सडक विभागका इन्जिनियर आचार्यविरुद्ध भ्रष्टाचारको मुद्दा दायर

A+ A A-

सडक विभागअन्तर्गत गुणस्तर अनुसन्धान तथा विकास केन्द्र ललितपुरमा कार्यरत इन्जिनियर भरतराज आचार्यविरुद्ध अख्तियार दुरुपयोग अनुसन्धान आयोगले भ्रष्टाचारको मुद्दा दायर गरेको छ ।

अख्तियारले आचार्यविरुद्ध ३ करोड २१ लाख ६२ हजार ४८० रुपैया बिगो दाबीसहित विशेष अदालतमा मुद्दा दायर गरेको हो ।

उनले गैरकानुनी रुपमा सम्पत्ति आर्जन गरेर उच्च जीवनयापन गरिरहेको उजुरीका आधारमा अख्तियार दुरुपयोग अनुसन्धान आयोगले छानविन गर्दा अवैध सम्पत्ति आर्जन गरेको देखिएपछि अख्तियारले मुद्दा दायर गरेको हो ।

उनी सरकारको सरकारी सेवा अन्तर्गत सार्वजनिक निर्माण शाखा रुकुमबाट सेवा प्रवेश गरी ओभरसियर हुँदै २०६४ माघमा इन्जिनियरमा पदोन्नति भएका थिए ।

उनले सार्वजनिक सेवामा प्रवेश पश्चात आफ्नो र श्रीमतीका नाममा जग्गाहरु खरिद, घरनिर्माण, सवारी साधन खरिद गर्नुका साथै स्रोत नखुलेको रकमसमेत अस्वभाविक मात्रामा बैकिङ कारोबार तथा विभिन्न बैंक खाताहरुमा रकम जम्मा गरी शेयर लगानी लगायतका आफू अनुकूल लगानी खर्च गर्ने गरेको देखिएको अख्तियारले जनाएको छ ।

उनले सेवामा रहँदा २ करोड ७ लाख ७९ हजार ९८६ रुपैयाँ आर्जन गरेको देखिएको छ भने ५ करोड २९ लाख ४२ हजार ४६६ रुपैयाँ खर्च तथा लगानी गरेको देखिएको छ ।

उनको स्रोत नखुलेको ३ करोड २१ लाख ६२ हजार ४८० हजार रुपैयाँ बिगो दाबीसहित भ्रष्टाचार निवारण ऐन, २०१७ को दफा १५ एवं भ्रष्टाचार निवारण ऐन, २०५९ को दफा २० को उपदफा (१) बमोजिमको कसुर पुष्टि भएकाले सोही अनुसार कारबाही माग गर्दै विशेष अदालतमा मुद्दा दायर गरेको हो ।

अख्तियारले मुद्दामा उनकी श्रीमती रितादेवी खनाल आचार्यसमेतका नाममा सम्पत्ति राखेको पाइएकोले भ्रष्टाचार निवारण ऐन, २०५९ को दफा ४७ र अख्तियार दुरुपयोग अनुसन्धान आयोग ऐन, २०४८ को दफा २९ख. बमोजिम जफत गर्ने प्रयोजनार्थ उनलाई समेत प्रतिवादी कायम गरी विशेष अदालतमा मुद्दा दायर गरेको हो ।

प्रकाशित मिति: शुक्रबार, असार १९, २०७७ १७:००