काठमाडौँ महानगरपालिकाको बजेट सर्वसम्मतिबाट पारित

A+ A A-

काठमाडौँ महानगरपालिकाको आर्थिक वर्ष (आव) २०७७/०७८ को बजेट सुझावसहित सर्वसम्मतिले पारित भएको छ । महानगरपालिकाे नगरसभाकाे सातौँ अधिवेशनले आव २०७७/०७८ को नीति तथा कार्यक्रम, बजेट तथा कार्यक्रम, विनियोजन विधेयक, २०७७ र आर्थिक विधेयक, २०७७ सर्वसम्मतिले पारित गरेको हो ।

नगरसभाले लेखा समिति, सुशासन समिति र न्यायिक समितिको प्रतिवेदनमाथि पनि छलफल गरी कार्यान्वयनका लागि आवश्यक निर्णयका लागि कार्यपालिका बैठकमा पठाउने निर्णयसमेत गरेको छ ।

४ असारमा बसेको नगरसभाकाे सातौँ अधिवेशनको पहिलो बैठकले नीति तथा कार्यक्रम पारित गरेको थियो । १० असारकाे नगरसभा अधिवेशनको दोस्रो बैठकमा काठमाडौँ महानगरपालिकाका प्रमुख विद्यासुन्दर शाक्यले आर्थिक विधेयक र उपमेयर हरिप्रभा खड्गी (श्रेष्ठ)ले महानगरपालिकाको आगामी आव २०७७/०७८ को बजेट तथा कार्यक्रम र विनियोजन विधेयक सभासमक्ष पेस गरेकी थिइन् । बजेट पारित गर्नुअघि २० जना नगरसभा सदस्यले आ–आफ्ना धारणा राखेका थिए ।

प्रमुख शाक्यले बैठकमा सम्बाेधन गर्दै सकेसम्म बजेटको सिलिङ तलमाथि नपर्ने गरी नगरसभा सदस्यहरूको भावनालाई समेट्ने प्रतिवद्धता व्यक्त गरेका छन् ।

बजेटमा कोभिड– १९ को प्रभावले घरभाडामा बस्ने नगरवासीहरूलाई कम्तीमा एक महिनाको घर बहाल छुट दिन आग्रह गरेको छ । छुट गरेमा घरधनीलाई आगामी आवको घर बहाल करमा १० प्रतिशत छुट हुने व्यवस्था गरेको छ ।

त्यसैगरी, करदाताहरूबाट असुल हुन बाँकी चालू आवकोे सबै प्रकारका कर वक्यौतामा लाग्ने जरिमानामा पूरै छुट दिइएको छ ।

महानगरपालिकाले आगामी आर्थिक वर्षमा सम्पदा संरक्षण तथा सम्वर्दन र पूर्वाधार विकासलाई महत्त्व दिई बजेट विनियोजन गरेको छ । गोष्ठी, तालिम, सम्मेलन र अन्य प्रशासनिक खर्चमा केही बजेट कटौती गरिएको छ ।

उपप्रमुख श्रेष्ठले नगरसभाको दोस्रो बैठकमा आगामी आव २०७७/०७८ का लागि १६ अर्ब ४२ करोड ७३ लाख २६ हजार रुपैयाँको अनुमानित बजेट तथा कार्यक्रम प्रस्तुत गरेका थिए ।

प्रकाशित मिति: मंगलबार, असार २३, २०७७ १७:००