राष्ट्र र जनताप्रतिको जिम्मेवारी पूरा गर्न महानिरीक्षक खनालको निर्देशन

A+ A A-

सशस्त्र प्रहरी महानिरीक्षक शैलेन्द्र खनालले राष्ट्र र जनताको हितमा कार्य गर्न मातहत कमाण्डरलाई निर्देशन दिएका छन् ।

आइतबार हलचोकस्थित प्रधान कार्यालयमा कार्यरत सिनियर अधिकृत तथा उपत्यकामा कार्यरत कामण्डरहरूलाई निर्देशन दिँदै महानिरीक्षक खनालले राष्ट्र, जनता र संगठनको अहितमा काम गर्ने छुट कसैलाई नभएको बताए ।

संगठन स्थापनाकालको स्मरण गराउँँदै महानिरीक्षक खनालले संगठनका सयौं कर्मचारीको वलिदानबाट प्राप्त सफलतालाई व्यक्तिगत स्वार्थ र हितमा प्रयोग नगर्न निर्देशन दिए ।

संगठनको अनर्गल प्रचार गर्न केही व्यक्ति संलग्न भएको तर्फ इंगित गर्दै महानिरीक्षक खनालले आफ्नो जिम्मेवारी र दायित्व पूरा नगर्नेले संगठनसँग जोडिएर बस्नुको कुनै अर्थ नहुने वताउँदै राष्ट्र र जनताप्रतिको कर्तव्य सत्विचारका साथ सत्कर्ममा लागि सत्मार्गमा हिडेर सत्धर्म निभाउन निर्देशन दिए ।
आफूले कर्मचारीहरूको वृत्तिविकासलाई ध्यानमा राखि कुनै पनि कर्मचारीलाई अन्याय हुन नदिने दृढता व्यक्त गर्दै उनले संगठन भित्रको समस्या आपसी छलफलबाट नै समाधान हुने भएकोले स्वार्थपूर्ण ढंगले वाह्य दवाव दिन खोजे स्वीकार्य नहुने समेत स्पष्ट पारे ।

‘नेतृत्वलाई संगठनको चिन्ता छ । संगठनले मुलुकको प्रत्येक चूनौतीलाई सामना गर्दै अघि बढि रहेको छ त्यसैले प्रत्येक कर्मचारीले प्राप्त जिम्मेवारी र उत्तरदायित्वलाई अनुशासित व्यावसायिक र इमानदारिपूर्वक पूरा गर्नुपर्छ,’ उनले भने ।

नेपाल सरकारले लिएको समृद्ध नेपाल सुखी नेपालीको महान अभियानलाई पूरा गर्न सशस्त्र प्रहरी बल आफ्नो जिम्मेवारीमा प्रतिबद्ध रहेको बताउँदै महानिरीक्षक खनालले अन्य सुरक्षा निकायहरूसँगको सहकार्य र समन्वयमा राष्ट्रले लिएको लक्ष्य पुरा गर्ने कार्यमा सशस्त्र प्रहरी बल देश भरी नै परिचालित रहेको बताए ।

सो अवसरमा मानवश्रोत विभाग प्रमुख सशस्त्र प्रहरी अतिरिक्त महानिरीक्षक पुष्पराम केसीले चेन अफ कमाण्डमा चल्न र उच्च अनुशासित भएर कार्य गर्न मातहतलाई आग्रह गरे । कथा बनाएर संगठनको अनर्गल प्रचारले संगठनलाई फाइदा नपुग्ने वताउँदै उनले यसबाट कसैलाई क्षणिक फाइदा पुगे पनि यसले संगठनको अहित गर्ने बताए ।

त्यस्तै, सशस्त्र प्रहरी बल प्रशिक्षण प्रतिष्ठानका कार्यकारी निर्देशक सशस्त्र प्रहरी अतिरिक्त महानिरीक्षक नारायण बाबु थापाले संगठनको नेतृत्वपंति एक ढिक्का भएर अघि बढेकोले आफ्नो जिम्मेवारीमा उच्च दक्षताका साथ लाग्न आग्रह गरे ।

संगठन प्रमुखको भिजन अनुसार विभागिय प्रमुखहरू समेत एक भएर कार्य गरिरहेको तर बाहिरी हल्लाको कारण गलत सन्देश गएको भन्दै उनले संगठन वनाउन र राम्रो काम गर्न सुझाव दिए ।

यस्तै, कार्य तथा सीमा सुरक्षा विभाग प्रमुख सशस्त्र प्रहरी अतिरिक्त महानिरीक्षक रामशरण पौडेलले फिल्डमा खटिएका कर्मचारीको उच्च प्रशंसा गर्दै जस्तो सुकै चुनौतीको सामना गर्न र आगामी दिनमा हुन सक्ने विपद्को लागि समेत तयारी अवस्थामा रहनुपर्ने बताए ।

प्रकाशित मिति: आइतबार, असार २१, २०७७ २१:४६