जथाभावी प्रदर्शन गर्नेलाई नेकपाले कारबाही गर्ने

A+ A A-

नेपाल कम्युनिष्ट पार्टी (नेकपा)को स्थायी समितिको बैठक बसिरहेको बेला प्रधानमन्त्री तथा पार्टी अध्यक्ष केपी शर्मा ओलीको पक्षमा स्वतन्त्रको नाममा प्रदर्शन गर्नेलाई कारबाहीको माग भएको छ ।

पार्टीको स्थायी समितिको बैठकमा प्रधानमन्त्री ओलीको राजीनामा माग भएपछि ओली पक्षका कतिपय कार्यकर्ताले अन्य शीर्ष नेताहरू भारतीय दलाल भएको भन्दै विराटनगरमा प्रदर्शन गरेका थिए । उक्त प्रदेशमा पार्टीकै जिम्मेवार सदस्यहरूको सहभागीता रहेको दाबीसहित कारबाहीको माग गर्दै अर्को पक्षले आज मोरङको नेकपा पार्टी कार्यालय पाञ्चालितमा धर्नासमेत दिएको छ ।

शुक्रबारको प्रदर्शनमा पार्टीका अर्का अध्यक्ष पुष्पकमल दाहाल (प्रचण्ड)लगायतका नेतालाई गाली गलौज गरिएको थियो । त्यसपछि प्रचण्ड र माधव नेपाल पक्षीय युवा संघका नेता तथा विद्यार्थी नेतासहितको टोलीले शनिबार मोरङका पार्टी अध्यक्ष ऋषिकेश पोखरेल, सचिव गणेश उप्रेती, विराटनगर नगरसमितिका अध्यक्ष सागर थापा र सचिव हेम कार्कीसहितको टोलीलाई त्यस्ता प्रदर्शन रोक्न दबाबसमेत दिएका छन् ।

पार्टी नेताहरूलाई दबाब दिँदै अनेरास्ववियूका नेता ओसिम आलम, युवा संघका नेता इश्वरी आचार्य, विद्यार्थी नेता ताजिम अन्सारीलगायतको नेतृत्वमा ५० भन्दा बढी युवाहरू पार्टी कार्यालयमा भेला भएका थिए ।

विद्यार्थी नेता ओसिम आलमले पार्टीका शीर्ष नेताहरूविरुद्ध गाली गलौज गर्ने र भारतीय दलालको रूपमा चित्रित गर्दै सडकमा आउने क्रमलाई नरोक्ने हो भने आफूहरू पनि केपी ओलीको राजीनामा माग्दै सडकमा आउने बताए ।

‘स्थायी समितिको बैठकमा छलफल भइरहेको बेला सडकमा शीर्ष नेताहरूको बद्नाम गर्नेगरी नाराबाजी, जुलुस गर्नेलाई कारबाही हुनुपर्छ,’ आलमले भने, ‘पार्टी फुटाउन नेताहरूलाई उत्तेजित पार्ने र व्यक्तिको पछि लागेर विधि र पद्धतीलाई मिच्ने गरी कुनै गतिविधि हुनुहुँदैन भन्ने हाम्रो माग हो ।’

‘समृद्ध नेपाल, सुखी नेपालीको महान अभियानमा चिसो पानी खन्याउने काम जो कसैबाट हुन्छ भने त्यस्ताको भण्डाफोर गर्छौं,’ विद्यार्थी नेता अन्सारीले भने, ‘पार्टी एकताका लागि हाम्रो दबाब निरन्तर रहिरहन्छ ।’

यस्तै युवा संघका नेता इश्वरी आचार्यले प्रचण्ड या माधव नेपाल लगायतका नेतालाई बद्नाम गर्नेगरी भइरहेको गतिविधि नरोकिए आफूहरू पनि व्यानर लिएर सडकमा आउने बताए । ‘हामी पनि आन्दोलनबाट आएका मानिस हौं, हामी पनि २/४ सय जना मानिस लिएर सडकमा आउन सक्छौं, के अब सडकबाटै फैसला गर्ने हो त ?’, आचार्यले भने, ‘हामी विधिको पक्षमा छौं, दुवै पार्टी अध्यक्षको पक्षमा छौं, पार्टीको विधि विधान अनुसार गतिविधि हुनुपर्छ, हुलहुज्जत गर्ने र अनुशासनहिन गतिविधि गर्नेहरूलाई कारबाही हुन्छ कि हुँदैन ? ।’

युवा तथा विद्यार्थी नेताहरूको मन्तव्य पछि मोरङका नेकपा अध्यक्ष ऋषिकेश पोखरेलले स्वतन्त्रको नाममा सडकमा आएर नेताका विरुद्धमा तथानाम गाली गलौज गर्नेहरू पार्टी सदस्य हुन नसक्ने बताए । ‘स्वतन्त्रको नाममा सडकमा आन्दोलन गर्ने हो भने त्यो पार्टी सदस्य नै रहेन नि,’ उनले भने, ‘अहिले युवाहरूले पार्टी एकताको पक्षमा र नेताहरूलाई मिल्नुपर्ने दबाब दिनुपर्छ, कोही कसैले भनेको आधारमा सडकमा आउनु राम्रो होइन ।’ पोखरेलले पार्टी फुटको इतिहास देखिएको भन्दै फुटाउनेलाई कुनै पनि हालतमा फाइदा नहुने भएकोले विवादलाई हल गरेर अगाडि बढ्नुपर्ने धारणा राखे ।

यस्तै, नेकपा मोरङका सचिव गणेश उप्रेतीले स्वतन्त्रको नाममा आन्दोलन गर्नेहरूको नाम लिष्ट लिएर आए कारबाही गरिने प्रतिबद्धता जनाए । नेताहरूको प्रतिबद्धता पछि युवा तथा विद्यार्थीहरूले पार्टी कार्यालयमै केहीबेर धर्ना दिएका थिए । उनीहरूले आजलाई र भोलीलाई, व्यक्तिलाई होइन विधिलाई, नेपाल कम्युनिष्ट पार्टीको नीतिलाई, आइएमविथ नेकपाजस्ता नारा लेखिएका प्लेकार्ड बोकेका थिए ।

प्रकाशित मिति: शनिबार, असार २०, २०७७ २०:५५