को हुन् २८औँ आईजीपीमा नियुक्त थापा ?

A+ A A-

नेपाल प्रहरीको सर्वोच्च कमाण्डर प्रहरी महानिरीक्षक (आईजीपी) मा शैलेश थापा क्षत्री नियुक्त भएका छन् ।

मंगलबार बसेको मन्त्रिपरिषद्को बैठकले आईजीपीमा प्रहरी अतिरिक्त महानिरीक्षक (एआईजी) थापालाई आईजीपीमा नियुक्त गरेको हो । उनी नेपाल प्रहरीको २८औँ आईजीपी हुन् ।

हालका आईजीपी ठाकुरप्रसाद ज्ञवालीले ३० वर्षे प्रहरी सेवा अवधिका कारण अनिवार्य अवकाश पाएपछि सरकारले थापालाई नियुक्त गरेको हो । ज्ञवाली गत २८ माघमा आईजीपी नियुक्त भएका थिए ।

को हुन् आईजीपी थापा ?

भक्तपुको कटुञ्जेमा २३ मंसिर २०२५ सालका जन्मिएका थापा २ जना दाजुभाइमध्ये कान्छा हुन् । उनले त्रिभुवन विश्वविद्यालयबाट राजनीतिशास्त्रमा स्नातकाेत्तर पूरा गरेका छन् ।

१९ वैशाख २०४९ सालमा इक्सपेक्टरबाट सेवा सुरु गरेका उनले एसपी हुँदासम्मका विभिन्न समयमा राष्ट्रिय प्रहरी प्रशिक्षण प्रतिष्ठान महाराजगञ्ज र प्रहरी महानिरीक्षकको सचिवालयमा बसेर काम गरिसकेका छन् ।

एसपी हुँदा थापाले जिल्ला प्रहरी कार्यालय कास्की, झापा, डीएसपी हुँदा जिल्ला प्रहरी कार्यालय धादिङको कमाण्ड सम्हालिसकेका छन् । त्यसैगरी उनले इन्स्पेक्टर हुँदा सल्यान, सिन्धुपाल्चोकमा समेत काम गरेको अनुभव छ ।

एसएसपी हुँदा प्रहरी प्रधान कार्यालयको प्रवक्ता भएका क्षत्री डीआईजीमा पनि प्रवक्ता नै भएर काम गरेका छन् । त्यसरी नै डीआईजी हुँदा उनले महानगरीय प्रहरी कार्यालय रानीपोखरीको प्रमुख भएर काम गरिसकेका छन् ।

प्रहरी संगठनभित्र प्रशासनबारे राम्रो अनुभव सँगालेका थापाले एआईजी हुँदा मानव स्रोत एवं प्रशासन विभागमा प्रमुख थिए । थापाका बुबा शम्भु थापा पनि नेपाल प्रहरीका पूर्वडीआईजी हुन् ।

प्रकाशित मिति: मंगलबार, असार २३, २०७७ १९:२२