प्रदेश १ सरकारद्वारा कोरोना नियन्त्रण प्रतिवेदन सार्वजनिक

A+ A A-

प्रदेश १ सरकारले कोरोना भाइरसको रोकथाम तथा प्रतिरक्षाका लागि हालसम्म भएका कार्यहरूको विस्तृत प्रतिवेदन सार्वजनिक गरेको छ ।

शुक्रबार विराटनगरस्थित उद्योग संगठन मोरङमा पत्रकार सम्मलेनको आयोजना गर्दै प्रदेश सरकारले प्रतिवेदन प्रस्तुत गरेको हो ।

पत्रकार सम्मेलनमा कोरोना भाइरसको रोकथाम तथा नियन्त्रणका लागि प्रदेश सरकारले ‘नोवेल कोरोना भाइरसको परिचय तथा रोकथाम, प्रतिरक्षा र उपचार व्यवस्थासम्बन्धी प्रदेश सरकारको कार्य योजना’समेत तर्जुमा गरी कार्यान्यनमा ल्याएको प्रदेश १ का मुख्यमन्त्री शेरधन राईले जानकारी दिए ।

मुख्यमन्त्री राईका अनुसार कोरोना भाइरसको महामारीबाट उत्पन्न राष्ट्रिय चुनौतीलाई प्रदेशस्तरमा सामना गर्न प्रदेश १ सरकारले ‘होलियास्टिक एप्रोच’ को अवधारणाबमोजिम कार्य गरिरहेको छ ।

यस अवधारणाबमोजिम प्रदेश सरकारले नेपाल सरकार तथा स्थानीय तहहरुसँगको सहकार्यमा निजामती प्रशासन, नेपाल प्रहरी, सशस्त्र प्रहरी बल र राष्ट्रिय अनुसन्धान विभागलाई आवश्यक जिम्मेवारीसहित समन्वयात्मक रूपमा परिचालन गरेको मुख्यमन्त्री राईले जानकारी दिए ।

त्यसैगरी, प्रदेश १ सरकारले गत ३० वैशाखमा मुख्यमन्त्री शेरधन राईको अध्यक्षतामा बसेको ‘कोभिड क्राइसिस म्यानेजमेन्ट सेन्टर’ को प्रादेशिक समितिको बैठकबाट भारतमा लकडाउन खुकुलो भएलगत्तै २५ हजार नेपाली नागरिक प्रदेशमा भित्रिन सक्ने सम्भावना रहेको अनुमान गरेको थियो ।

सो सम्भावनालाई मध्यनजर गर्दै प्रदेश १ सरकारले नेपाल भारत सीमाका पशुपतिनगर, काँकडभिट्टा, भद्रपुर, रंगेली, रानी र भन्टाबारीलगायतका क्षेत्रहरूमा होल्डिङ सेन्टर स्थापना गरेको छ ।

होल्डिङ सेन्टर स्थापना गरी प्रदेश सरकारले विदेशबाट आउने नागरिकहरूको व्यवस्थापन गर्न स्पष्ट जिम्मेवारीसहितको कार्यविधि र संक्रमण परीक्षणको योजनाहरू पनि अघि सारेको छ ।

नोवेल कोरोना भाइरसको रोकथाम तथा नियन्त्रणका लागि प्रदेश १ सरकारले प्रारम्भिक चरणदेखि नै योजनावद्ध कार्ययोजना बनाई समन्वयात्मक रूपमा कार्य गर्दै आएको पत्रकार सम्मेलनमा जानकारी दिइएको छ ।

प्रदेश सरकारले कोरोनाको भाइरसको उपचार नियन्त्रणका लागि कोरोना जनसुरक्षा कोष तथा क्वारेन्टाइनस्थलको स्थापना, पीसीआर पद्धतिबाट कोरोना संक्रमणको परीक्षण, आइसोलेसन वार्डको स्थापना र सङ्क्रमितलाई कोरोना विशेष अस्पतालमा उपचारको प्रबन्धलगायतका कार्यहरू गरेको जनाएको छ ।

यसका अतिरिक्त कोरोना भाइरसको रोकथाम तथा प्रतिरक्षाका लागि प्रदेश १ सरकारले स्थापना गरेको कोरोना जनसुरक्षा कोषमा हाल ३३ करोड ५४ लाख १ हजार ९ सय ४१ रुपैयाँ ४० पैसा जम्मा भएको मुख्यमन्त्री तथा मन्त्रिपरिषदको कार्यालयका प्रमुख सचिव दिनेश भट्टराईले बताए ।

उनले प्रदेश सरकारको सो कोषबाट कुल २७ करोड ३३ लाख ८९ हजार ८ सय ९० रुपैयाँबराबरको रकम विभिन्न मन्त्रालयमार्फत निकासा भई खर्च हुने क्रममा रहेको जानकारी दिएका छन् ।

प्रदेश सरकारको कोरोना जनसुरक्षा कोषमा भने प्रदेश सरकारको तर्फबाट २५ करोड, नेपाल सरकारको तर्फबाट ४ करोड, बैंक तथा वित्तीय संस्थाहरूको तर्फबाट १ करोड ८६ लाख २ हजार २ सय ३६, प्रदेशका पदाधिकारी तथा कर्मचारीहरूको तर्फबाट १ करोड ६४ लाख ६० हजार ९ सय ७५ रुपैयाँ ८० पैसा, उद्योगी व्यावसायीहरूको तर्फबाट ७४ लाख ८० हजार र अन्य विभिन्न व्यक्ति तथा संस्थाहरूको तर्फबाट २८ लाख ५८ हजार ७ सय ३० रुपैयाँ गरी ३३ करोड रकम जम्मा भएको थियो ।

यसका साथै प्रदेश सरकारले प्रदेश १ का विभिन्न अस्पतालमा हालसम्म कुल ५ सय ८८ जनाको उपचार भइरहेको तथा ४ सय जना निको भई डिस्चार्ज भइसकेको प्रस्तुत प्रतिवेदनले देखाएको छ ।

जसमा धरानस्थित बीपी कोइराला स्वास्थ्य विज्ञान प्रतिष्ठानमा २८ महिला र ५ पुरुष गरी ३३ जना, विराटनगरस्थित कोशी अस्पताल कोभिड–१९ उपचार केन्द्रमा १९ महिला र १३ पुरुष गरी ३२ जना, गोठगाँउस्थित कोभिड आइसोलेसन अस्पतालमा पुरुष १ सय ५ जना र उदयपुरको चौदण्डीगढीमा ८ महिला र १० पुरुष गरी १८ जनाको उपचार भइरहेको छ ।

त्यसैगरी, प्रदेश १ मा सञ्चालित विभिन्न प्रयोगशालाहरूबाट हालसम्म २५ हजार ३ सय ४० जनाको स्वाबको नमुना संकलन गरिएकोमा ६ सय १५ जनाको पीसीआर पद्धतिबाट कोरोना परीक्षणको नतिजा पोजिटिभ देखिएको प्रमुख सचिव भट्टराईले जानकारी दिए ।

जसमा २३ हजार ९ सय ७० जनाको नतिजा नेगेटिभ देखिएको र ७ सय ५५ जनाको परीक्षणको नतिजा आउन बाँकी रहेको जनाइएको छ ।

प्रकाशित मिति: शुक्रबार, असार १९, २०७७ १६:१३