वैदेशिक रोजगारमा जान दिने सरकारको निर्णय, कसरी जाने विदेश ?

A+ A A-

भिसा अवधि र करार अवधि बाँकी रहेका श्रमिकलाई वैदेशिक रोजगारमा जान दिने सरकारले निर्णय गरेको छ । सरकारका प्रवक्ता डा. युवराज खतिवडाले कोरोनाका कारण हाल स्थगित गरिएको श्रम स्वीकृतिलाई पुन: खुल्ला गर्ने निर्णय भएको जानकारी दिएका हुन् ।

बिदामा नेपाल आएका तथा भिसा र करार अवधि बाँकी रहेकाको हकमा कोभिड-१९ र स्वास्थ्य परीक्षण प्रोटोकलको पालना गरी वैदेशिक रोजगारीमा जान सहमति दिने निर्णय भएको उनले बताए । १५ असारमा बसेको मन्त्रिपरिषद् बैठकले साे निर्णय गरेको उनले बताए ।

यसपूर्वको करार अवधि समाप्त भई पुन: करार नवीकरण गरेका र भिसाको समेत म्याद थप भएका व्यक्तिले आवश्यक कागजातसहित निवेदन दिएमा कोरोना परीक्षण र स्वास्थ्य प्रोटोकलको आधारमा पुनः श्रम स्वीकृति दिन पनि सरकारले निर्णय गरेको छ ।

यस्तो छ श्रम मन्त्रालयको मादण्ड

कोभिड-१९ महामारीको कारण नेपाली नागरिकलाई वैदेशिक रोजगारीमा जान श्रम स्वीकृति दिने कार्य स्थगित रहेकोमा मिति २०७७/३/१५ मा नेपाल सरकार (मन्त्रिपरिषद्) बाट देहायबमोजिम स्वीकृति दिने निर्णय भएको व्यहोरा जानकारीको लागि अनुरोध छः

(१) बिदामा नेपाल आएका तथा भीषा र करार अवधि बाँकी रहेकाको हकमा कोभिड-१९ परीक्षण र स्वास्थ्यसम्बन्धी प्रोटोकलको पालना गर्ने गरी वैदेशिक रोजगारीमा जान दिने ।

(२) यसपूर्वको करार अवधि समाप्त भई पुन: करार नवीकरण गरेका र भिसाको समेत म्याद थप भएका व्यक्तिले आवश्यक कागजातहरूसहित निवेदन दिएमा कोभिड-१९ परीक्षण र स्वास्थ्य सम्बन्धी प्रोटोकलसमेतको आधारमा पुनःश्रम स्वीकृति जारी गर्ने ।

माथी खण्ड (१) बमोजिम बिदामा आएका तथा भिसा र करार अवधि बाँकी रहेका व्यक्तिले उल्लेख भएबमोजिम कोभिड -१९ परीक्षण र स्वास्थ्यसम्बन्धी प्रोटोकलको पालना गर्ने गरी स्वेच्छाले जान सक्ने र यसका लागि छुट्टै सिफारिस/सहमति आवश्यक नपर्ने व्यहोरा जानकारीको लागि अनुरोध छ । यसका लागि श्रम, रोजगार तथा सामजिक सुरक्षा मन्त्रालयको सहमति रहेको व्यहोरासमेत जानकारी गराइन्छ ।

खण्ड (२) बमोजिमको पुनः श्रम स्वीकृति दिने कार्य वैदेशिक रोजगार कार्यालय, ताहाचल काठमाण्डौं तथा सबै प्रदेशमा रहेका श्रम तथा रोजगार कार्यालयबाट मिति २०७७/३/१८ देखि नै नियमित रूपमा हुने भएकोले सो कार्यालयमा आवश्यक कागजात पेश गरी पुनः श्रम स्वीकृति लिन सकिने व्यहोरा समेत अनुरोध गरिन्छ।

साथैमाथि उल्लेखित निर्णय बमोजिम स्वेच्छाले वैदेशिक रोजगारीमा जाने कामदारले रोजगारी वा रोजगारदाताको प्रकृति, गन्तव्य मुलुकको हालको अवस्था, सम्बन्धित मुलुकको सरकारको आप्रवासी कामदारसम्बन्धी नीति, कोभिड-१९ को प्रभाव र स्वास्थ्य सम्बन्धी मापदण्ड तथा प्रावधान र सम्भावित जोखिमसमेतको जानकारी लिनु हुनसमेत अनुरोध गरिन्छ ।

प्रकाशित मिति: बिहीबार, असार १८, २०७७ १९:००