शेयरमा हरियाली छाउँदा ५ कम्पनीमा पोजिटिभ सर्किट, कसले कति कमाए ?

A+ A A-

२ दिनदेखि हरियाली छाउँदै आएको शेयर बजारमा मंगलबार कुनै पनि समूहको सूचक रातो देखिएन । बजार खुलेसँगै सकारात्मक देखिएको नेप्से सूचक ३७.९३ अंकले बढेर १३३६.६६ अंकमा बन्द हुँदा ५ वटा कम्पनीले प्रशस्तै कमाएका छन् भने १७ कम्पनीले ९ प्रतिशले कमाएका छन् ।

मंगलबार कारोबारमा सहभागी भएका १ सय ७८ कम्पनीको २८ लाख ८३ हजार ९ सय ४८ कित्ता शेयर १ अर्ब २१ करोड २४ लाख २६ हजार २ सय ६७ रुपैैयाँमा खरिदबिक्री भए । कारोबार खर्ब नाघ्दा निर्जीवन बीमा समूहको सूचक सबैभन्दा धेरै ६.३२ प्रतिशतले बढेको छ ।

मंगलबारको कारोबारमा सबैभन्दा धेरै मञ्जुश्री फाइनान्स लिमिटेड, नेपाल रिइन्स्योरेन्स कम्पनी, नेपाल सेभा लघुवित्त वित्तीय संस्था लिमिटेड, ओरियन्टल होटल र प्रुडेन्सियल इन्स्योरेन्सको शेयर मूल्य बढेको छ ।

१० प्रतिशतले शेयर मूल्य बढ्दा यी ५ वटै कम्पनीको पोजिटिभ सर्किट ब्रेक भएको थियो । यीबाहेक बाँकी १७ कम्पनीले ९ प्रतिशतभन्दा बढीले कमाएका छन् ।

यस्तो छ सबैभन्दा धेरै कमाउने कम्पनीको कारोबारको स्थिति

मंगलबार सबैभन्दा अगाडि प्रुडेन्सियल इन्स्योरेन्सको पोजिटिभ सर्किट ब्रेक भएर खुलेको एक घण्टा बित्न नपाउँदै प्रुडेन्सियल इन्स्योरेन्सले प्रति कित्ता शेयर मूल्य २० रुपैयाँले बढाउँदै १० प्रतिशतको सर्किट ब्रेक गर्‍यो ।

यसको अधिकतम ४ सय १० र न्यूनत्तम ३ सय ८० रुपैयाँमा १ हजार ७ सय ८८ कित्ता शेयर १४ पटकसम्म खरिदबिक्री भएको छ ।

त्यस्तै, पोजिटिभ सर्किट लाग्ने दोस्रोमा रहेको छ, ओरियन्टल होटल्स लिमिटेड । ओरियन्टलले पनि १० प्रतिशतले शेयर मूल्य बढाउँदा ४ हजार ८ सय ७१ कित्ता शेयर खरिदबिक्री गर्न सफल भयो ।

२४ रुपैयाँले बढेको शेयर मूल्यमा आज दिनभर १५ पटक कारोबार भयो । मंगलबार अधिकतम २ सय ९० र न्यूनत्तम २ सय ६२ रुपैयाँमा सर्वसाधारणले शेयर किनेका थिए ।

तेस्रोमा आउँछ, नेपाल सेभा लघुवित्त वित्तीय संस्था । नेपाल सेभा लघुवित्तले ३५ रुपैयाँले शेयर मूल्य बढाउँदै पोजिटिभ सर्किट लाग्न सफल भयो ।

यसको १ सय ८० कित्ता मात्र शेयर १३ पटक किनबेच हुँदा ९९ हजार ९ सय १० रुपैयाँमा कारोबार भयो । थोरै कित्ता शेयर खरिदबिक्री भए पनि शेयर मूल्य भने राम्ररी बढेको छ । यसको मंगलबारको प्रति कित्ताको मूल्य धेरैमा ५ सय ७० र थोरैमा ५ सय २७ रुपैयाँ रह्यो ।

चौथोमा छ, नेपाल रिइन्स्योरेन्स कम्पनी । नेपाल रिइन्स्योरेन्स कम्पनीले आज मात्र नभएर लगातार ३ दिनदेखि शेयर मूल्य बढाउँदै पोजिटिभ सिर्किट लगाउन सफल बनेको छ ।

३ दिनसम्म १० प्रतिशतले शेयर मूल्य बढाएको यस कम्पनीको मंगलबार पनि ४० रुपैयाँले बढाउन सफल भएको छ । कारोबार सुरु भएको डेढ घण्टामा नै ३ लाख ३७ हजार २ सय ९३ कित्ता ७ हजार ४ सय ६६ पटक किनबेच हुँदा सर्किट ब्रेक लागेको हो ।

मंगलबार शेयरमुल्य बढेर धेरैमा ४ सय १० र थोरैमा ४ सय रुपैया खरिदविक्री भएको छ । विचमा केहि समय मुल्य घटेपनि अन्तिमा बढेर सर्किट लागेको हो ।

लागातार शेयर मूल्य बढ्दा लगानीकर्ताको चाप पनि अरू कम्पनीमा भन्दा नेपाल रिइन्स्योरेन्स कम्पनीमा बढी देखिएको छ । कम्पनीका शेयरधनी बढेको मौका छोप्दै बेच्न उत्रिए भने लगातार हरियाली देख्दा किन्ने लगानीकर्ताको ध्यान पनि यतै खिचियो, जसले गर्दा कारोबारमा लगानीकर्ताको चाप देखियो ।

कारोबारको समय सकिनै लाग्दा मञ्जुश्री फाइनान्सले पनि १० प्रतिशतले शेयर मूल्य बढाउँदै पोजिटिभ सर्किट ब्रेक गर्न सफल भयो । मञ्जुश्रीको मंगलबार ८ हजार ७ सय १७ कित्ता शेयर २५ पटकसम्म खरिदबिक्री भयो ।

मंगलबार लगानीकर्ताले सबैभन्दा धेरै २ सय ६० रुपैयाँ र थोरैमा २ सय ५३ रुपैयाँमा शेयर किनबेच गरे । समग्रमा नेप्से सूचकसँगै कारोबार रकमा पनि सुधार हुँदै गएपछि लगानीकर्तामा थप राहत महसुस भएको शेयर जानकारहरू बताउँछन् । कारोबारको स्थिति सुधारात्मक हुँदै नेप्से सूचक संयम तवरमा थपघट हुनुले लागानी डुब्ने खतरा केही कम हुने विज्ञहरूको भनाइ छ ।

पुँजी बजारसमाचार शेयरमा ३३ अंकको वृद्धि १ सय १९ कम्पनीले कमाए

अस्थिर बन्दै सेयर बजार, कुन-कुन कम्पनी उकालो लाग्दै छन् ?

शेयर बजारमा अस्वाभाविक उतारचढाव

प्रकाशित मिति: मंगलबार, असार २३, २०७७ १६:०१