डडेल्धुरा अस्पतालमा जडान गरिएको पीसीआर मेसिनबाट १३ नमुना परीक्षण

A+ A A-

सुदूरपश्चिमका ७ पहाडी जिल्लाको मध्यविन्दुमा रहेको डडेल्धुरामा कोरोना परीक्षण थालिएका छ । जनस्तरबाट रकम संकलन गरेर डडेलधुरा अस्पतालमा जडान गरिएको पीसीआर मेसिनबाट शुक्रबारदेखि नियमित कोरोना भाइरसको परीक्षण थालिएको पत्रकार सम्मेलनमार्फत अस्पतालले जानकारी गराएको हो ।

मेसिन भ्यालिडेसन भइसकेको र स्वास्थ्य मन्त्रालयको कोभिड–१९ निर्देशिका तथा कोभिड जिल्ला संकट व्यवस्थापन केन्द्र (डीसीएमसी) डडेल्धुराको निर्णयअनुसार मापदण्ड पुगेका स्वाबहरूको परीक्षण शुक्रबारदेखि नियमित गरिएको अस्पतालका निमित्त मेडिकल सुपरिटेन्डेन्ट जगदीशचन्द्र विष्टले जानकारी दिए ।

बिहीबार यहाँ परीक्षण गरिएका १३ वटा थ्रोट स्वाबको नमुनाको रिपोर्ट नेगेटिभ आएको छ। अस्पतालका प्रयोगशाला इन्चार्ज ईश्वरी भुसालका अनुसार परीक्षण गरिएका नवदुर्गा गाँउपालिकाका ९ र अन्य ४ वटा थ्रोट स्वाबको नमुनाको रिपोर्ट नेगेटिभ आएको हो ।

ल्याब सञ्चालनका लागि धनगढीस्थित सेती प्रादेशिक अस्पतालका प्रयोगशाला इन्चार्ज रमेश शाही, जिल्ला अस्पताल बझाङबाट नरेश खड्का र काठमाडौंबाट ३ जना यहाँ आएको निमित्त मेसु विष्टले जानकारी दिए ।

यो मेसिनमा १ पटकमा बढीमा ९६ वटा नमुना परीक्षण गर्न मिल्छ । तर, हाल ४५ वटा मात्रै स्वाब परीक्षण गर्न सकिने ल्याबमा कार्यरत नरेश खड्काले जानकारी दिए । जनशक्ति अभावका कारण हाललाई ४५ वटा स्वाब परीक्षण मात्रै गर्न सकिने उनको भनाइ छ ।

‘ती स्वाब परीक्षण गरी रिपोर्ट आइसक्न करिब ५/६ घण्टा लाग्छ’ पत्रकार सम्मेलनमा उनले भने।

पीसीआर मेसिन अभावमा सुदूरपश्चिमका पहाडी जिल्लाका बासिन्दा परीक्षणबाट वञ्चित भइरहेका बेला ह्युमानिटी फाउन्डेसनले सुदूरपश्चिम समाज अमेरिकाको सहकार्यमा डडेल्धुरामा पीसीआर मेसिन स्थापनाका लागि सहयोग संकलन गरी पीसीआर मेसिन डडेल्धुरा अस्पताललाई हस्तान्तरण गरेको थियो ।

ल्याबका लागि आवश्यक जनशक्ति व्यवस्थापन स्थानीय तहहरूको सहकार्यमा गरिने अस्पताल विकास समिति अध्यक्ष करुणाकर ओझाले बताए । यहाँका स्थानीय तहहरूका प्रमुखहरूले सहयोग गर्ने प्रतिबद्धतासमेत व्यक्त गरेको उनको भनाइ छ ।

डडेल्धुरा अस्पतालमा मेसिन स्थापनाका लागि संघीय सरकार उद्योग वाणिज्य तथा आपूर्ति मन्त्री लेखराज भट्ट, ह्युमानुटी फाउन्डेसन नेपाल, डडेल्धुरा जिल्लाका आम नागरिकको हौसला र विभिन्न सहयोगी दाताहरूको सहयोगले स्थापना गर्न सकिएको अध्यक्ष ओझाले बताए। प्रयोगशाला सञ्चालन तथा व्यवस्थापनका लागि थप आवश्यक जनशक्ति स्वास्थ्य तथा जनसंख्या मन्त्रालयसँग माग गरिएको उनले जानकारी दिए ।

प्रकाशित मिति: शुक्रबार, असार १९, २०७७ २०:५२