सबै प्रदेशमा प्रि बजेट छलफल हुने

फाइल तस्बिर

A+ A A-

संसदीय समितिले बजेट निर्माणका लागि सरकारलाई सुझाव दिन सबै प्रदेशमा ‘प्रि बजेट’ छलफल कार्यक्रम सञ्चालन गर्ने भएको छ ।

संघीय संसद्को अर्थ समितिको सोमबार सिंहदरबारमा बसेको बैठकले आगामी आवको बजेट निर्माणका लागि सरकारलाई आवश्यक सुझाव दिन प्रदेशस्तरीय ‘प्रि बजेट’ छलफल कार्यक्रम सञ्चालन गर्ने निर्णय गरेको हो ।

जनताको अपेक्षाअनुसार बजेट निर्माणका लागि सरकारलाई आवश्यक सुझाव दिन सबै प्रदेशमा प्रि बजेट कार्यक्रम सञ्चालन गर्ने निर्णय गरिएको समितिका सभापति कृष्णप्रसाद दाहालले जानकारी दिए ।

समितिले आगामी ५ वैशाखदेखि सञ्चालन गर्ने प्रि बजेट छलफल कार्यक्रमका लागि ९÷९ जना समितिका सदस्य तथा ३÷३ जना कर्मचारीसहित १२÷१२ जनाको दुईवटा टोली परिचालन गर्ने योजना बनाएको छ ।

टोलीले प्रदेश १ को झापा र विराटनगर, प्रदेश २ को जनकपुर र वीरगन्ज, प्रदेश ३ को हेटांैडा, गण्डकी प्रदेशको पोखरा, प्रदेश ५ को बुटवल र नेपालगन्ज, कर्णाली प्रदेशको सुर्खेत र सुदूरपश्चिम प्रदेशको धनगढीमा प्रि बजेट छलफल गरी सरकारलाई बजेट निर्माणका लागि आवश्यक सुझाव दिने पनि समितिका सभापति दाहालले बताए ।

समितिले प्रि बजेट छलफलको क्रममा प्रदेशमा रहेका राष्ट्रिय गौरवको आयोजनाको स्थलगत अनुगमन गरी त्यसलाई छिटो सम्पन्न गर्न पनि सरकारलाई आवश्यक सुझाव दिने योजना बनाएको छ ।

प्रदेशहरूमा रहेका राष्ट्रिय गौरवका आयाजनाको पनि प्रि बजेट छलफलका क्रममा स्थलगत अनुगमन गरी आवश्यक सुझाव सरकारलाई दिने निर्णय गरिएको समितिका सभापति दाहालले बताए ।

सरकारले आगामी आवको बजेट १५ जेठभित्र संघीय संसद्मा पेस गर्ने संवैधानिक व्यवस्था छ । सोही बजेटलाई जनताको अपेक्षाअनुसार निर्माण गर्न अर्थ समितिले आवश्यक सुझाव दिन प्रदेशस्तरीय प्रि बजेट छलफल कार्यक्रम गर्न लागेको हो ।