प्रचण्डले सरकारमा ओलीलाई सहयोग गर्ने, ओलीले पार्टीमा प्रचण्डलाई अवरोध नगर्ने !

प्रचण्डले सरकारमा ओलीलाई सहयोग गर्ने, ओलीले पार्टीमा प्रचण्डलाई अवरोध नगर्ने !

फाइल तस्वीर

A+ A A-

सत्तारुढ नेपाल कम्युनिस्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल (प्रचण्ड) ४ मंसिर, २०७६ मा भएको सचिवालयको निर्णयलाई थप व्याख्या गर्न सहमत भएका छन् ।

महासचिव विष्णु पौडेल र स्थायी कमिटी सदस्य जनार्दन शर्मासहितको उपस्थितिमा प्रधानमन्त्री निवास बालुवाटारमा बसेका अध्यक्षद्वय ओली र प्रचण्डबीच सचिवालयले गरेको सो निर्णयलाई स्पष्ट रूपमा व्याख्या गर्ने सहमति जुटेको हो ।

सहमतिलाई व्याख्या गर्ने सहमतिपछि दुवै नेता हाँस्दै भोलि पुनः बैठक बस्ने तय गरेर निस्किएको सहभागी एक नेताले बताए ।

के थियो ४ मंसिरको सहमति ?

‘दुवैले पूर्ववत् अडानबाट बैठक सुरु गरे पनि अन्तिममा ४ मंसिरमा भएको सचिवालयको निर्णयलाई नै थप स्पष्ट पार्न र व्याख्या गरेर जानेमा सहमत भएका छन्,’ ती नेताले शिलापत्रसँग भने ।

सचिवालयले ओलीले पाँच वर्ष सरकार चलाउने र अर्का अध्यक्ष प्रचण्डले पार्टी चलाउने निर्णय गरेको थियो ।

‘सचिवालयको त्यस बेलाको सहमतिअनुसार ओलीजीले ५ वर्ष नै सरकार चलाउने र प्रचण्डजीले पार्टीको जिम्मेवारी पाउने सो सहमतिलाई अबको स्थायी कमिटीले थप व्याख्या र स्पष्ट पार्नेछ’, छलफलमा सहभागी ती नेताले भने ।

ओली–प्रचण्डबीच भएको अनौपचारिक सहमतिपछि दुवै पक्षले आ–आफ्नो समूहमा छलफल गरेर निर्णय लिने पनि सहमति भएको छ ।

४ मंसिरको सो सहमति कार्यान्वयन गर्दा ओली प्रधानमन्त्रीमा निरन्तर रहनेछन् भने प्रचण्डले पाएको कार्यकारी अधिकार व्यवहारमै कार्यान्वयनमा आउनेछ ।

हाल प्रचण्डले कार्यकारी हैसियत पाए पनि पार्टीमा सो भूमिका निभाउनै नदिइएको गुनासो गर्दै आएका छन् । प्रचण्डको यो असन्तुष्टि सम्बोधन गर्न अब बस्ने स्थायी कमिटी बैठकले कार्यकारी अधिकारको स्पष्ट व्याख्या गर्नेछ भने पार्टीमा ओलीभन्दा शक्तिशाली हैसियतमा प्रचण्डलाई पुर्‍याउने सम्भावना बलियो बनेको छ ।

आ–आफनो समूहमा छलफल गरेपछि शनिबार ११ बजे स्थायी कमिटी बैठक बस्नुअघि पुनः ओली–प्रचण्डले एक पटक छलफल गरेर सो निर्णय बैठकमा लैजाने पनि सहमति भएको अध्यक्ष प्रचण्डनिकट स्रोतले बतायो ।

२ जेठ, २०७६ मा पार्टी एकीकरण भए पनि दुवै अध्यक्षबीच जिम्मेवारीका सवालमा असन्तुष्टि जाहेर भएपछि ४ मंसिर, २०७६ मा बसेको सचिवालय बैठकले दुवै अध्यक्षको जिम्मेवारी बाँडफाँट गरेको थियो ।

ओली सरकारमा केन्द्रित हुने तथा प्रचण्डले कार्यकारी अधिकारसहित पार्टीको काममा केन्द्रित हुने सहमति भएको थियो । तर, ओली उपचारका लागि सिंगापुर गएको बेला प्रचण्डले एक पटक मात्रै पार्टीको बैठक सञ्चालन गर्न पाए । त्यसमा ओलीले अवरोध गर्दै आएको प्रचण्डको आरोप रहँदै आएको छ ।

सरकार र पार्टीको काममा स्पष्ट रूपमा व्याख्या गर्ने र आगामी दिनमा सोही निर्णयअनुसार अघि बढ्ने भन्दै ओलीले पार्टीमा कार्यकारी अधिकार प्रचण्डलाई अनुभूत हुने गरी दिने र प्रचण्ड ओलीको राजीनामा मागबाट पछि हट्नेसम्मका कुराकानी भएका छन् । बैठकको सुरुमा दुवै पक्ष आक्रोशित रूपमा प्रस्तुत भए पनि अन्तिममा पुग्दा भने दुवै नेता हँसमुख देखिएका थिए ।

दुवै अध्यक्षले लामो समय मन माझामाझमै बिताएपछि एजेण्डागत रूपमा भएको छलफलमा दुवै नेता जारी स्थायी कमिटीमा राखेको अडानबाट एक कदम पछि हटेर सहमतिमा पुग्न सहमत भएको स्राेतको दाबी छ ।

स्थायी कमिटीमा चर्काचर्कीपछि शीर्ष नेता तहमा सहमति जुटाएर मात्र बैठक बस्ने सहमति जुटेपछि आज ओली–प्रचण्डबीच एउटा तहमा सहमतिको छनक देखिएको छ ।

तर, ओलीलाई दुवै पदबाट हटाउने अडानमा रहेका वरिष्ठ नेताद्वय झलनाथ खनाल र माधवकुमार नेपालसहितका नेतासँग सामूहिक छलफल भने भइसकेको छैन ।

ओली र प्रचण्डबीच ४ मंसिरको सहमतिलाई थप व्याख्या गरी लागू गर्ने सहमतिलाई ओली हटाउने अभियानमा प्रचण्डसँगै रहेका खनाल र नेपालले कसरी लिन्छन् भन्ने विषयमा भने छलफल नै भएको छैन ।

यस्तो थियो ४ मंसिरको निर्णय

- अध्यक्षद्वय केपी शर्मा ओली र पुष्पकमल दाहाल (प्रचण्ड)को वरीयताक्रम यथावत् रहने ।

- अध्यक्ष केपी शर्मा ओली प्रधानमन्त्रीको हैसियतले सरकारका काममा केन्द्रित हुने र अध्यक्ष पुष्पकमल दाहाल (प्रचण्ड) कार्यकारी अधिकारसहित पार्टी काममा केन्द्रित हुने, बैठक संयुक्त अध्यक्षतामा सञ्चालन गर्ने । आमरूपमा बैठकको अध्यक्षता र सञ्चालन प्रचण्डले गर्ने ।

- प्रतिनिधिसभाको यस कार्यकालमा सरकारको नेतृत्व अध्यक्ष केपी शर्मा ओलीले गर्ने र राजनीतिक स्थायित्वको सन्देश दिने ।

- पार्टी सरकार सञ्चालन अध्यक्षद्वयबीचको आपसी सल्लाहमा गर्ने, पार्टी सञ्चालन गर्दा वैधानिक व्यवस्था र कमिटी प्रणालीलाई प्रभावकारी रूपमा कार्यान्वयन गर्ने ।