तलब नपाएको भन्दै हेटौँडाका शिक्षक सडकमा

A+ A A-

मकवानपुरका निजी विद्यालयका शिक्षकले लकडाउनको अवधिको तलब, सेवा सुविधा नपाएको भन्दै सडकमा उत्रिएर प्रर्दशन गरेका छन् ।

हेटौँडाको बुद्धचोकमा संस्थागत विद्यालय शिक्षक युनियन (इस्टु) मकवानपुरको नेतृत्वमा शिक्षक प्रदर्शनमा उत्रिएका हुन् ।

आन्दोलनरत शिक्षकले ‘हाम्रो तलबको व्यवस्था गर’, ‘सेवा हामीले रोकेनौँ, भोकले आँखा देखेनौँ’ जस्ता नारा अंकित प्लेकार्ड बोकेर प्रदर्शनमा होमिएका थिए ।

इष्टुले यसअघि तलब माग गर्दै जिल्ला समन्वय समिति, हेटौँडा उपमहानगरपालिका, जिल्ला शिक्षा समन्वय इकाईलाई ध्यानाकर्षण गराएको थियो ।

कोभिड-१९ को विषम परिस्थितिमा पनि संस्थागत विद्यालयका शिक्षक कर्मचारीले अनलाइन कक्षालगायत अन्य तोकिएको कार्य नियमित गर्दै आइरहँदा पनि पूर्वनिर्धारित तलब, सेवासुविधा प्राप्त नभएको र राज्य पक्ष पनि यसमा मौन रहेको भन्दै इष्टुले शुक्रबार हेटौँडामा प्रदर्शन गरेको हो ।

निजी विद्यालयले शिक्षकलाई तलब नदिएपछि प्रदर्शन गर्नुपरेको इस्टुका अध्यक्ष सचिन लामाले बताए ।

इस्टुले शिक्षक कर्मचारीलाई भुक्तानी गर्नुपर्ने खाईपाई आएको तलबभत्तालगायत पूर्ववत् सेवासुविधा नियमित उपलब्ध गराइनुपर्ने, कोरोना कहरको बाहनामा नियमविपरीत शिक्षक कर्मचारीलाई निष्कासन गर्न नहुने, सम्पूर्ण संस्थागत विद्यालयका शिक्षक कर्मचारीलाई सामाजिक सुरक्षा कोषमा सहभागी गराइनुपर्ने माग अघि सारेको छ ।

विद्यार्थी भर्ना प्रक्रियालाई परिस्थिति मिलाएर सहज बनाइनुपर्ने, अनलाइन तथा भर्चुअल रूपमा पढाइएका/पढाउने कक्षालाई औपचारिक मान्यता दिइनुपर्ने र सरकारद्वारा निजीक्षेत्रलाई दिने घोषणा गरिएको सहुलियत ऋणलगायत राहत प्याकेजमा संस्थागत विद्यालयलाई पनि समावेश गरिनुपर्ने इस्टु मकवानपुरको माग छ ।

प्रकाशित मिति: शुक्रबार, असार १९, २०७७ १२:५३