डडेल्धुरामा लकडाउनमै दर्जनौँ सिँचाई योजना सम्पन्न

A+ A A-

डडेल्धुरामा लकडाउन अवधिमा दर्जनाैँ सिँचाई योजना सम्पन्न भएका छन् । जिल्लाको अन्न भण्डार मानिने भित्रिमधेस क्षेत्रमा लकडाउन अवधिमा दर्जनाैँ सिँचाई योजना सम्पन्न भएका हुन् ।

पञ्चायतकालदेखि निर्माणाधिन थक्लेनी सिँचाई योजनाबाट अब भने किसानको बारीसम्म पानी पुग्ने भएको छ ।

सुदूरपश्चिम प्रदेश सरकार मातहतको सिँचाई तथा जनश्रोत विकास डिभिजन कार्यालय डडेल्धुराद्वारा भित्रिमधेस क्षेत्रका विभिन्न स्थानमा कार्यान्यवन भइरहेका दर्जनौ सिँचाई योजना सम्पन्न भई खेतसम्म पानी पुगेको छ भने मर्मत सम्भारको अभावमा अवरुद्ध सिँचाई योजनामा पनि पानी सुचारु भएको छ ।

विकट मानिने परशुराम नगरपालिका-१ का कोलखान, बोडा, पाथी र मकला गाँउका २ सय ८६ घरधुरी किसानलाई लक्षित गरेर २०४४ सालदेखि कार्यान्यवन सुरु भएको थक्लेनी सिँचाई योजनाको झण्डै ८० प्रतिशत भौतिक प्रगती लकडाउन अवधिमा हासिल भएको जलश्रोत तथा सिँचाई विकास डिभिजन कार्यालय डडेल्धुराले जनाएको छ ।

बस्तीदेखि झण्डै ५ किलोमिटरको दूरीमा रहेको थक्लेनी खोलाबाट १ सय १० एमएमको पाइपमार्फत् गाँउसम्म पानी पुर्‍याउन सकिएको डिभिजन प्रमुख मोहनदेव भट्टले बताए ।

२०४४ सालदेखि हालसम्म पटकपटक बजेट विनियोजन भई काम गरिएको भए पनि गत आर्थिक वर्षदेखि जलश्रोत तथा सिँचाई विकास डिभिजन कार्यालय डडेल्धुराले पाइपमार्फत् सिँचाई योजना निर्माण कार्य सुरु गरेको हो ।

‘यस वर्ष लकडाउन अवधिमा बस्तीसम्म पानी पुर्‍याउन सफल भएका छौँ,’ थक्लेनी सिँचाई योजना उपभोक्ता समितिका अध्यक्ष लालबहादुर धामीले भने, ‘गत वर्ष थोरै काम भएको हो । यस वर्ष लकडाउन अवधिमा योजना निर्माण कार्य दु्रत गतिले अघि बढेकाले चाँडै सम्पन्न हुने उपभोक्तामा विश्वास बढेको छ ।’

पटकपटक सिँचाई योजनाका लागि बजेट खर्च हुने गरे पनि निर्माण कार्य नसकिँदै पहिरोले क्षति पुर्‍याउँदा हालसम्म गाँउसम्म पानी ल्याउन नसकिएको उपभोक्ता बताउँछन् ।

सो योजना पाइपलाइनबाट सम्पन्न गर्न सुदूरपश्चिम प्रदेश सरकारको भौतिक पूर्वाधार विकास मन्त्रालयले डीपीआर तयार गरेपछि गत आर्थिक वर्षदेखि सिँचाई योजना निर्माण कार्य सुरु भएको हो ।

लकडाउनमा सामाजिक दूरी कायम गरेर योजना निर्माण कार्य अघि बढाइएको र योजनाका लागि आवश्यक सामग्री सवारी पास बनाएर निर्माणस्थलसम्म पुगाइएको उपभोक्ता समितिका अध्यक्ष धामी बताउँछन् ।

कोलखान, बोडा, पाथी र मकाला ४ ओटै गाँउमा आरभीटी निर्माण कार्य अघि बढाइएको र आरभीटी निर्माण भइसकेपछि योजना सम्पन्न हुने जलश्रोत तथा सिँचाई विकास डिभिजन कार्यालय डडेल्धुराका प्रावधिक बताउँछन् ।

घुम्टीगडा सिँचाई योजनाको पानी बस्तीसम्म

परशुराम नगरपालिका-७ घुम्टीगडामा पनि ८ किलोमिटर दूरीबाट पाइपमार्फत् पानी गाँउसम्म पुगाइएको छ । ७ स्थानमा रोपवे क्रसिङमार्फत् नयाँ प्रविधि प्रयोग गरेर घुम्टीगडा सिँचाई योजनाको पानी बस्तीसम्म पुगिसकेको र ९० परिवार सो सिँचाई योजनाबाट लाभान्वित हुने जलश्रोत तथा सिँचाई विकास डिभिजन कार्यालय डडेल्धुराले जनाएको छ ।

अत्यन्तै चुनौतीका बीच लकडाउन अवधिमा योजना निर्माण कार्य सम्पन्न हुन थालेको घुम्टीगडा सिँचाई योजना उपभोक्ता समितिका अध्यक्ष कर्णबहादुर धामीले बताए ।

२०५६ सालको बाढीले बगाएर बस्ती सखाप भएपछि हाल तटबन्ध निर्माण गरेर पुर्नस्थापित भएका परशुराम नगरपालिका–६ का सरगौडा, ठण्डाजाला र सिमलखेत गाँउका ३ वटा सिँचाई योजना निर्माण गरिएका छन् भने परशुराम नगरपालिका–९ मा गाईबाँधे र कुयापानी सिँचाईको काम सम्पन्न भएको छ ।

उत्तर मकैल र शिर्ष सिँचाई योजना पनि सम्पन्न

परशुराम नगरपालिका–३ स्थित उत्तर मकैल सिँचाई योजनाको झण्डै ७० प्रतिशत कामसमेत लकडाउन अवधिमा सम्पन्न गरिएको छ ।

परशुराम नगरपालिकामा धान उत्पादनका लागि अग्रणी मानिने परिगाँउस्थित ३ ओटा सिँचाई योजनाको मर्मतसम्भार भएर पानी सुचारु भएको छ भने कटालस्थित शिर्ष सिँचाई योजनाको मर्मतसम्भार कार्यसमेत लकडाउन अवधिमा सम्पन्न भएको उपभोक्ता समितिका अध्यक्ष गणेशसिंह थलालले बताए ।

सुदूरपश्चिम प्रदेश सरकारका भौतिक पूर्वाधार विकासमन्त्री पठानसिंह बोहराले डडेल्धुराको भित्रिमधेस क्षेत्र खाद्यान उत्पादनका साथै फलफूल, तरकारी, मसलाजन्य बाली उत्पादनका लागि पनि अग्रणी भएकाले आत्मनिर्भर अर्थतन्त्रको विकासकासाथै कोरोना महामारीको सन्त्रासका कारण विदेशबाट फर्किएका युवाहरुलाई कृषि उद्यमतर्फ आकर्षित गर्न सिँचाई योजना प्रभावकारीरूपमा कार्यान्यवन भइरहेको बताए ।

उनका अनुसार सानको वास्तविक आवश्यकतामा आधारित सिँचाई योजना कार्यान्यवन भइरहेकाले लकडाउन अवधिमा पनि द्रुत गतिमा सिँचाई योजना निर्माण गरिएका हुन् ।

प्रकाशित मिति: मंगलबार, असार २३, २०७७ १०:१६