नेकपा शीर्ष नेताको झगडामा दोस्रो पुस्ताको हस्तक्षेप सुरु

A+ A A-

नेकपाका दुई अध्यक्षसहित शीर्ष नेताबीच 'इगो'को लडाइँ चरम उत्कर्षमा पुगेको निष्कर्षसहित दोस्रो पुस्ताका नेताहरूले हस्तक्षेपकारी भूमिका निर्वाहको अभियान सुरु गरेका छन् ।

आज बिहान ८ देखि ११ बजेसम्म नेकपा नेता तथा कृषिमन्त्री घनश्याम भुषालको निवासमा भेला भएका १२ भन्दा बढी दोस्रो पुस्ताका नेताले शीर्ष नेताबीचको एकता कायम गराउन निरन्तर दबाब र खबरदारी गर्ने निर्णसमेत गरेका छन् ।

योगेश भट्टराई, जनार्दन शर्मा, वर्षमान पुन, सुरेन्द्र पाण्डे, शङ्कर पोखरेल, प्रदीप ज्ञवाली, विष्णु रिमाल, शक्ति बस्नेत, मणि थापालगायतका नेता सहभागी सो छलफलमा पार्टी एकतालाई बचाइरहन दोस्रो पुस्ताका नेताले जुनसुकै तहको त्याग गर्न पनि तयार भएर बस्ने सहमति गरेका छन् ।

भेलामा सहभागी मन्त्री योगेश भट्टराईले पार्टी एकता कायम गर्न सबैले योगदान दिने र त्याग गर्नुपरे तयार रहने निष्कर्ष निकालेको बताए ।

नेताहरूबीचको झगडामा आगोमा घ्यू थप्ने कार्य भइरहेको भन्दै युवापुस्तावाट यस्तो गतिविधि हुन नदिन आज पुनः युवानेताबीच दोस्रो छलफल गर्ने तयसमेत भएको छ ।

‘शीर्ष नेताको झगडामा सके पानी हालौँ, नसके बल्न नदिऔँ, शीर्ष नेताबीचको आरोप प्रत्यारोप रोकाैँ भन्ने विषयमा सबैको सहमति छ, थप नेताहरूसँग छलफल गरेर पार्टी एकताका पक्षमा निरन्तर दबाब दिन हामीबीच सहमति जुटेको छ, भट्टराईले शिलापत्रसँग भने ।

जारी स्थायी कमिटी बैठकमा कार्यकारी अध्यक्ष पुष्पकमल दाहाल (प्रचण्ड), वरिष्ठ नेताद्वय झलनाथ खनाल र माधव नेपाल, उपाध्यक्ष वामदेव गौतमलगायतका नेताले प्रधानमन्त्री केपी ओलीलाई दुवै पद छाड्न दबाब दिएपछि नेकपाभित्रको आन्तरिक कलह यतिबेला उत्कर्षमा पुगेको छ ।

युवा नेताहरू यसले पार्टीमा फुटसम्मको दुर्घटना निम्त्याउन सक्ने भन्दै यसलाई रोक्ने अभियानमा जुटेका हुन् ।

प्रकाशित मिति: शुक्रबार, असार १९, २०७७ ११:४२