जनकपुरमा मास्क नलगाउनेमाथि धमाधम कारबाही

A+ A A-

तपाईंको मास्क खोइ ? मिलेर किन घुमिरहनु भएको ? सोमबार जनकपुर नगरक्षेत्रका विभिन्न चोक र बजारमा प्रहरीले मास्क नलगाएरै घुमफिर गरिरहेका वा सोसल डिस्टेन्स विना घुमिरहेका सर्वसाधारणलाई रोकेर सोधपुछ गर्दै थिए । कतिले गोजीमा मास्क राखेर हिँडेका थिए भने कति गर्मीले गर्दा मास्क नै नलगाएर हिँडेका थिए ।

तर, प्रहरीले मास्कको निगरानी बढाएपछि मास्क नलगाउनेहरू माफी माग्दै आफूसँग भएको गम्छा वा शरीरमा लगाएको लुगाले नै नाक छोपी हिँडे । आज बिहानैदेखि चोक-चोकमा यस्तै चेकजाँच भइरहेको छ ।

मास्क नै नलगाएर अटेर गर्ने १ सय ५२ जनाभन्दा बढी सर्वसाधारणलाई नियन्त्रणमा समेत लिएर १ सय रूपैयाँ जरिवाना तिर्न लगाइयो । कोभिड-१९ को संक्रमण तीव्र गतिमा फैलिरहँदा सुरक्षाका उपायप्रति जनस्तरमा हेलचक्राइ बढ्दै गएको हो ।

लकडाउन खुकुलो भएदेखि सर्वसाधारणले मास्क नै नलगाइ हिँड्ने र सामाजिक दूरीको कुनै ख्याल नगरेपछि प्रहरीले सार्वजनिक हितको लागि मास्कमाथि निगरानी सुरु गरेको धनुषाका प्रहरी उपरीक्षक रामेश्वर बस्नेतले बताए । हिजोसम्म कोरोनाको असर केही देखिदैन थियो । बैंक वा सरकारी कार्यालयहरूमा सर्वसाधारणको त्यतिकै भीड देखिन्थ्यो । बजार र पेठियामा विना मास्क लगाएर सोसल डिस्टेन्स पालन नगरिकन नै मानिसहरू घुम्ने गर्थे ।

कोरोना संक्रमण नियन्त्रण एवं न्यूनीकरण गर्न जिल्ला प्रशासन कार्यालय धनुषाबाट प्राप्त निर्देशनानुसार मास्क प्रयोग नगर्नेहरूलाई कारबाही गरिएको जिल्ला प्रहरी कार्यालय धनुषाका प्रहरी नायव उपरीक्षक रामेश्वर कार्कीले बताए । लकडाउन खुकुलो भएसँगै बजारमा चहलपहल बढ्न थालेपछि कोरोना संक्रमणको त्रास बढेको भन्दै जिल्ला विपद् व्यवस्थापन समितिले यस्तो निर्णय गरेको हो ।

आजदेखि घर बाहिर निस्कदा मास्क अनिवार्य लगाउन समितिले आग्रह गरेको छ । जिल्ला विपद् व्यवस्थापन समितिको आग्रहलाई नमाने संक्रामक रोग ऐन २०२० अनुसार कारवाही गरिने धनुषाका प्रमुख जिल्ला अधिकारी कोषहरि निरौलाले जानकारी दिए ।

'मास्क लगाउन र सामाजिक दूरी कायम गराउन हामी निरन्तर माइकिङ गरिरहेका छौँ । त्यसैगरी अहिले मास्क निगरानी पनि बढाएका छौँ' उनले भने ।

प्रदेश २ मा संक्रमितको संख्या दिनदिनै बढिरहेको छ । आजसम्म मात्रै ३ हजार ७ सय ३७ पुगेको छ । संक्रमितमध्ये ३ हजार ४ सय ९० पुरुष र २ सय ४७ जना महिला रहेको प्रदेश स्वास्थ्य निर्देशनालयका वरिष्ठ जनस्वास्थ्य प्रशासक विजय कुमार झाले जानकारी दिए । सावधानी नअपनाए प्रदेश २ मा परिस्थिति गम्भीर हुने चेतावनी स्वास्थ्यकर्मीहरूले दिइरहेका छन् ।