मत जुटाउन सके पार्टी फुटाउनेदेखि सल्लाहबिना नै संसद स्थगन गर्नेजस्ता घटनामा प्रधानमन्त्री ओलीले राष्ट्रपति विद्यादेवी भण्डारीलाई ‘प्रयोग गरेको’ प्रचण्ड–नेपालको भनाइ छ ।

त्यसैले प्रधानमन्त्री ओलीको ‘प्रयोग नहुनुहोस्’ भन्ने आग्रह गर्न प्रचण्ड–नेपाल–खनाललगायत २१ असारमा शीतल निवास पुगेका थिए ।

प्रचण्ड–नेपालले ‘वर्ग शत्रु’ झैँ आफूलाई व्यवहार गरेको भन्दै जसरी पनि ओलीलाई प्रधानमन्त्रीवाट हटाउने भनेर गत १५ असार १५ देखि निरन्तर लागिरहेका छन् ।

खुमलटारमा गुटका बैठकदेखि अँगेनो रेष्टुरेन्टमा सामूहिक भेला गरेर ओलीलाई हटाउने प्रतिवद्धता जनाउँदै ‘यस पटक नछाडने’ भन्दै आएका छन् । तर, प्रधानमन्त्री ओलीले ‘प्रधानमन्त्री र अध्यक्ष दुवै पद नछाड्ने’ अडान कस्दै आएका छन् । यद्यपि, तीन तीन पटक स्थायी कमिटी बैठक स्थगित गरेर दुई अध्यक्ष ओली– प्रचण्ड निरन्तर वार्तामा छन् तर निकास भने अझै निस्केको छैन ।

बलियो देखाउन कार्यकर्ता उकास्ने

अध्यक्षसमेत रहेका प्रधानमन्त्रीले कार्यकारी अध्यक्षसहित वरिष्ठ नेताहरूलाई बाइपास गर्दै एकलौटी सरकार र पार्टी चलाउन कार्यकर्ता उकासेका कारण पनि प्रचण्ड–नेपाल समूह ओलीलाई हटाउने निष्कर्षमा पुगेका हुन् ।

स्थायी कमिटी बैठकमा हटाउने एजेण्डा सारेलगत्तै ओलीले सत्ताको आडमा देशभर कार्यकर्ता परिचालन गरेर पदीय दुरुपयोग गरेको उनीहरूको आरोप छ ।

ओलीका पक्षमा ‘आजलाई होइन, भोलिलाई, पाँच वर्ष केपी ओलीलाई’ लगायतका नारा लेखेका ब्यानर बोकेर कार्यकर्ताको दुरुपयोग गरेको उनीहरूको आरोप छ ।

केन्द्रीय सदस्य रामकुमारी झाँक्रीलगायतका नेताले त सार्वजनिक रूपमै ओलीले कार्यकर्ताको चरम दुरुपयोग गरेको बताएका छन् ।

‘आफ्ना कमजोरी ढाकछोप गर्न ओलीले कार्यकर्ताको समेत हदैसम्मको दुरुपयोग गरेका छन्, अब पनि दुवै पदबाट उनलाई नहटाउने हो भने नेकपाको भविष्य अन्योलमा पर्छ,’ झाँक्री भन्छिन् ।

प्रकाशित मिति: बुधबार, असार २४, २०७७ १२:०३