होटल व्यवसाय छिट्टै सञ्चालनमा आउँछ : मन्त्री भट्टराई

फाइल तस्वीर

A+ A A-

संस्कृति, पर्यटन तथा नागरिक उड्डयनमन्त्री योगेश भट्टराईले होटल व्यवसाय छिट्टै सञ्चालनमा आउने बताएका छन् ।

मन्त्रालयमा आयोजित पत्रकार सम्मेलनमा भट्टराई कोरोना संक्रमण जोखिमको अवस्था हेरेर व्यवसाय सञ्चालनका लागि आवश्यक छलफल भइरहेको बताए ।

अहिलेको पर्यटक/ग्राहक नै आउन नसक्ने अवस्थामा होटल सञ्चालन गरेर मात्रै नहुने उनले बताए । व्यवसायीले सञ्चालन अनुमतिका लागि पटकपटक आग्रह गरे पनि छलफल चलिरहेको मन्त्री भट्टराईले बताए ।

उनले आगामी दिनमा होटल सञ्चालनमा आएपछि कसरी सतर्कता अपनाउने भन्ने विषयमा पर्यटन बोर्डसँग मिलेर काम भइरहेको बताए ।

व्यवसायीले होटल सञ्चालनका लागि आवश्यक प्रोटोकल तयार गरेर आए छलफल गर्न सकिने मन्त्री भट्टराईले बताए ।

‘एयरलाइन्सहरूले पनि आवश्यक प्रोटोकल बनाएका छन्,’ उनले भने, ‘तर, सञ्चालनका लागि केही समय अझै लाग्छ ।’ होटल र एयरलाइन्ससँग अरू कुरा पनि जोडिएको मन्त्री भट्टराईले बताए । कोरोना संक्रमणको ग्राफ बढ्दै गइरहेको उल्लेख गर्दै उनले अरू देशको तथ्याङ्क अध्ययन गर्दै पर्यटन क्षेत्रका व्यक्तिसँग सल्लाह गरी छिट्टै सञ्चालनका लािग सीसीएमसीमा प्रस्ताव लिएर जाने उनले बताए ।

कोरोना संक्रमणको जोखिम न्यूनीकरणका लागि जारी भएको लकडाउनका कारण पर्यटन क्षेत्रमा ८ लाखको रोजगारीमा असर परेको मन्त्री भट्टराईले बताए ।

सरकारी र निजीक्षेत्रबाट गरी पर्यटन क्षेत्रमा १० खर्ब बढीको लगानी रहेको उल्लेख गर्दै उनले साढे २ लाख प्रत्यक्ष र ८ लाख श्रमिक आंशिक रूपमा पर्यटन व्यवसायसँग जोडिएको मन्त्री भट्टराईको भनाइ छ । उनले कोभिड-१९ का कारण कर्मचारीलाई तलब दिनुपर्ने संकट उत्पन्न भएको बताए ।

प्रकाशित मिति: शुक्रबार, असार १९, २०७७ १३:३३