३ दिनदेखि हराएकी बालिका मृत फेला, बलात्कारपछि हत्याको आशंका

A+ A A-

धनुषामा ३ दिनदेखि बेपत्ता ११ वर्षीया बालिका मृत अवस्थामा फेला परेकी छन् । स्थानीयले बालिकाको बलात्कारपछि हत्या गरिएको हुन सक्ने आशंका गरेका छन् ।

विनोद पंजियारकी छोरी कञ्चन कुमारी पंजियारको शव जनकपुरधाम उपमहानगरपालिका- २१, कुर्थामा रहेको दूधमती नदीको किनारमा शुक्रबार १२ बजेतिर भेटिएको हो । उक्त स्थान पंजियारको घरभन्दा १ किलोमिटरको दूरीमा छ ।

अहिले घटनास्थलमा प्रहरी पुगेर अनुसन्धान थालेको छ । घटनास्थलनजिक दुर्गन्ध फैलिएपछि खोजबिन गर्दा कञ्चनको शव भेटिएको स्थानीयले बताएका छन् । बुधबार दिउँसो भैँसी चराउन गएकी बालिकालाई अबेर रातिसम्म गाउँभर खोजबिन गर्दा पनि नभेटिएपछि परिवारजनले बिहीबार बिहानै अस्थायी प्रहरी चौकी कुर्थामा उजुरीसमेत दिएका थिए ।

मृतक बालिकाका काका विजय पंजियारले कञ्चन बुधबार दिउँसो भैँसी चराउन चौरतिर गएको र अबेर साँझसम्म घर नआउँदा आफूहरूलाई शंका लागेको बताए । ‘बुधबार साँझ १ जना आफन्तकहाँ भोज थियो, हामीले कञ्चन त्यहीँ गएको हुनुपर्ने आशंका गर्‍यौँ र चौरमा गएर उनका बुबा उमेश पंजियारले भैँसी ल्याए, अबेर रातिसम्म पनि सबै ठाउँमा खोजबिन गर्‍यौँ,' उनले भने, 'तर, कतै पनि नभेटिएपछि बिहीबार बिहान स्थानीय अस्थायी प्रहरी चौकीमा उजुरी गर्‍यौँ र खोजबिन पनि जारी राख्यौँ ।’

एकाएक आज एक किसानले घरमा आएर नदीको किनारमा फालिएको अवस्थामा छोरीलाई देखेको बताएपछि आफूहरू छोरीलाई खोजबिन गर्ने क्रममा पानी परिरहेको र सो क्रममा अघोरी बाबाको कुटीमा पानीबाट बच्नका लागि भित्र पस्न खोज्दा उनले हामीलाई कुटीभित्र छिर्न नदिएको मृतकका पिता उमेशले बताए । छोरीको शव हेर्दा बलात्कार गरी हत्या गरिएको आशंका उनले व्यक्त गरे ।

स्थानीय दिनेश साहले बालिकाले जिउमा गञ्जी मात्रै लगाएको र रक्ताम्य रहेको शव नदी किनारमा देखिएकाले बलात्कार गरी हत्या गरेको आशंका व्यक्त गरे । ‘लकडाउन अवधिदेखि गाउँवरिपरि रहेका चौर र आँप बगैँचामा गाउँबाहिरबाट युवाहरू आएर त्यहाँ बसिरहेका थिए । उनीहरूजस्ता मादक तथा लागुपदार्थ सेवन गर्नेहरूले नै यस्तो गलत कार्य गरेको हुनुपर्दछ,’ उनले भने ।

यता, जिल्ला प्रहरी कार्यालय धनुषाका प्रहरी नायव उपरीक्षक रामेश्वर कार्कीले प्रारम्भिक अनुसन्धानका लागि एक अघोरी बाबालाई समातिएको र घटनाबारे थप अनुसन्धान जारी रहेको जानकारी दिए ।

मृतक बालिकाका बुबा विनोद पंजियारले दैनिक मजदुरी गरेर आफ्नाे ५ जनाकाे परिवार पालिरहेका थिए । बालबालिकालाई पालनपोषण गर्न विनोद गाउँको हाटबजारमा तरकारी बेच्ने गर्छन् । अति विपन्न पंजियार घरमा यतिबेला शोकमा डुबेको छ भने, गाउँलेहरू आक्रोशित बनेका छन् ।

प्रकाशित मिति: शुक्रबार, असार १९, २०७७ १६:०७